Якстере теште/1924/10/Красной армия
| ←Крестьянунь выигрышный заем | Якстере теште, № 10, 6 апреля 1924 г. edited by Васильев, Тимофей Васильевич Красной армия |
Роднявтумо сиротатни пурнамот→ |
| Якстере теште. Еженедельный орган мордовской секции при Ц. К. Р. К. П. (б.). — № 10, 6 апреля 1924 г. — с. 1 |
[ 1 ]
| Красной армия. |
Ульнесь шка, зярдо саилть инязорунь армияс салдатокс мужикинь церасо. Тосо кармафтылть эснынзэ турьме капиталистынь кис.
Пек авардилть сонзэ роднянзо провожамо чистэсть. И авардилть аволь стяко. Ниле-вете иеть ломанесть пекстылизь казармас. Ниле иеть сонзэ эстэде теилть машина. Анцяк кулцонемс салдатость токавсть. И алкукс, сонзэ истя тонафтылизь, что сон а выныль, мезе икелинзэ и а чаркодиль. Сонензэ и а мерилть чаркодеме. Инязоронень се шкастость эрявсь истямо салдат, конасть маштовольбу анцяк кулцонеме да тейме, мезе мерить теизе. Инязоро пелиль се салдатост конасть кевкстиль, мейсь истя эряви теймекс и аволь лиякс. Инязоронень эрявсь салдат безграмотной и конась пелевель бу паздо и вечкевельсе инязорость. Сонензэ мерилть: — паздо пелть инязоронень тейть почет.
Мезинь кис салдаць сестэ служась и воювась. Сынест мерилть, что инязоронь, верань и тонцить масторонь кис. И салдат се шкастость пек турсь верань, инязоронь и масторост кис. Масторцость жо ульнесть и эресть — инязоро, попт и капиталист. Вана нень кис и служасть салдатнэ. Авольжо стяко сельведь марто яла провужасть эсныст служамо. Седейсыст сынь, аваст и нист, мересть, что цераст стяко служить. И аволь анцяк стяко, но дажи аванзо—тетянзо карчо служи.
Мейсь мон сермадан не валтнэсэ. Вана мейсь. Май месятцэ карми ульме призыв. Алятнэсэ, конатнэ шачть 1902 иестэ кармить сайме красной армияс. И наверна тожо кармить авардеме сынст провожамсто.
Ней аэряви авардемс. Ней, мон бу меревлинь, эряви радувамс. Эряви эрьва провужамстость теймекс вишкинкине празник и вана мейсь. Ней од алесь моли красной армияс аволь тыргадьмэ буржуинь кис и инязоронь властень кис. Сонзэ тозо тердить тыргадьме сонцизнэ властень кис. Ней сон уж алкукс красноармеецесь тыргади сонцинзэ модань кис, сонцинзэ масторунь кис. Но ули еще ве тев, конасть кис эряви мольмекс служамо красной армияс. Тосо тонафтыть аволь анцяк парсте турьме, но и тонафтыть паро превс. И грамотас и политикас, и сельской хозяйствас, — весемес тонафтыть красноармеецесть. Зярдо цераст сайсызь велестэ, сон чопуда, кода тумонь вирь. Колмо ие ютазь красной армиядо мееле се жо церась, зярдо моли кудов — аздави. Сон истя превии, что сразу кармашкны велесэсть роботам или сельсовеце или волисполкомсо. И коневс тонаць, и политикас и кодамияк общественной тев тейме. Ве валцо меремс — сон паро школа юты красной армиясо.
Вана мейсь аэряви авардемс церасть провужамсто красной армияс.