Ӟеч лу, мусо туганэ! (Кедров)

From Wikisource
Jump to navigation Jump to search
Ӟеч лу, мусо туганэ!
Автор: Филипп Григорьевич Кедров
Кылдытон дыр: 1944. Источник: Кедров Ф. Г. Катя: Кылбуръёс но повесть / Дасяз но азькыл гожтӥз А. А. Ермолаев. — Ижевск: Удмуртия, 1989. — С. 45—46. — 112 с. — («Школьная библиотека»).

Ӟеч лу, мусо туганэ!


Куазь чалмыт, ин пеймыт котырак,
Бубыли кадь лымы весь усе небытак.
Юг-тӧдьы халатэ пельпумам,
Зол возько пыӵалме юн киям.

Пукисько мон траншея пушкын,
Пумйылтэм малпаськон йырвизьмын.
Син азям пукиськод, туганэ,
Азьлолэсь но чебер тон туннэ.

Мычисько азьлане киосме,
Ӟыгыгыртӥ, чупасько мон тонэ.
Пальпотӥд но чебер ӵыжектӥд,
Собере монэ юн ӟыгыртӥд.

Немчура пулемёт тачыртэ,
Пуляос шулало дугдытэк.
Пуштыло снарядъёс, минаос…
Йырвизьмын бергало малпанъёс.

Сьӧсь тушмон, бырондэ шӧдӥськод,
Со шоры кышкаса учкиськод,
Малпаськод пегӟыны тон солэсь,
Но уд мозмы шимес кулонлэсь.

Дась лу, эше, азьлань мыныны
Дыр вуиз асьмелы ваньмылы,
Кылӥськод-а, кырӟа «катямы»,
Сьӧдкылез пазя снарядмы.

Ӟеч лу, ӟеч лу, мусо туганэ,
Нош бое султӥсько мон туннэ.
Выль ивор мон ысто бой бере,
Мон понна юнме эн кайгыре.


7 феврале 1944 арын


Public domain
This work is in the public domain in countries where the copyright term is the author's life plus 70 years or less. See Copyright.