Яков (II)
Шорйыв сиктын Яков быдмис.
Вывті гӧля, тшыг ни пӧт.
Ӧдйӧ челядь сылӧн йывмис;
Лёка этша вӧвлі скӧт.
Омӧль Яковлӧн зэв олӧм:
Сёйысь-юысь керка тыр,
Няньяс этша вӧлі воӧ,
Арся виддзын бырліс пыр.
Оз и дугдыв Яков пессьӧ,
Век жӧ тыртӧм вӧлі кум.
Коркӧ ӧтчыд вӧлі кыссьӧ,
Агрономлань нуӧ дум.
Агрономыд сылы индіс,
Кыдзи нуны оланног,
Кыдзи нига серти овны,
Медым бырӧ курыд шог.
Регыд гӧгӧрвоис Яков,
Кыдзи корсьны колӧ бур.
Быдӧн выль ног кутіс вӧчны —
Велӧдӧмӧн югдіс юр.
Муяс юкис сизим пельӧ,
Уналаті вештіс бор.
Кӧть и вынсӧ пуктіс уна —
Вӧчис аслыс унатор.
Коськӧм вылӧ кӧдзис турун —
Муыс тыртӧг оз нин ов.
Сэсся эндӧм муяс гӧрис.
Таысь уна оз нин ков.
Ӧні Яков муяс вылын
Кутіс бура кайны нянь.
Йӧзыс быдӧн ёна шензьӧ,
Сэтшӧм кӧдза лои шань.
Яков овмӧдчис зэв бура:
Семья ставыс пыр нин пӧт,
Лэптіс керка гӧра йылӧ,
Вель нин уна содіс скӧт.
Нига серти овмӧс нуӧ, —
Водзӧ шог улӧ оз сюр.
Воысь воӧ олӧм бурмӧ, —
Агрономсянь лои бур.
This work is in the public domain in Russia according to article 6 of Law No. 231-FZ of the Russian Federation of December 18, 2006; the Implementation Act for Book IV of the Civil Code of the Russian Federation:
- its creator fought or worked for Soviet Union victory during the Great Patriotic War — so the 74-year protection term is applied;
- and the creator died before January 1, 1950 (more than 74 years ago), and has been not posthumously rehabilitated since that date;
- and this work was first published before January 1, 1950 (more than 74 years ago).
This work is in the public domain in the United States because it was published before January 1, 1929 (more than 95 years ago).
The author died in 1943, so this work is also in the public domain in other countries and areas where the copyright term is the author's life plus 80 years or less (if applicable), or the copyright term is 95 years or less since publication (if applicable).
Public domainPublic domainfalsefalse