خەسرەو خەیاڵێ
Jump to navigation
Jump to search
| خەسرەو خەیاڵێ، خەسرەو خەیاڵێ | ئاخ پەی خان خاس خەسرەو خەیاڵێ |
| ساحێب سپاوسان دارا ئێقباڵێ | موهەییا نە گەنج خەزێنە و ماڵێ |
| بەخشەندەی بێباک کۆی کەرەم بەیا | ساحێب شەوق و ذەوق دڵ بێ غەم بەیا |
| با ماوە شکار سەر دیاراندا | وە ماوای مەجنوون ڕۆزگاراندا |
| بدیا وە جەستەی خەم پێ وارامدا | وە کۆمەی دیوان وەحشی سارامدا |
| وە سەیل ئەسرین دیدەی تارمدا | وە دەرد دەروون ئەندۆبارمدا |
| وە عوریانی «تەن» تەنیای تاکمدا | وە سەنگ باڵین خەفتەی خاکمدا |
| وە سەرگەردانی سەحرای چۆڵمدا | وە عاسا و کەشکۆڵ پۆس کۆڵمدا |
| وە ئاهـ و ناڵەی شەوان تا ڕۆمدا | وە زاێەڵەی سەخت شین بێشۆمدا |
| وە پەشێوی بەخت شوومی چارەمدا | وە زوخا و زام جەرگ پارەمدا |
| وە بڵێسەی بەرز گڕ تێ بەستەمدا | وە خەستەی خاتر خار جەستەمدا |
| بەزەییش باما وە جەستەی حاڵم | بزاناش کوشتەی کامین نەوهاڵم |
| جە کێوەن خاتر خەستەم گرتەن خەم | سفتەی سۆزانم چون پەروانەی شەم |
| سەرمایەی عەقڵم کێ کەردەن غارەت | کام دڵبەر بەردەن وە یەک ئیشارەت |
| بەڵێ ئەو خەیاڵ «نەوفەل» نە دڵ بەرد | گیان وێش هیلاک ژار قاتڵ کەرد |
| نەکەردا ئەو فکر ناوەردا نە دڵ | نەشیا نە سەودای خەیاڵ باتڵ |
| یا وە گەنج و ماڵ یا وە زۆر وێش | شاد کەردا خاتر دێوانەی دڵڕێش |
| بکەردا هیممەت چون خان «حاتەم» | «شەم» واسڵ وە من، من واسڵ وە «شەم» |
| هەر چەند مەوینوون نەی ڕۆزگاران | کەس نیەن دڵسۆز سیا ستاران |
| مەر هەرخوداوەند گوشایەندەی بەخت | ڕەها بدۆ بەخت من نەی بەند سەخت |
| وەرنە ئی بەندە زەنجیر پامەن | تا مەردەن چوو قەیس وا حەسرەتامەن |
This work was published before January 1, 1929, and is in the public domain worldwide because the author died at least 100 years ago.
Public domainPublic domainfalsefalse