أكْرم العرب

From Wikisource
Jump to navigation Jump to search

يوم من الايام نتحدثوا مع الشيخ الشاذلي بن الحطّاب على الجود والكرم والخصايل الزينه اللي كانوا تفردوا بيهم العرب في ايام عزهم ونخوتهم؟ حكى لنا حكايه على جود العرب وعلى التواضع متاعهم. قال في زمان المتقدم كانوا ڤيّاد النجوع ـ كل نجع يحكم فيه ڤايد؟ وكانت عندهم سطوه وهيلوله ـ ثمه ڤايد متع نجع مشى نهار يزور في الڤايد منع نجع آخر (كيف ما نقولوا ڤايد الهمامه مشى يزور في القايد في المثاليث) شاع الخبر في النجع، وسمعوا الناس الكل وحضروا لو وطق وفرشوه بافخر الزرابي؟ والحراير؟ وذبحوا، وحضرت القصاع بالمسلان ـ وتلم الميعاد وحضروا الفرسان وخلط القايد هو وجماعته وضرب الطّبال وتكلّمت المكاحل وقام الزغاريط؟ وقبلوه كيف ما يعرفوا العرب يقبلوا الضيف. وفرح بيه الڤايد متع هاك النجع هذاكه ودخله للوطق وقعدوا. هاو هاك الڤايد؟ عندو ولد خوه، يتيم قلّيل ربي العالمين ما عندو الا أمه عزوزه قاعده في تركينه؟ ساكن في بيت شعر قديمه بكلها رقع والريح داخل لها من كل فجّ؟ هاك الولد وامه؟ اذا كان فطروا ما يتعشّاوا واذا كان تعشّاوا ما يفطروا ـ وعمّه ڤايد نجع في الخير يخلّط ويضرب يصرع؟ حتى ولّى عمه يستعار بيه.. نهار اللي جا الضيف؟ قال لها: يامي: اليوم لقيت الضّربه لعمّي، اليوم نمشي نخطبه في بنته ياوليدي يزّي من الهبال ـ تخطب بنت عمّك، منين تنجّم تطولها؟ بوها جبّاري صعيب، قلبه أقوى من الصوّان ، توه يعمل فيك بعض العمله؟ قال لها: نحبّ نشوفه يحشمشي قدّام الضيف متاعو. هم قاعدين وهذا الصعلوك من صعاليك العرب داخل عليهم؟ الساق الحافيه، والراس العريان؟ ملفوف في برنوس (كلى عليه الدهر وشرب)؟ سلّم عليهم؟ كبّ على الضيف كبّ على عمو؟ وقال لو: يا عمّي: جيتك خاطب راغب في بنت الحسب والنسب. قال آه، الكلبه ابن الكلب، تخطبني في بنتي يا قليل الحيا يا ميّت بالشر؟ هبطوه للعصاء، هاك العثمثميّه متاعه واقفين (البلاء يتناطر من عنيهم) طاحوا عليه: يقص يد اللي ما تضربش حتى رضرضوه؟ هزّوه دايخ في حصيره هم خرجوا بيه؟ والقايد الضيف ركز يديه في القاعه وقام؟ دوّر صبّاطه وقال لجماعته أيا نروّحوا ـ آشنوّه تروّحوا؟ مازلتوا كيف جيتوا؟ ما سخّنتوش بقعتكم؟ هذه سفاله ماش تعدّيها علّي؟ ماش تطيّح لي قدري ما بين العروش وتقعد حديث لوالد الولد؟ آشنّوه السبب؟ آش ثمه؟ هذه موش من عوايد العرب؟ قال لو: ما ننجمش نقعد. علاش؟ قال له: من عوايد العرب ابنادم ما يتّحقرش؟وعمري ما سمعت: اللي يجي يخطب يعطيوه طريحه. قال له: لكن ما عندو شيء. واحد سارح يخطب بنات الڤياد؟ قال له: على كل حال لا تطرده لا تضربه، ما عليك الاّ تغلّي عليه المهرـ وكيف يلقاها لحمه أكبر من فمّه؟ هو يسلّم وحدو، أي مليح اقعد: قال له: لا، ما نقعد ونضيف عندك (وضيافه النبي ثلاثه ايام) الا ما تبعث له ويعاود الخطبه متاعو واشرط اللي تحب. قال: مليح يا سيدي ـ ابعثوا جيبوه الآخر وصّلوه جنازه للبيت؟ وامه تبكي وتمسّد فيه بالزّيت وهو مافي عينو بلّه؟ خلطوا الصبايحيه قالوا: الڤايد يعيّط له. آش يعيّط له (الولد ماش يموت)؟ قالوا لها: الڤايد يعيّط له؟ يلزم نهزّوه. أيا حل عينيه؟ قالوا له: أيا. قام يكبكب (4) معاهم (وحالته حليلحه)؟ ايا دخل على الميعاد؟ قال لو: عمّه: آشنوه اللي قلت لي توا مشوار؟ قال لو: جيتك خاطب راغب في بنت الحسب والنسب. قال له: تقبل شرطها؟ قال له: آشنوه الشرط؟ قال له: شرطها ماية ناقه بيضاء، وكلّ ناقة حملها جنس، طبّس راسه الولد وخرج: ايه: قال له: هكه نعرف انا ـ كان جاب الشرط ياخذ الطفله؟ وكان ما جابش يمشي على نفسه. قال له: منين يجيب والا بقدر على هذا الشرط؟ عشاه ليله مايكسباهش. أيا ضاف عنده هاك الڤايد ثلاثه ايام؟ بقّاه بخير وجاء مروّح؟ نشد؟ دلوه على بيت هاك الولد؟ عرّج عليها في ثنيته ـ يلقاه قاعد يرقّع في هاك الحرام متاعه والعجوزه بحذاه.. السلام عليكم ـ وعليكم السلام؟قال له: مازلت شادد في بنت عمك تحبّ تاخذها؟ قال له: ياسيدي منين عندي أنا باش ناخذها؟ ياخي الشرط متع عمّي ننجّم نقدر عليه؟ قال له: ليلة اللي يستهل الهلال مته الشهر الجديد ايجى لمفرق الثنايا الفلاني تلقى المشروط متع بنت عمّك ونزل على الحصان متاعه وشد الثنيّه. الولد قعد يحسب فيهم بالليله والنهار. ليلة الميعاد ، هزّ معاه اثنينه من اصحابه وقال: ياللي ما تخيّب قاصدك. وصلوا لمفرق الثنايا؟ ما لقاوا شيء. يخزروا، يخزروا في هاك الليله؟ حتى لقاوا قصعه محطوطه في الطريق؟ هزّ المكبّ يلقاه كسكسي ولحم وحلاّب اللّبن بحذاه. قال: ايا يا لاولاد؟ المعروضه مبروكه على كل حال. كل حدّ ثنى ركبه وقعد؟ كلاوا حتى عرفوه هوّ. تحمّدوا وتشكروا؟ واذا بيه هاك الڤايد جاي؟ قربه ما على كتفه: بالشّفاء ليكم؟ أيّا نصب عليكم يديكم. كيفاش يا سيدي؟ انت ڤايد نجع تصب عليها( احنا ايتام وما ترضاش بينا حتى خدّامك) قال: عظّمت الله الا ما نصبّ عليكم ـ انتم اضيافي الليله ـ وانا خديمكم. بعد ما كمّلوا قال لهم: ايا بخاطركم ـ واستنّاوا شويّه وتخلط البّل واحسب ـ وهز لعمك شرط بنتو وان شاء الله بالبركه وزواج العمر ويرزقكم ربي ذرّية الحلال ومشى. بعد بشويه يشوفوا في قافله من البلّ جايه ـ بدا يحسب بالناقه، بالناقه: واحده، اثنين، ثلاثه، خمسطاش، سته وثلاثين ـ وكل ناقه هاززه حمل. هاو هاك الڤايد عنده بنته ـ ومما يكسب الا هيّ... سمعت اللي بوها قاعد يلم في ميات ناقه وناقه. ويجيب في الفرارش والزرابي والحراير، والصّياغه، وكل ناقه ماش يعبّي لها الحمل متاعها جنس ـ وقاعد يصرّف في فلوس يا فلوس؟ قالت: هذا بابا ماش يعرّبنا ليله اللي تهزوا الحمول وخرجوا الوصفان يسوقوا في البل؟ لبس راجل وهزّت سيف وركبت على الحصان وشدت الثنيه. حتى وصلت لمفرق الثنايا؟ تلقى الوصفان وصّلوا البل وومروّحين؟ وهاك الولد واصحابه يسوقوا في القافله. رمات النّقاب وتعرضت لهم في راس القابله وقالت: زوّزوا البل، ( هذه الكلمه هذيه يقولوها القطعّيه وقت اللّي تبع ضوّ القافله؟ معناه: ابعدوا على البل والا على الخيل والا على الغنم: ماش نسوقوهم) قالت: زوّزوا البل. يافارس ابعد على نفسك؟ يا فارس عيب عليك؟ احنا اضياف؟ برّنيه؟ قالت: زوّزوا البل والا الّيله نلعب بروسكم. الولد عقل صوت امراء ـ وفهم اللي موش قطعي؟ ولازم من جهة الڤايد (وفي هاك الزمان يفهموا على الارماش تلفّظ وقال: يد ان عطات تستاهل العطاء ويد ان عطات يصعب رديدها الا جواد يهديوا من التبن اذا غلاء ولا لياش شربه من الماء تكيدها وقتها الطفله رجه لها شاهد العقل وتغلّب عليها كرم العرب وحشمت؟ وقالت سامحني يا اخا العرب: بابا هدالكم ميات ناقه وناقه بيضاء وانا فرسي الكبير نزيدها ونزلت على الفرس متاعها هبطت وقالت له: اتفضل اركب ـ حرام علّي حلال عليك باش ما يقولوش العرب، اللي ضيف جاء لها النجع وروّح خايب.. وبقّاتو بخير وركب على الفرس ونده القافله وروّح خذا بنت عمو...