Якстере теште/1924/11/Усла велень тевть
| ←Коли первой ловнынек газет "Якстере Теште" | Якстере теште, № 11, 13 апреля 1924 г. edited by Васильев, Тимофей Васильевич Усла велень тевть by Тевинь ушудыця |
Почтовый ящик→ |
| Якстере теште. Еженедельный орган мордовской секции при Ц. К. Р. К. П. (б.). — № 11, 13 апреля 1924 г. — с. 2 |
| Усла велень тевть. |
Валцке лангса маряса, ки бути стуки вальмалу. Лисинь — ашти десятник.
— Промксос молть, учитель сась — мере десятник.
Радувинь и чиизь молинь промкс кудос. Кудось уж пешксе.
— Кода ино, эряви тонавтыцясь, ата шка-пора юты, апак тонавт пакшатне кадовить — басить атятне. — Яла теке козласо анцяк налксить ды карть калавтыть.
Сась председателесь и тевись тусь, кода эряви. Сонць тонавтыцясь коть аволь пек бойка, ды коли лия арась, так теяк эрзянь атятнень мельс тусь. Председателесь мери:
— Атят, учителенек ули, ней эряволь бу кудо, косо пакшатне кармаволь бу тонавтниме.
Кувать апак арце од цератне рангстасть:
— Попонть кудозо покш, паро, тозой веси пакшатне кельгеть.
— Тынь попонть кадынк эсинзэ кудос, а пасаломщикенть кудосо кармить тонавтниме. Попось, меремс, сетыки тонавтозь ломань, а посаломшикесь минцинек ялга, мужик, моли попонь кухняскак эрямо, кодо эресь ютась иестэ — басить атятне.
Удалдо ки бути пшкаць:
— Посаломщикенть вети эйкакшондо, а попонть анцяк кавто. Посаломщикенть тейтиризэ покш, карми попось кстырямонзо. Сон ведь вечке ава мельга чийниманть.
— Ней попось урьваксць, истя а карми тейниме.
— Месть, монь койсы, зря кортамс? Минць кодат од пингеванок ульнинек? Ки эйстынек эзь шата ава мельга? А попонть чумондомскак а месть: ломанць сон од, ярцы-сими парсте. Сыриде — лотки якамодо — мери Ивашка атя.
Веси пуромксось раказивсь.
— Кода тон, Ивашк-атя, попонть кедензэ палцят, коли сон кува понгсь штюпи?
Тагу веси раказивсть.
— Усла велень попонть тевинзэ кармасть лангс лисиме, Алкукс ведь попось истямо, — мерць Захарунь Петра — чоподова тейтерь мельга чийни. Мон весть меринь тензэ: бачка, так неудобна, „Ничего, Петруха — мере попось — это дело торговое, кто кого обдуит“.
— Порядок! — рангстась председателесь. Школанть кувалт басядо.
Стесь предсельсовета ды мери:
— Да эсинек школась ульнись. Кортынек, церкованть эряви прязо витемс и кавто ряцо вальматнэ теимс. Церькова пренть теизе мастерысь, а рамкатнень эзинде тей, капшась кудов. Попось кисындэ поручась, мери, те пустяк, минць тейсынек, а мекс бути телень чись эзинде тей.
Дайте ней кевкстясынек предсельсовета, Журавлев ялганть, мекс сон попонтень вальмат путы? Нать алкукс тевесь истя ашти, кода ломатне кортыть: Церькувань теицясь туиместондо рамась четверть самагон и миник начальствась, радувамондо пачк, школанть стувтызе. Кода фатесть, тосо уж аволь пустяк. Каладо рига потмозо вееи пешксе ловдо, калидор пряст ков бути варма салызе, кенкшт арасть, вальма кенкшне кона масторо, кона вейке петля вельде нурьги, истя школань таркас — попонь кудот ды церкуват витнить.
Журавлев ялгась коммунист, а пряндо максызе попонень манямс. Ламодо кортни: «мон пек превиян, тевим монь пек парт, — но кияк а несынде, «моньдень мейле истямо велень превть тыненк тол марто а муиве». Путувлинк ламо превтнень школантень, сестэ бу эрьва ки неевлинзе. Тевтне парт ды ламу, цела угул апак устава. Заботяма аволь попонь кис, а школадонть.
Тевинь ушудыця.