Ҡайтарығыҙ үҙебеҙгә

From Wikisource
Jump to navigation Jump to search

Ҡайтарығыҙ үҙебеҙгә! (шиғыр)
автор Лилиә Һаҡмар (Лилиә Ҡәйепова)
Сығанаҡ: Көмөш йөҙөк: шиғырҙар йыйынтығы (төҙөү-туплау — Г.Ғиззәтуллина). —Өфө: Башҡортостан "Китап" нәшриәте, 1997. —320 бит.(163-164-се биттәр) ISBN 5-295-02278-1


ҠАЙТАРЫҒЫҘ ҮҘЕБЕҘГӘ!


Аҡ болоттар,
                һоро йорттар,
                                  ҡара ерем,
Күҙҙәремде ҡамаштырыр зәңгәр күгем...
Барыһын да күрәм,
                             беләм,
                                  тоям да ул,
Барыһын да,
Тик хужаһы үҙем түгел…
Илем, тиеп ауыҙ асһам,
                                       илкәйемде
Тартҡылайҙар йылы тәхет хужалары.
Ерем, тиһәм, сәскә генә үҫер ерҙе
Телгеләгән хужаһыҙлыҡ межалары...
Халҡым, тиһәм,
                      һин икенсе,
                                    һин ят тиҙәр,
Бары беҙҙең йырҙы ғына йырлат, тиҙәр.
Урлағанда йырҙарымды моңһоҙҙары
Тарих саңын көл-күмергә болғаттылар...
Оят, тиҙәр,
              уят тиҙәр, йөрәгеңде!
Ә ул күптән туҡтаған бит йәшәүенән.
Эйе, тибә,
               тик йәне юҡ,
                                һис ғәме юҡ,
Гүйә бала, айырылған әсәһенән...
Әй болоттар, ашыҡмағыҙ әле улай,
Туҡталығыҙ!
Бер бағығыҙ еребеҙгә!
Илтегеҙсе барыбыҙҙы
                              ситкә түгел,
Ожмах түгел,
                    алтын-көмөш илгә түгел,
Илтегеҙ һеҙ беҙҙе аяҙ күгебеҙгә,
Йортло,
          телле,
                намыҫлы,
                           саф көнөбөҙгә!
Ҡайтарығыҙ үҙебеҙҙе үҙебеҙгә!
Үҙебеҙгә!




CC SomeRightsReserved.png
Cc-by white.svgCc-sa white.svg
This work is licensed under the Creative Commons Attribution-ShareAlike 3.0 Unported license.
Heckert GNU white.svg
Permission is granted to copy, distribute and/or modify this document under the terms of the GNU Free Documentation License, Version 1.2 or any later version published by the Free Software Foundation; with no Invariant Sections, no Front-Cover Texts, and no Back-Cover Texts. A copy of the license is included in the section entitled GNU Free Documentation License.