تانری‌نین اینسان‌لاری ادب‌لی اولماغا دعوت ائتمه‌سی، ادب‌سیزلری جزالندیرماسی حاق‌دا

From Wikisource
Jump to navigation Jump to search
تانری‌نین اینسان‌لاری ادب‌لی اولماغا دعوت ائتمه‌سی، ادب‌سیزلری جزالندیرماسی حاق‌دا
یازار: مولوی


 
 
تانری‌دان ایستریک بیز، ناییل اولاق مقصده،
بی ادب محروم اولار، رببه دوعا ائتسه‌ده.

پیس‌لیک ائتمز بی ادب، اؤزونون اندامینا،
او هم‌ده آتش وورار، میللتی‌نین جانینا.

«مایده» آسیمان‌دان، وحی ایله گلیب چاتیب،
ساتیلیب-آلینماییب، شرحینی آلیب چاتیب.

موسی قوهوم‌لاریندان،دئدی‌لر چوخ خرجیمیز،
قانمادان سوروشدولار، هانی سیر-و-مرجیمیز.

بوغدا عرشه چکیلدی، چؤرک دیل‌لردن دوشدو،
خالقا اذذیت قالدی، اوراق ال‌لردن دوشدو.

عیسی پئیغمبر گلدی، دوعا ائتدی ربب‌ینه،
ربب‌ی ائشیتدی اونو، بوللوق یاراتدی یئنه.

ربب‌ین فرمانی ایله، گؤی‌لردن ائندی سوفره،
هوواری‌لر ایناندی، داها سئویندی سوفره.

اوزو سیرتیق اولان‌لار، اؤزلرین توخ ائتدی‌لر،
دیلنچی‌لر، گیدالار، نفس‌لرین چوخ ائتدی‌لر.

عیسی اونلارا دئدی: یئیین، ایچین شوکر ائدین،
بو روزی داییمی‌دیر، تانری آدین ذکر ائدین.

بدگومان‌لیق ائتمه‌یین، تاماها گوج وئرمه‌یین،
کاسیب اولار سوفره‌نیز، تانرییا کوفر ائتمه‌یین.

او گیدالار باخمادی، عیسی‌نین سؤزلرینه،
تانری رحمت قاپیسین، باغلادی اوزلرینه.

دادلی-لذیذ سوفره‌لر، کسیلدی آسیمان‌دان،
بئله زنگین سوفره‌لر، یوخ اولدو همین آن‌دان.

زکات وئرمه‌سن اگر، یاغیش‌لار یاغماز سحر،
زینالار چوخ اولارسا، وبا توتار کند-شهر.

ظولوم، غم‌لر گلرسه، سببی واردیر دئمک،
تانری‌دان قورخمامازلیق،”دبی” واردیر دئمک.

احتیاط‌لی اولمایان، دوست‌لوغون یول‌لاریندا،
بیر نامرد تک قالاجاق، دوست‌لارین دیل‌لرینده.

ادبین چوخ اولارسا، نورلار بخش ائدر فلک،
چوخ‌لوغوندان ادبین، تانرییا عزیز ملک.

آرسیزلار اوجباتیندان، توتار گونش صورتین،
رد ائتدی ربب سؤزونو، ایبلیس آلدی صیفتین.

یولوندا آزغین اولان، بیر بنده اولسا اگر،
اولار حئیرت ایچینده، باشی داشلارا ده‌یه‌ر.

شاه‌لا مئهمانین سؤزون، بیر لحظه‌ ائتدیک تامام،
هله قورتارمامیش‌دیر، ماراقلی‌دیر بو کلام.