بادی عەترامێز
Jump to navigation
Jump to search
| بادی عەترامێز، بادی عەترامێز | بادی گوڵشەن گەرد، بادی عەترامێز |
| پەیک بەری عاشق، نیمە شەوان خێز | بۆی نافەی تەتار، نە ڕوی سارا ڕێز |
| چوون عەتار بە چین زوڵفی یارەوە | ئاما بە بۆی عەتر عەنبەر بارەوە |
| پەرسام ئەی عەتار، یە چێش بارتەن؟! | وات: «بۆی عەتری زوڵف گێسووی یارتەن»! |
| بە تەعجیل ویەرد نەکەرد مودارا | شی نە ڕووی دەشت و کەش و کۆو سارا |
| ساکە بۆی عەترت بە گوڵان یاوان | گوڵان خێزیان پەی عەزمی داوا |
| «سونبوڵ» چەنی تیپ «وەنەوشە»ی باخان | «چنوور» نەپای هەرد «شەوبۆ»ی سەرشاخان |
| قیبلەم تاسەحەر گوفتوگۆشان بێ | داوای هامشانی زوڵفی تۆشان بێ |
| ئاخر داواشان «تان و پۆش» نەبێ | هیچکام بۆی عەتری زوڵفی تۆش نەبێ |
| «سونبوڵ» ماتەم بی بەزاری و خەمناک | «وەنەوشە» جە شەرم، سوجدەش بەردەن خاک |
| «چنوور» پەشێو بی، دڵ بە دەردەوە | «شەوبۆ» شەیدا بی، شەو وە هەردەوە |
| فیدای زوڵفت بام ڕەندی جەمین لاڵ | زوڵفی تۆ بازاڕ گوڵان کەرد بەتاڵ |
| نەک سەودای زوڵفت خاسەی گوڵانەن | سەرمایەی داوای دەردی دڵانەن |
| ئانە کام دڵەن وێش بە دڵ زانۆ | جە سەودای زوڵفت پەشێو مەمانۆ؟ |
| ئەر شێخ، ئەر مەڵڵا، ئەگەر دەروێشەن | سەودای زوڵفی تۆ، گرد عالەم پێشەن |
| سەیدی چوون جە داخ تای زوڵفت وێڵەن | سادارو سەرسام بیابان گێڵەن |
| ساکە دێوانەن ئێدەن تەگبیرش | تای زوڵفی سیات بۆ بە زەنجیرش |
This work was published before January 1, 1929, and is in the public domain worldwide because the author died at least 100 years ago.
Public domainPublic domainfalsefalse