اذانلر
| اذانلر محرری: محمد عاكف |
« اختلاف مطالع سببيله كره اوزرنده
اذانسز زمان يوقدر. »
زمان كچمزكه يوزبيكلرجه قلبك وجد سكرانى
زميندن يوكسلوب، كوكلرده وحدتزار يزدانى
آريركن، دهشت آكين ايتمسون بر صيحه وجدينىى.
نه لاهوتى صدا « الله اكبر !» صارصيور جانى..
بو بر كلبانك حقدر، چوقميدر ايكلتسه اكوانى؟
بو لاهوتى صدا چقدقجه جوشاجوش اولوب يردن،
اينر اسرار قدرت كبريا طوريله كوكلردن.
بوتون آهنك خلقت ياد ايدركن حقى ازبردن،
وجاهى فيض آلير آرتيق او نورلنور ازهردن:
هويدا شيمدى جاناندر سحردن، شام اسمردن!
سحر وقتنده موجودات، نوشين خواب ايچندهيكن،
بو روحانى نوا آفاقى موجا موج ايدوب بردن؛
محيطك قلب خاموشنده باشلار بر حزين شيون.
باقارسك هر طرف ظلمت، فقط بر ظلمت روشن!
سما بيدار، هر ييلديز جمال اللهه برروزن!
معيشت قيد جانفرساسنك محكوم بيزارى
اولان بيچارهلر كوندوز بو ياد مرحمتكارى
طويار سرمسد اولور كورمش قدر فرداى ديدارى!
او نشوهيله، يورولمق شويله طورسون، اك آغيربارى
سوروكلر كورمهدن، كوسترمهدن ييلغينلق آثارى.
كونش مغرب كزين اولمش، سما اسمر، افق كلكون؛
زمان طورغون، زمين مغبر، دمبسته، جان محزون؛
غريبلك رونما يرير، سكونت دمبدم افزون..
باقارسك بر ده كلبانك الهيدن طولوب كردون،
او تنهايئ سوداوى اولورالله ايله مسكون!
محمد عاكف