آفرینیم همت والای ستارخانه‌دیر

From Wikisource
Jump to navigation Jump to search
آفرینیم همت والای ستارخانه‌دیر
یازار: میرزه علی اکبر صابیر


«حال مجذوبیم گؤروب قاره؛ دئمه دیوانه دیر
نعره ی شوریده می ظن ائتمه بیر افسانه دیر

شاعرم طبعیم دنیز، شعرِ تریم دردانه دیر
بهجتیم، عشقیم، سروریم، وجدیم احرارانه دیر

انجذابیم جرأت مردانه ی مردانه دَیر
آفرینیم همتِ والایِ ستّارخانه دیر

  • * *

تا که ملت مجمعین طهرانده ویران ائتدیلر
تورک لر ستّارخانیله عهد و پیمان ائتدیلر

ظلم و استبداده قارشی نفرت اعلان ائتدیلر
ملته ملّیته جان نقدی قربان ائتدیلر

آیه ی «ذبح عظیم» اطلاقی اول قربانه دیر
آفرینیم همتِ والایِ ستّارخانه دیر

  • * *

حق مددکار اولدو آذربایجان اتراکینه
آل قاچارین «پروتست» ائتدیلر ضحاکینه

اول شهیدانین سلام اولسون روانِ پاکینه
کیم تؤکولموش قانلاری تبریز و طهران خاکینه

اونلارین جنت دگیل دیر منزلی آیا نه دیر
آفرینیم همتِ والایِ ستّارخانه دیر

  • * *

ایشته ستّارخان باخیز بیر نوعی اقدامات ائدیب
بیر وزیر و شاهی یوخ! دونیانی یکسر مات ائدیب

عرض اسلامی، وطن ناموسینی یوزقات ائدیب
حرمت حیثیّت ملّتین اثبات ائدیب

ایمدی دنیانین توجه نقطه سی ایرانه دیر
آفرینیم همت والای ستّارخانه دیر

  • * *

ایشته آذربایجان ایرانی احیا ائیله دی
تورک لوک؟ ایرانلی لیق تکلیفین ایفا ائیله دی

بیر رشادت، بیر هنر گؤستردی دعوا ائیله دی
دولتین بیر عینی نی دونیاده رسوا ائیله دی

قاچماییب پروانه تک اوددان دیمه پروانه دیر
آفرینیم همت والای ستّارخانه دیر

  • * *

آفرین تبریزیان ائتدیز عجب عهد و وفا
دوست و دشمن ال چالیب ائیله رسیزه صد مرحبا

چوخ یاشا دولتلی ستّارخان! افندیم! چوخ یاشا
جنت اعلاده پیغمبر سیزه ائیلر دعا

چون بو خدمتلر بوتون اسلامه دیر، انسانه دیر،
آفرینیم همتِ والایِ ستّارخانه دیر