Өмөт. М.Аҡмулла

Өмөт
автор Мифтахетдин Аҡмулла (1831—1895)

Ҡара Йөкмәтке. Сығанаҡ: Әхәт Вилданов. Аҡмулла. Шиғырҙар. — Өфө: Башҡортостан китап нәшриәте, 1981. — 224 бит. • Аҡмулла сайты

Википедияла мәҡәлә

Өмөт*

Йәнгә рәхәт, дуҫ-иштәрең бер хат яҙһа,

Йән-йәрәхәт, көпә-көндөҙ ир-ат аҙһа.

Ажар дошман үҙ башына үҙе етер,

Әгәр һиңә хаслап тороп бер баҙ ҡаҙһа.

Фани донъя - ҡыйыш юл ул борғоланған,

Ҡыйыш булһын, ҡыйын булһын - юлсы барған.

Юл ауыр, тип, мин - бахыр, тип, туҡтап ҡалма,

Өмөтөңдө өҙә күрмә истиҡбалдан!

Ат атлыҡмаҫ арпаның һаламына,

Булма юлдаш дуҫтарҙың яманына.

Юлдаш булһаң дуҫ күренгән монафикҡа,

Ташлап китер дошмандың табанына.

Аңлатмалар

«Өмөт». Ф. Фәизовтың «Ағиҙел» журналының 1967 йыл 2-се һанында баҫылған «Бер әбей әйткән юлдар» исемле мәҡәләһенән алынды. Исеме йөкмәткеһенә ҡарап бирелде.

Иҫкәрмәләр