خراب معبدلر
Jump to navigation
Jump to search
| خراب معبدلر محرری: رضا توفيق |
واردم اشيكنه يوزويمى سوردم ،
اطرافنى بوتون ديكنلر آلمش !
يوكسك محرابنده يازيلر كوردم ،
كيم بيلير نه موطلو زماندن قالمش !
باتان كونشلرك دالغين نكاهى ،
قرارتوب براقمش او قبله كاهى ،
مظلوم بر امتك بخت سياهى
ويران قبه سنه كولكه لر صالمش !
اسلامك بختيار بر زماننده ،
آب حيات وارمش شادرواننده ،
شيمدى خراب اولان سايه باننده
دم چكن قوشلرك عمرى آزالمش
آيات حكمت وار كتابه سنده ،
درس عبرت وار خطابه سنده ،
باغ جنت اولان خرابه سنده
تكبير صدالرى آرتق بونالمش !
هى رضا ، سجده يه باش قوى ده ايكله !
طاشلر ديله كلسين سنك دردكله ؛
افسانه سويله يم آغلا هم ديكله ؛
او شرفلى ماضى مكر ماصالمش ! .
رضا توفيق
Türkçe: tr:Harap Mabedler