اك بويوك چينار

From Wikisource
Jump to navigation Jump to search

اڭ بويوك چنار
by توفيق فكرت

اڭ بويوك چنار


هانى بر گون سنڭله طوپقاپودن
كليوردق ؛ يول اوستو بر ميدان ،
بر چنار گوردك : اڭلى ، بويلى ، وقور
بر آغاج ؛ هيچ اگيلمه مش ، مغرور
قوجه بر گوگده ؛ بلكه آلتى عصر،
بلكه اوندن ده فضله ، دالغين ،آغير ،
قايغوسز بر عمر سوروب كلمش
اويله  سرپيلمش ،اويله يوكسه لمش
كه جوارنده قبه لر،داملر
سرتسر سجده كير استغفار
اونى خشيتله سير ايدر گبيدر .
دويولان هپ اونڭ مناقبيدر ،
گوروله ڭ هپ اودر اوزاقلردن ؛
فقط عيوقه سر چكن ، اوزانان
بو مهابتلى گوگده چيرچيپلاق ،
نه يشيل بر فيليز نه بر ياپراق ...
قورويور آه پك يازيق ! شو درين
شرحه ، باغرنده بلكه بر خائن
بالطه نك ، بر غضنلى ييلديريمڭ
زهريدر ... سويله اى چنار ، باغرڭ
هانكى اودلرله ياندى ؟ هانكى سياه
قوردايچڭدن كميردى ؟ خسته ، نبات ،
سنى كيم شيمدى باغلايوب صاراجق
كيم شفالر ويروب ده قورتاراجق ؟
شو دونن قارغالر باشنده سنڭ
سويله ، بونلرميدير زهرله يه نڭ ؟
سويله اى مضطرب وطن ، بيلدير ؛
چكديكڭ هانكى سيۀ در ؟

توفيق فكرت