بەیتی ترێ
Jump to navigation
Jump to search
| ڕۆڵە بزانە ترێ چەند ڕەنگە | کامیان زوو ڕەزەو، کامیان ئاونگە |
| ترێ پادشای هەموو میوانە | هاوین پێخۆری هەموو میوانە |
| خوا خۆی فەرموویە «أعناب و نخيل» | پێش خۆرمای خستوە قورئانمان دەلیل |
| بە «داڵیتە» وە هێشووی چەند جوانە | نموونەی مەدح و نەزمی قورئانە |
| خەڵکی بۆ گەڵای بە ئاخ و داخە | لەگەڵ پێگەیشت باوی یاپراخە |
| چووزەرەی ژنی تێ دەورووژێ | بێزووکەر تەرزی دادەکرۆژێ |
| کە کۆتەرەکەی پیاو ئەیسووتێنێ | بۆ نێرگەلەکێش قڕانێک دێنێ |
| ڕۆنی داری مێو بۆ ڕیحی طيار | لەگەڵ تێتهەڵسوو ئەڕوا بە یەکجار |
| سێبەری سەرحەوز هەمووی بەمێوە | هەر هێشوویەکی توورەکەی پێوە |
| بەرسیلە نەختێ خوێی لەگەڵ بێنە | لە کاسەیەکا هەڵیتەکێنە |
| بیخەرە دەمت دەم بتەقێنە | بە تامەتامە سەر بلەقێنە |
| هەنگ شیلەی ئەوە ئەیکا بە هەنگوین | سێبەر و بەر و سەری هەر ڕەنگین |
| نەشئە ئەبەخشێت دایکی شەرابە | ساڕێژی کزەی جەرگی کەبابە |
| هەر لەو ڕۆژەوە دنیا دانرا | مەدحی شەرابە بە شیعر بێژرا |
| پاییزان ترێ و کەباب چەند خۆشە | «شیرە» و «کاڵەکوت» چاری نەخۆشە |
| بۆ ساوەر کوتان کەشکەک و ترێ | هێزی ئەوانە دەست مێکوت ئەگرێ |
| دۆشاوی باوی سەرمای زستانە | باسووق و سجووق ڕاحەی کوردانە |
| دیومە پاقلاوە لە نانە باسووق | ناردیان بە دیاری هەر لەبەر تاسووق |
| مێوژە ڕەشکەی لە خورما خۆشتر | وەک ئەو شیرینە و لەویش فێنکتر |
| قەومێک لە لایەن پارە بردنەوە | بە مێوژە ڕەشکە تاقیان کردنەوە |
| ئەوە بوو وتیان بە هەورامیانە: | پادار بگیرۆ، بێ پا وێمانە |
| خۆ مێوژە سوورکە لەگەڵ لەبلەبی | ئەوەند بەتامە درەنگ تێر ئەبی |
| شەوارەی زستان شەوچەرەی دۆستان | باسووق و سجووق دێتە بەردەستتان |
| بەسەر مێوژدا مەولوود ئەخوێنن | ئەبێ بە مووفەڕک خەڵک ئەیفڕێنن |
| سرکە ئەنواعی ترشی لێ ئەکەن | ڕەنگاو بۆ شێخان دەست بە دەست ئەبەن |
| حەڵوای دۆشاوی خەنیمی کوردە | چەند پێخورێکی بە دەست و بردە |
| خەڵک کردوویانە بە بەند و باوێ | وای لە قوونێیە و وای لە دۆشاوێ |
| من ئێستاش مشتاق بەزمی مشتاغم | هەڵپەڕکێ و بلوێر دای لە دەماغم |
| لەتکەی سەر مشتاغ دەمی سبەینێ | هەزار ڕوتابی عەرەبی دێنێ |
| قلانگی سجووق بە تەنافەوە | سێ داخی ناوە بە دڵی جافەوە |
| پەڵووڵە باسووق بە بادامەوە | وا دیسان تامەتامەی دامەوە |
| چەکەرەی باسووق بیکەیتە ناو ڕۆن | هەر بیخۆ و بڵێ توخوا چۆنە چۆن؟ |
| زستان خۆشاوی مێوژ دەسکەوێ | خەفەتباریش بی خەمت ئەڕەوێ |
| ئەنجا با ناویان بڵێین سەربەسەر | من ئەیڵێم و تۆ بیخەرە دەفتەر |
| یەکەم «زوورەز» ە کە زوو پێدەگا | پێستی ئەستوورە هەروەک چەرمی گا |
| ئەمجا «مەفرە» و «زەڵکە» ئاودارن | بەڵام شیرین نین هەر مزرکارن |
| ترێ «سەعدانی» ڕەونەقی ڕەزان | بە لارولەنجە وا هاتە دووکان |
| حەرامە لە پاش سەعدانی ترێ | خرمەی زۆر خۆشە تێری لێ ناخورێ |
| بیخەیتە بەفراو بە چلەی هاوین | بۆ دەمێک ئەشێ خاڵ و میل ڕەنگین |
| دەم دەنکی نەگرێت تەنگ و نازدار بێ | ترێ ڕەش لە سای گەردنیا دیار بێ |
