Якстере теште/1924/28/Миненек эряви улемс весе тевтнень лангсо азорокс
| ←Прявтлопа | Якстере теште, № 28, 21 сентября 1924 г. редактор Глухов, Пётр Семёнович Миненек эряви улемс весе тевтнень лангсо азорокс |
Кинь эряви кучомс советс→ |
| Якстере теште. Еженедельный орган Мордовской секции при Ц. К. Р. К. П. (б.). — № 28, 21 сентября 1924 г. — с. 1 |
[ 1 ]
| Миненек эряви улемс весе тевтнень лангсо азорокс. |
Паксява тевтне курок прядовить. Велесэ таго пачколи шка коммунистненень, комсомолтненень покш тевть теемс.
Васень тевесь, конанень эряви кундамс, те вадринестэ эряви сюлмавомс, пильгеде-пилькс арамс бедной лома марто. Эряви не арась ломатнесэ таргамс ды кундавтомс тевень тееме сельской советсэ, кооперативсэ, комитетсэ взаимопомощи, кредитной товариществасо, ловнума кудосо и лия велень паро тевсэ.
Омбоце тевест — те тейтерь, ава ютксо тев тееме. Те шкамс кодаяк атаргавить тенек сынь велень тевень тееме. Те тевенть конань стуфносызь сестэ, кода весе виеть эряви путомс, анця-бу таргамс сынст ды арафтомс эсь юткозонок роботамо.
Колмоце тев — те советс пурнамо тев. Курок карматано пурнамо од ломать советка роботамо. Эряви ваномс парстинестэ кулакунь ланкс, кода-бу аволть понк сынь советс членкс. Эряви эрьва косо ащемс карчост. Сестэ анцяк бороцявить сынь тенек.
Нилеце тев — те налогонь пурнамо тев. Закононь кувалт аразь (бедной) ломаннень максыть льготат налогонь пурнамсто. Ванок, тень иляк стувт. Налогонь пандомсто седе кулцонок аразь (бедной) ломать, ды вант декретнень лангс.
Ветеце тев — кооперация. Те тевсэнть миненек анця теемс. Сюпав ломать тезэ анолдамо. Тейть кооперациянь лавка. Кооперативень кувалт рамак сюровидицянь кетстэ сюро, чтобу ве хунт сюро иля макст рамамс сюпав торговиця ломаннень. Рамак седе дешувасто ошсто тавар.
Котоце тев — ловнома кудосо. Миненек тосо анцяк роботамс. Макснеме сюровидицянень эрьва мезень эрявикс справкат.
7-це тев — кредитной товариществасо. Пурнак эсь перькат аразь ломать ды тейть артель. Тевенть эряви артельсэ истя теемс, чтобу сараст иляст пееть.
8-це тев — „Якстере Теште“ лангс серматстума, ды велень эрямо чиде сермадума тевть. Иляк етуфт „Якстере-Тештенть“, лац сы, знярдо идятандат сюпав ломаньде. Сермат велень берень, паро тевде.
Не сех покш тевенек. Миненек эряви улемс велесэ азорокс бедной лома маро. Коли эсинек тевенек карматано содамо ды тееме, сестэ минь алкукскак ульдяно миньцинек тев лангсо азорот. Тевесь учи эсненек. Весе апак нузялд тевень тееме.