تێخ دووری دۆس جگەر تۆ کەردە
Jump to navigation
Jump to search
| تێخ دووری دۆس جگەر تۆ کەردە | هووناو زامان ڕیشەی دڵ بەردە |
| تەن لەت لەت وە سەیف ئەبرۆی ئەو دڵبەر | پێکیای پەیکان موژەی دڵ پەیکەر |
| «مەفتوون»ی مەعلوول عەین نەرگس بێز | مەحبووس زنجیر توڕڕەی موشک ڕێز |
| سەد هەزار حەسرەت پەی دڵ ئەوگاریت | ئاهـ سەرد و دەرد پەی زام کاریت |
| ئوستاد تەعلیم سەرمەدرەسەی عەشق | نە تەدبیر دەرد ئەوگاران پڕ مەشق |
| مەر نەوات سەییاد تێخ و تیر وە دەس: | دەخیل جە دەسش خەلاس مەبۆ کەس |
| مەکەرە گوزەر وە مەئوای ئەودا | چون دڵان جە لاش هان نە گرەودا |
| مەر نەدیت پەرێ غەزاڵەی موشکین | چەند ڕێزام وەتاو جە دیدە ئەسرین |
| کەردم وە نیشان دڵ پەرێ تیرش | سەر کەرد هوون چون سەیل نە جای تەئسیرش |
| ئیسە چەم بێ نوور دڵ زەدەی پڕ زام | سیوای ئێش و نێش نەیاوام وە کام |
| نەجاتت جەی دەرد ئەر هەن تەمەننا | بەڵ چون جەفایی نەشی وە فەنا |
| هاڵای حوسن ڕووی دیدەی دڵڕێشان | وە سەفحەی دڵدا سوورەت نەکێشان |
| چون تەبع کیتاب عەشق دڵداران | وێت لادەر نە بەزم پەری ڕوخساران |
| وەرنە جەو دما جە دەس سیاسەت | قەتعەن خەلاسیت تا ڕۆی قیامەت |
This work was published before January 1, 1929, and is in the public domain worldwide because the author died at least 100 years ago.
Public domainPublic domainfalsefalse