| بە نەشئەی ترێ کە چاو هەڵگیرێ | سۆفی و مەلا و شێخ لە دین وەرگێڕێ |
| ئاخ سبەینان زوو پێش هەتاو کەوتن | لەگەڵ نازداری سوراحی گەردن |
| بە لارولەنجە و غەمزە و نازەوە | بە وردەڕازی عەشقبازەوە |
| لەبن سێبەری مێوی سەعدانی | ڕاکشێی سەرت بکەیتە سەر ڕانی |
| سەیری ترێ کەی بە ژوور سەرتەوە | ئەو بە ناز ترێ بکا بە دەمتەوە |
| تالعی سەعدی لەگەڵ سەعدانی | «قران السعدين» تەواو بزانی |
| بەو عەشقە دنیا ئەبێ بە هی تۆ | ئەو شەوقەت نەبێ شێتی و ڕەنجەڕۆ |
| «چاوش ئوزومی» کەوا مەشهوورە | ئەم سەعدانییە، بەڵام ئەو دوورە |
| کشمیش «ئەزمیری» پێکوڕەی ئەمە | هەرچی پێ بدرێ هێشتا هەر کەمە |
| ترێ «تائفی» سەرقووڵەی لەڕە | «پاییزە» و «سووراو» ناخورێ بێ فەڕە |
| ترێ «سپیکە» خەرجی دۆشاوە | لە پاش سەعدانی ئەمجا ئەو باوە |
| «هندوی» و «کاژاو» و «سورشامی» و «رەشکە» | بە بار بیهێنە و لە خەڵکی بەش کە |
| «بۆڵ مازو» و «مسکی» و «مێخی» و «ڕەزاقی» | «گون تووڵە» و «کلکەڕێوی» و «عشاقی» |
| «نینۆکی بووکێ» و «شمیری» باشە | «چەمیلە» خواردنی دۆمی کڵاشە |
| «یاقووتی» و «زەردی» و «مام برایمە» | «شەقشەقە» و «فەرخی» پێستیان قایمە |
| ترێ «دەرە بۆڵە» و «گونکە» و «شیرازی» | بێتامن هیچکەس پێیان نابن ڕازی |
| «خۆشناو» ئەو کاتەی بەفری لێ باری | ئەوسا نایابە بیبەی بە دیاری |
| ئەمە بە تەنها ترێ کەمانە | هەرمێ و هەڵووژە و قۆخ دووچەندانە |
| قۆخێک لە پاریس بە دوو فرانقە | لێرە لەتکەقۆخ سەرمایەی بانقە |
| لە دەست نەزانین هەزار ئاخ و داخ | هێشتا تووتنمان نەبووە بە ساچاخ |
| ئاخ بۆ کەساسی، داخ بۆ کەساسی | خاکت ئەمەیە و کەچی نایناسی |
This work is first published in Iraq and is now in the public domain because its copyright protection has expired by virtue of the Law No. 3 of 1971 on Copyright, amended 2004 by Order No. 83, Amendment to the Copyright Law. The work meets one of the following criteria:
- It is an anonymous work or pseudonymous work and 50 years have passed since the year of its publication
- It is a work where the copyright holder is a legal entity or a work of applied art and 50 years have passed since the year of its publication
- It is a photographic or cinematic work that is not compositive (artistic in nature) first published before 1 January 1999
- It is work published in Iraq before 1 January 1954, and the author died before 1 January 1979
- It is another kind of work, and 50 years have passed since the year of death of the author (or last-surviving author)
- It is one of "collections of official documents, such as texts of international laws, regulations and agreements, judicial judgements and various official documents."
- It is the work of a body corporate, public or private, published by January 1st, 1980 (Article 20, 1971 law).
Public domainPublic domainfalsefalse