Якстере теште/1924/29/Эрзятнэнень аэряви ащемс ве ёно Советской тевде
| ←Вишка наротнэнь эйстэяк кармаст пурнамо советэв | Якстере теште, № 29, 28 сентября 1924 г. редактор Глухов, Пётр Семёнович Эрзятнэнень аэряви ащемс ве ёно Советской тевде |
Коммунистической партиесь сокицятнень кис→ |
| Якстере теште. Еженедельный орган Мордовской секции при Ц. К. Р. К. П. (б.). — № 29, 28 сентября 1924 г. — с. 1 |
[ 1 ]
| Эрзятнэнень аэряви ащемс ве ёно Советской тевде. |
Эрзятне те шкас эсть тонат советской общественной тевс. Те шкас сынь ащить те тевенть эйстэ ве ено, ве пеле. Волостенть эйсэ ванат эрзятнде эрить сех ламо, а волисполкомсо ащить весе рузт эли татарт. Вейкеяк эрзя арась.
Моли волисполкомов тевень кувалт эрзянь ломань. Рускс кортамо парсте а машты. Тевесь сонендэ рузонь кельце а ефневи. Мезе мереть тендэ, мезе пшкадить сон парсте а чарькуцынде. Туи истяк, тевень апак тейть.
Эрзянь аватнень ютксо рускс кортыцят седеяк аламо цератнень коряс. Мезе тее эрзянь авась волисполкомсо, косо кияк аздасы эрзянь келенть. Волисполкомсо эрзянь аванть лангсо анцяк пейдить. Аванть виздилгавсызь и седе мейле сон истямо советс вестькак а молияк.
Истя тевень ветяаь, сокицянтень советской властинь лезэськак парсте а неяви. Секс Коммунистической партень Центральной Комитетэсь ды Вцикесь Советэнь перевыборонь кувалт кучсть таркава серма, конань эйсэ сермацть, чтобу те иестэнть советс одс пурнамсто седе ламо кучуволть советс вишка нациятнень ютксто.
Лия нациятнень тень кувалт тевесь седе парсте ащи. Варштатанок вотякнен лангс. Эйстэдест весемезэ анцяк пельмиллион. Сынст ютксто мелят ульнесь пурназь Уисполкомс кемгавтово ломать ды Губисполкомс вейксэ ломать.
Чувашнэ мелят уездной промксов кучсть 283 ломань. Сынст ютксто эрьва таркава ютась иестэ ульнесть пурназь Уисполкомонь членкс кемень ломать ды Губисполкомонь членкс комсь ниле ломать.
Эрзятнеде мокшотнень марто улить кавтошка миллионт. Сынст ютксто жо минь содатанок анцяк вейке ломань Пензань Губисполкомонь член. Те ломанесь Московкин ялганок.
Зняро эрзянь ютктсо ульнесть мелят пурназь Уисполкомонь членкс, парсте а содатанок. Содатанок анцяк, что кавто эрзят улить Уисполкомонь председательть, ды анцяк не эрзятне эсь пряст эрзякс а невтить, эрзякс кортамо виздить. Лезэсь эрзятненень сынст пельде пек аламо.
Ней ламо таркава сокицятне ды робочейтне кармасть одс пурнамо совэтс. Эрзят! Тыньгак кармадо тееме те покш тевенть. Пурнадо эсь ютксто советс ломать. Кучодо эрзятненьгак уездной ды губернской с‘ездэв.
Советс эрзятнэнь пурнамсто ванодо сень кувалт, чтобу илязо эце тов сюпав ломань, кона пеень порезь ваны коммунистнэнь лангс ды Советской властенть лангс. Истят ломатнень панеде советстэ седе васов.
Пурнадо Советс бедной, честной ломатнень, кучудо советс коммунистнэнь, конатне пуцызь эрямо пингест Советской властень кис.
Эрзят! Мельценк ащизэ коммунистической партиень тердимась. Илядо ульть ве ёно, ве пеле Советской Общественной тевенть эйстэ. Сась шка тыненкак кундамс те покш тевентень.