Jump to content

استقلال مارشی

From Wikisource

←
استقلال مارشی
by محمد عاكف
→
85191استقلال مارشیمحمد عاكف

استقلال مارشی


قورقما سونمز بو شفقلردە یوزن آل سنجاق
سونمەدن یورديمك اوستنده توتن اك صوك اوجاق
او بنم ملتمك ییلدیزیدر پارلایەجق
او بنمدر او بنم ملتمكدر آنجاق

چاتما قربان اولایم چهرەكی ای نازلی هلال
قهرمان عرقمە بر كول نە بو شدت بو جلال
سكا اولماز دوكولن قانلرمز صوكرە حلال
حقیدر حقە طاپان ملتمك استقلال

بن ازلدن بریدر حر یاشادم حر یاشارم
هانکی چیلغین بكا زنجیر اورەجقمش شاشارم
كوكرەمش سل كبی‌یم بندیمی چیكنر آشارم
ییرتارم طاغلری انكینلرە صیغمام طاشارم

غربك آفاقنی صارمشسە چلیك زرهلی دیوار
بنم ایمان طولو كوكسم كبی سرحدم وار
اولوسون قورقما نصل بویلە بر ایمانی بوغار
مدنیت دیدیكك تك دیشی قالمش جاناوار

آرقداش یوردیمە آلچاقلری اوغراتمە صاقین
سپر ایت كوكدەكی طورسون بو حیاسزجە آقین
طوغەجقدر سكا وعد ایتدیكی كونلر حقك
كیم بیلیر بلكە یارین بلكە یاریندن دە یاقین

باصدیغك یرلری طوپراق دییەرك كچمه طانی
دوشون آلتندەكی بیكلرجه كفنسز یاتانی
سن شهید اوغلیسین اینجیتمە یازیقدر آتاكی
ویرمە دنیالری آلسەك دە بو جنت وطنی

كیم بو جنت وطنك اوغرینە اولماز كە فدا
شهدا فیشقیرەجق طوپراغی صیقسەك شهدا
جانی جانانی بوتون واریمی آلسین دە خدا
ایتمسین تك وطنمدن بنی دنیادە جدا

روحمك سندن الٓهی شودر آنجاق املی
دكمەسین معبدیمك كوكسنە نا محرم الی
بو اذانلر كە شهادتلری دینك تملی
ابدی یوردیمك اوستندە بنم ایكلەملی

او زمان وجد ایلە بیك سجدە ایدر وارسە طاشم
هر جریحەمدن الٓهی بوشانوب قانلی یاشم
فیشقیرر روح مجرد كبی یردن نعشم
او زمان یوكسلەرك عرشە دكر بلكە باشم

دالغالان سن دە شفقلر كبی ای شانلی هلال
اولسون آرتق دوكولن قانلریمك هپسی حلال
ابدیا سكا یوق عرقمە یوق اضمحلال
حقیدر حر یاشامش بایراغمك حریت
حقیدر حقە طاپان ملتمك استقلال


محمد عاكف

Modern Turkish: İstiklal Marşı