Якстере теште/1924/39/Лия масторга

Якстере теште, № 39, 24 декабря 1924 г. редактор Глухов, Пётр Семёнович
Лия масторга

Якстере теште. Еженедельный орган Мордовской секции при Ц. К. Р. К. П. (б.). — № 39, 24 декабря 1924 г. — с. 1

[ 1 ]

Лия масторга.

Парижсэ Советань зданияньть (кудонть) вельксцэ кепецть якстере флаг.

Декабрянь 14 чистэ, Франциянь столицясо — Парижсэ — СССР-онь посольстваньть вельксцэ кепецть якстере флаг.

Те праздникеньтень Красин ялгадонть башка сакшность: Раковский ялгась (англиясо посланникенок) Скобелев ялгась (минекь торговой представителенок Франциясо), Московской Советонь делегациясь и французской коммунистической партиянь представительтне.

Красин ялгась евтась истямо вал:

Сисемь иеть ютасть се шкастоньть, знярдо Россиянь пролетариатось ердызе инязоронь ды буржуень властеньть. А ней весе государстватне ловсызь Советской властенть виде законной властекс.

Франциясь весемеде кувац букакс лангозонок ваннось ды карчонок мольсь. Ней сон-гак кармась мартонок дружнасто эрямонь ладямо.

Франциянь признаниясь эряви ловомс Советонь покш победакс (изнямокс).

Чумбрасто эряст сокицятне ды робочейтне. Чумбра ды кеме улезэ СССР-онь правительствась.

Не валтнеде мейле кепидизь минекь якстере флагоньть.

Буржуазной государстватне норовить Китаеньть керчазь кирдиманзо.

Китаень народоньть, икелень властеньть пингстэ буржуазной государстватне керчакшнызь эрьва мезень стака договорсо. Неень Китай масторонь правительствась отказась не договортнень эйстэ. Тень кувалт весе лия масторонь державатне максть Китаень од правительстваньте сермат (заявленият).

Сынь сермадыть, што аньцяк сестэ ловсызь од властеньть законной властекс, знярдо сон весе икелень договортнень ловсыньзе законнойкс и карми кирдимаст.

Китаень правительствась отвечась тенст: „Саты истя-как ламо веренек потиде. Ней арадо ве енов. Илядо меша тенекь эсь эрямонок тееме.