Якстере теште/1924/18/Ки седе эряви

←Лия масторга

Якстере теште, № 18, 27 июня 1924 г. edited by Васильев, Тимофей Васильевич Ки седе эряви by Ал-велень эрзя

Те иестэ налогонть кармить примамо Волисполкомсо→

Якстере теште. Еженедельный орган Мордовской секции при Ц. К. Р. К. П. (б.). — № 18, 27 июня 1924 г. — с. 1

 

[ 1 ]

Ки седе эряви.

Ве газетсэ мон ловнынь, что аламо минек велева агроном. Минек масторцо сядо тыща десетинас сави анцяк вейке агроном. Московсо же тевтеме агрономт кавто тыщат ломать. Но сынь а кучовить роботамо велев, — государствань арасть ярмакунзо. Мезе жо теимс? Ломанесь дальше сермады, что велетне, кооперативт и лия организяцият сынць кирдест агрономт.

Мон истя думан, что те тевесь, агрономонь кирдемась, умок эряви истя теимс. Эрьва покш велентень кирдиве аволь анцяк вейке агроном, но ваксунзо можна ладямс парыне доктор и велесь теде аволь беднойгады, но сюпалгады.

Кода истя? Вана кода. Чуро велесэ арась церькова. Рас ули церькова, то улить поп, диякон, диячек, конатнень анды велесь. Велесэ ки эри попто парсте? Кия карась. И диякон диячек марто аволь береньстэ эрить. Кинь вийсэ сынь истя эрить? Веленть вийсэ. Эрьва ломанентень поп пек чуросто эрявкшны. Роботыця ломанесь церковас яки анцяк инечистэ.

Аразди пазнынь озныця ломанентень эрявить зняро озныцят сонзэ кис? Аэрявить. Истя коть ки мере и сон сонць соды. А коли истя, то можот седе паро тевесь карми ульме, зярдо велесь карми андомо анцяк вейке ломань, вейке дармоед, мерьмекс, поп, но диякононь жалованьясо. Остатка кавто дармоедтнэнь таркас велесь карми кирдиме агроном.

Кодамо лезэсь карми улиме, зярдо велесь теи истя? — Ванцынек.

Икиле велесь сокась колмо паксява — ней агроном кармавтынзе теиме 4—5 паксят. Икиле десетинась максыль 40—50 пондо — ней сон максы (самай аламо) 70—80 пондо. Икиле ломаненть арасель тикшезэ — ней сонзэ карми ульме клеверзэ. Тикше марто появи ломаненть лишной алашазо. Кавто иеть а кениреть ютамо, кода ломанесь сразу лиякс карми эрямо.

Истямо лезызэ агрономонть. А попонть зяро парозо? Береньде башка сонзэ пельде мезеяк арась. Од ломатнень теде эряви содамс и парынестэ арцемс, а ваномс сыре ломатнень лангс. Вана мейс мон и мерян — полафтодо поптнень агроном лангс

Ал-велень эрзя.