Әлдә әле һине осратҡанмын …Фирүзә Абдуллина.

Әлдә әле һине осратҡанмын … (шиғыр) автор Фирүзә Абдуллина

Ижад итеү ваҡыты: 2013.. Нәшер ителгән: 09.12.2014.. Сығанаҡ: “Бәйләнештә” сайтындағы “Ғәжәп донъя” төркөмөнән.

* * *

Әлдә әле һине осратҡанмын
Йәшлегемдең аяҙ көнөндә.
Осрашыуҙар, ҡауышыуҙар менән
Йәшәү матур донъя йөҙөндә.

Әлдә әле һине һайлағанмын
Күптәр араһынан иш итеп,
Фәрештәләр беҙҙе осраштырған
Минең һағышымды ишетеп.

Әлдә әле һине яратҡанмын,
Әлдә түгел һинән башҡаны,
Һинең менән бәхет ҡар яуғаны,
Таң атҡаны, ҡояш батҡаны.

Әлдә әле һин янымда һәр саҡ,
Мөлдөрәмә тулы бәхетем,
Әлдә генә әле, әлдә генә
Мәңгелеккә һине йәр иттем.

---