Яңы Йыл был

← Ырғыҙ буйы

Яңы Йыл был (Шиғыр) автор Лилиә Һаҡмар

Барыһы ла яҡшы булыр →

.Нәшер ителгән: 2006. Сығанаҡ: Һаҡмар Л. Эстафета: Шиғырҙар, поэма. – Өфө: Китап, 2006. – 176 бит. (139-сы бит) ISBN 5-295-03798-3

ЯҢЫ ЙЫЛ БЫЛ!*

Яңы Йыл был, өр-яңы йыл –
Бишектәге йылы сабый,
Ай үҫәһен көн үҫер ҙә
Арғымаҡҡа менеп сабыр!

Үҫтерәйек әкиәт һөйләп,
Бишек йыры йырлап ҡына,
Үтһен елеп, шаян елдәй,
Ҡолонсаҡтай уйнап ҡына.

Өр-яңы йыл – наҙлы сабый,
Ҡайнар күкрәгемә ҡыҫам:
Илгенәмә бәхет илтер
Ырым ғәйрәтеңә ышан!

Яңы Йыл был, өр-яңы йыл –
Килһен йырлап, килһен көлөп,
Йәшәйексе иң бәхетле
Иң шатлыҡлы көндәр күреп!

Сабый кеүек ҡыуанайыҡ,
Яңғыратып еңеү көйөн,
Яҡтылыҡҡа, бәрәкәткә
Тулһын илем, ерем, өйөм!

---

Иҫкәрмәләр

• Шиғырҙың тулы варианты
• Авторҙың башҡа әҫәрҙәре Author:Лилиә_Һаҡмар