ئیبتیدا بە نام پادشای قەههار
Jump to navigation
Jump to search
| ئیبتیدا بەنام پادشای قەههار | خال المخلوق شای ليل و نهار |
| ئەی شیعرە نویسنام وەدڵێ زامدار | کیانام پەرێتان یاران دیندار |
| هەر پۆسەن بازاڕ شای پەروردگار | ناز چەنی نیعمەت مەدۆ وە حیمار |
| هەر کۆ دانا بۆ زەبوون بییەن زار | وەدەست نامەرد بییەن گرفتار |
| حەیا دار دایم بییەن شەرمەزار | وەدەست بێ حەیا زەلیل و زگار |
| هەزار شکایەت نمەیۆ وەکار | مەبۆ قانیع بی وە چار و ناچار |
| حەیا و حورمەت نەیجا کەردەن بار | پارە نمەکۆ سەد داد و هاوار |
| بزان چۆن مەبۆ سەر ئەنجام کار | نە ئەی دار بید ورچنین ئەثمار |
| مەعلووم پێنج سەدەن هەم نیمەی هەزار | هەر چەند حەساو کەی هەر ئێدەن شومار |
| بێ شەوق و بێ زەوق دڵم پڕ چە نار | کەی خەڵاس مەوین جەی زیندان تار |
| یەکا یەک کۆچ کەرد یاران سالار | هەر من مەندەنان چە ئەی شۆن هەوار |
| مەگەر چە ئەلتاف پادشای جەببار | چە ئەی خانەی کفر کەرۆم ڕستگار |
| مەنزڵمان دوورەن هەم گرانەن بار | هیچ نمەتاوۆش ئەی لەش مردار |
| فیرقەی یارستان گشت بییەن وە مار | بەدی یەک مەکەن ڕۆژێ هەزار جار |
| ئاشنای ئەزەڵی گشت بییەن وە غار | بێگانەی ئەبەد بییەن تاعەت کار |
| زوڵم فراوان بێ حەد و شومار | ڕێزیان وەهەم گشت پێشە و دەمار |
| عەجەب وەخیمەن سەرئەنجام کار | کەی ئیسڵاح مەبۆ ئەهل ئەی دیار |
| ئەمنییەت لوان نەمەند ئیعتیبار | جەوە لخصیانەن جەمیعی ئیقرار |
| هەر پۆسەن کردار چەرخ کەچ ڕەفتار | داخڵ بیەنمێ هەم وە ساڵ مار |
| ها چە چوار قوڕنە پەیدا بی کوشتار | ڕستاخێز سەخت هەم قەتڵ و قەلار |
| بەشەرمان مەغروور ساحێبەلوقار | سەد دادم چە دەست میللەت ئەشرار |
| مین بەعد چەند ڕۆژ ليس فيه ديار | جمع الاراضي مەبۆ وە بەیار |
| حەکیم حازیق دەرد مەکۆ تیمار | بەڵێ چە ئاخر سەرەنجام کار |
| هەم سەبر و سەبات لازمەن ئەمجار | تەسلیم بی وەهەق هەم وە گەردەن لار |
| چە دەست مەلعوون ئەی نەفس زۆردار | وەرنە مەحاڵەن ببین ڕستگار |
| وە شەرتێ خودا چەنیت ببۆ یار | سەر حرس و نەفس بڕێزنی چون مار |
| ئەر چە دەست بەرشۆ لغام و ئەفسار | وە ڕاگەی غەڵەت مەکەرۆت ئیجبار |
| ئەر قەناعەت کەی دڵ مۆ چون بەهار | کۆتا خزمەتەن مەرد تەمع کار |
| نەسیحەت ئێدەن برای خۆش ڕەفتار | دڵ ئازار نەوی چەی حەرف و گفتار |
| سەر بڵندمان کەی چەنام یار و غار | سڕ هەقیقەت نەکری ئیزهار |
| ئەر سلووک کەری وەڕای بەد ئەتوار | عزیەتت مەدان وە فەلاقە و دار |
| هەر کەس وەهەق کەردەنش ئیقرار | مەبۆ کەرۆ تەرک هەم نامووس و عار |
| ئەر وێنەی مەنسوور بکەراش وەدار | دروغ گۆ نەبۆ ڕاست باچۆ گفتار |
| چە ڕۆژ ئەزەڵ چە سەبت تۆمار | هەرچی نویسیا بۆ یەک یەک مۆ ئیزهار |
| عين القلب مەسدوود غريب الديار | چە دەستم بەرشی یار وەفادار |
| ئەڕاگێڵەنان نە دەشت و کۆسار | مەست لا يعقل بە وێنەی خەمار |
| بە زوودی بەرشیا ئەو چاپووک سوار | من مەندم وەجا پیادە و ناچار |
| چە ماهـ نەورۆز یام چە پەنج و تار | ئومێد هەن وینۆم چە نۆ دیدەی یار |
