Якстере теште/1924/06/Авань чи
| ←Ава ялгат! | Якстере теште, № 6, 2 марта 1924 г. Авань чи |
Авань праздник и Ленин→ |
| Якстере теште. Еженедельный орган мордовской секции при Ц. К. Р. К. П. (б.). — № 6, 2 марта 1924 г. — с. 1 |
[ 1 ]
| Авань чи. |
Мартунь 8 чистэ карми ульме авань праздник. Те чисэсть кармить праздновамо весе масторунь ават, конатнэ организованнойть.
Мейсь сонзэ эснэ кармить праздновамо? Вана мейсь.
И минек масторцо и лия масторга авань кодаткак арасть праванзо. Кадат не праватне? Эстэдист весе содыт. Ава а ловныть ломанькс. Мирдинень лисьме икеле зонзэ лангсо покш тетязо, братузо. Тейтерькс сонзэ кодамияк олязо арась.
Дажи мирдинень лиси аволь сонцинзе олясо. Кода лиси мирдинень, лангсунзо покш мирдезе кармась ульме. Сон кармась мирдень кирьдеме. Лиясто мирдесть трешник питнезэ, да еще паро базардо, чавсак, нолгозо а нафтави сонстензэ, но сон бигельди нинзэ лангсо. Ки азды, кода мирдетне чавить нисыст? Лиясто сыть мейськак кежинзэ, амазылгафсыньзе сельминзэ и месне понги карми чавмо авасость. Мезинь кис? Сон сонць азды. Да и ки максь тензэ истят прават? Мирдензэ эстэде авас кодаяк а оргодевиль. Эряви пачпорт. И зярдо авасть тетязо или мирдезэ а максы соглас, то пачпорт а максыть тензэ. Авасть арасель и модазо. Весе модась ульнесь сермадозь цера лангс и авась ульнесь анцяк работницакс (важодицякс). Вана мейсь минек и тетятнэ-аватнэ и бажить, чтобу сынст улест эйкакшуст весе церат.
Забутить ли тетятнэ-аватнэ, чтобу сынст тейтернет улезэ тонафтозь? Истя жо арась.
Училищасо тонафлить цера эйкакшт. Мейсь истя? Кортыть истя, что тейтерь-эйкакшэнь аэряви грамота. Щердеме кодамо, кильдеме мельга якамо, каштомо икеле и паксясо робутамо и эйкакш шачтомо сонензе грамота а эряви. Не тевтнесэ а эрявить ламо превть. Истя арци ломансь. Вана мейсь минек авасть (рузунь ли, эрзянь ли) аламо соды.
Робута авасть лангс ламо пуцть, но прават кодаткак эсть макст. Умок уж превев (ютксуст и ават) кармасть боруцямо, чтобу аватненэнь максмокс прават. Кармасть ряц кортамо, агитация ветямо аватнэ юткова, чтобу сынь весе пурнавость вейс и чтобу вейсэ кармамс добувамс не праватнэсэ. 1910 иестэ ульнесь истямо авань промкс Копенгагенсэ (Даниясо), конась пуць, чтобу те чисэсть „роботницань чи“ (важодицянь чи) праздновамс весе государствава.
Россиясо те чисть праздновизь 1913 иестэ и омбоцеде 1914 иестэ. Полиция сестэ ламо арестувась ават и пекстось осрокс. 1915-1916 иетнестэ те чисть эзизь макст празднувамс. 1917 иесте Ленинграцо роботницят листь ульцяв эйкакшуст марто и кармасть вешме кше и чтобу мирдест нолдызь кудов окопсто. Теевсь революдия. Васня инязоронь каизь, мейле, зярдо теевсь Октябрьской Революция, каизь весе буржуйтнень и властесть саизь важодиця ломать, робочейть и крестьят, конатнэ тейсть Советской власть. Советской властесь восемнень тейсь равноправия и аванень и церанень и теде мееле минек масторцо авасть истят жо праванзо, кодат и церань Лия жо масторга тэвсь берякс моли. Тосо властесь буржуазиянь кеце. Буржуйть жо а максыть аванень прават.
Но и минек масторцо не праватнэ коть и максовсть аванень, но эряви невак ламо робутамс, чтобу эрьва авас сынь пачкодест. Ленин мерсь, что авась сестэ нейсазо олясть, сестэ кармить сондэ ульме праванзо, зярдо сон каясынзе лангстунсо-кудонь перть робутасть и эйкакшонь ванмость, каштомо икеле робутасть, муськеме-урядамо и лият истят робутат. Ки жо карми тейме не тевтнесэ? Эряви панжомс столовойть, эряви теймекс парт эйкакшонь кудот, машинной прачешнойть и сестэ авась карми ульме свободной. А паксясо кода? И тосо истя жо. Таравзость таркас ведяк жнейка, пивсумаст полафтык молотилка лангс — вот и таго оля. Мезе жо сестэ авась карми тейме? Истя жо тонафлеме, служамо, кода цера ломань. Ламо ли минек ней Советка председателекс ават, Сынь арасть. Сестэ жо и ава карми улме председателекс, и судиякс, и милиционерэкс.
Но чтобу теймекс истя, эряви авасть тонафтомс парынестэ. Эряви кармамс истя жо тонафтомо эснынзэ, кода церасо.
Минек мастордо, зярдо арасель Советской власть, тонафлест ават анцяк сюпав ломанень. Ней Советской власть кармась тонафтомо важодиця ломанинь ават. Советской власть парсте соды что сыньдемест а тееви паро эрямось.
Но истя теи Советской власть и коммунистической партиясь. Вана мейсь аватнэнень и эряви плотнынистэ пурнавмокс коммунистынь партиясть перть. Анцяк сон боруци аван праватнэнь кис, анцяк сон максы тенст оля.