Ғаиләм ҡосағы. Тамара Искәндәриә

From Wikisource
Jump to navigation Jump to search

Ғаиләм ҡосағы (Шиғыр)
автор Тамара Искәндәриә


Ғаиләм ҡосағы


Томанлы эңере…
Иртәнге ысығы…
Иркәләп уятҡан
Ғаиләм ышығы.

Наҙ бирҙе, йәм бирҙе
Һөйөүең ҡосағы.
Гөлт итеп тоҡанды
Ғаиләм усағы.

Ҡоштар ҙа парлашып
Күктәрҙә кәйелә.
Ирекле, шәфҡәтле
Бер бөтөн ғаилә.

Елдәрҙән һин һаҡла,
Һөйөүем усағы!
Һин йәнем ышығы,
Ғаиләм ҡосағы.