| دڵ کامیاب بۆ چە وەسڵ دڵدار | مەبۆ خاوەن ماڵ گێڵۆ پەی خەوار |
| مەگەر ساحێبم لێم بییەن بێزار | مەدۆم وە خۆراک گورگان خونخار |
| بەندە بێزار نیم چە نۆشای ئەی ژار | چەی زەمانەی سەرد دڵ کەردم عەمار |
| تەعنە مەدۆ لێم صیغار و کیبار | چە دەست ئەی میللەت چون سەگ هۆشیار |
| مەگەر وە هیممەت پادشای کەرەمدار | کەرەم کەرۆ پێم حەوسەڵەی بسیار |
| ئافاق پڕ بییەن چە شۆرشت و نار | یاران حفظ کەرۆ خودای نیگەهدار |
| لاهوورەن شەهرم بکیانە میعمار | وەقتەن خەڵاس بین چەی زوڵمات تار |
| سەد فەلاقەت کەن وەدار هەنار | چە ڕای هەقیقەت هیچ نەوی شکدار |
| عەجەب چەواشەن یاران هۆشیار | شانس هاتە مەیدان فەوتیان بەختیار |
| چە حاڵ و ئەحواڵ بکەرەم ئیخبار | ئەگەر ڕەحمت بۆ چە مانگێ دوو جار |
| وێنەی مەولەوی کو مەکەم ئەشعار | ئەمما چ فاییدە نییەن خڕیدار |
| بازاڕم کەساس نەمەندەن توجاڕ | بفرۆشی وەنەش دانەی قیممەت دار |
| چە کونج خەڵوەت وەقت مەکەم ئیمرار | خاستر چە نیشتەی قەسر زەڕ نیگار |
| گەوهەر شوناسان بییەن نادیار | هام فەردم نەمەند چەی دونیای غەددار |
| نەفس موتمەئین کەردەنش فیرار | چە دەست حیرس و نەفس وێش دان چە پێوار |
| ئابڵۆقەمشان دان یەمین و یەسار | نەفس ئەممارە مەکۆ ئینحیسار |
| وەقین و وەقار چەند مەکەم ئینذار | لەشکر بەدان حازرەن ئیحضار |
| یەکسەر کینە جۆ هامسا و هام جوار | عاقبت الامر تەخریب مۆ عەوار |
| ئەوەڵ وە ڕەجای شای بوراق سوار | دوەمین وە ئیمداد ساحێب زولفەقار |
| نەجاتمان بدۆ چە شەرارەی نار | زەلیلمان نەکۆ وەدەست کوففار |
| قسە هەزارە دوان دێتە کار | پەنجا و نۆ مەسرەع کەردم ئیختیسار |
1947
This work is first published in Iraq and is now in the public domain because its copyright protection has expired by virtue of the Law No. 3 of 1971 on Copyright, amended 2004 by Order No. 83, Amendment to the Copyright Law. The work meets one of the following criteria:
- It is an anonymous work or pseudonymous work and 50 years have passed since the year of its publication
- It is a work where the copyright holder is a legal entity or a work of applied art and 50 years have passed since the year of its publication
- It is a photographic or cinematic work that is not compositive (artistic in nature) first published before 1 January 1999
- It is work published in Iraq before 1 January 1954, and the author died before 1 January 1979
- It is another kind of work, and 50 years have passed since the year of death of the author (or last-surviving author)
- It is one of "collections of official documents, such as texts of international laws, regulations and agreements, judicial judgements and various official documents."
- It is the work of a body corporate, public or private, published by January 1st, 1980 (Article 20, 1971 law).
Public domainPublic domainfalsefalse