Языковай научнай конференциять итогонзон колга

From Wikisource
Jump to navigation Jump to search
Языковай научнай конференциять итогонзон колга  (1933) 
by Куликов, Иван Игнатьевич, edited by Шестов Н. С., Порватов Т. М.
Колхозонь эряф. Мокшонь литературно-художественнай и общественно-политическай журнал. Нолдаец Сембе союзонь писателень Мокшэрзянь областень оргкомитець. Лисенди 6-це кизось эрь ковти кафксть. — 9 № Май ков 1933-це киза. — с. 21—22; — 10 № май ков 1933-це киза. — с. 16—17
 
Ив.  Куликов.  

 
Мокшэрзянь культурань научно-
исследовательскай институт
 
Языковай   научнай   конференциять
итогонзон   колга
 

Колхозонь эряф, 9 № Май ков, 1933 к.:

[21]Аф кунара шумордазе эсь работанц языковай научнай конференциясь, конац пуроптфоль Мокшэрзянь культурань научно-исследовательскай институтть мархта.

Аф случайна ся, што аф кунара пуроптф институць васендакигя кярьмоць кялень проблемматнень кочксема сяс, мес кяльсь — тя фкя инь оцю средства Ленинскай национальнай политикать эряфс йотафнемаса.

Конференциясь каннесь республиканскай характер. Сон кочксесь нят кизефкснень эса Наркомпрость специальнай заданиянц коряс. Конференцияв пуромкшнесть теоретическай работникт — языковедти практическай работникт методистт. Мокшэрзянь кяльть колга Мокшэрзянь областть, Средне Волжскай крайть и нльне Советонь Союзть сембе вастонзон эзда. Нльне ичкоздень Барнаулсь кучсесь конференцияв представитель. Конференцияса тяфта жа ульсь представитель кялень и мышлениянь Сембесоюзонь Наукань академияста (ся институцта, конань возглавляет Марро академиксь).

Конференциять инголе ащесть кафта оцю кизефкст:

1. Языкознаниянь марксистско-ленинскай основатне и языковай строительствань ингольпяльдень задачатне. (Докладчиксь Куликов и содокладчиксь Рябов профессорсь, кафта содокладчикт методическай кизефкснень колга: Черапкин и Григошин ялгатне.)

2. Мокшонь и Эрзянь грамматикать ваномац и теенза правилань лифтемась (Кода ни тинь содасасть, што мокшэрзятне корхнихть кафта рознай кяльса мокшоннеса и эрзяннеса) докладчикне: Рябов профессорсь, Черапкин, Петербургскай и Миронов ялгатне.

Мзярда институтть мархта васенда арьсефоль тя конференциять терьдемац, то арьсекшнеме, што сон арай кода аньцек организационнай лезкс. Но эрявфсь, ВКП(б)-нь ЦК-ать учебникнень колга путфксонц сяда курок эряфс йотафтомац пуцть конференциять инголи кизефкс кочксемс и ванондомс кой-кодама научнай работатка. Тяфтама пяк эрявикс работакс арась орфографиясь (цебярьста сьормадомань правилатне).

Ся орфографиянь разнобойть пинкста, конац моли тяни мокшонь и эрзянь кяльхнень эса, аш кода пяшкодемс пяк оцю кизефксть цебярь стандартнай учебниконь нолдамать колга. Штоба нолдамс тяфтама учебникт, эряви научнай ширьде цебярь стандартнай орфография.

Эряви азомс, што аф ваномок лама кой-кодама аф сатыкснень ланкс (конатнень колга ули азф сяда алува), конференциясь йотафтф цебярьста и макссь пяк оцю результатт. Кафкса шит мольсь пяк вишкя, видексонь коллективнай научнай работа.

Цебярьста кочкафтольхть делегаттне конферениияв: научнай работникт — языковетт, практическай работникт — методистт, газетно журнальнай и издательскай работникт, поэтт и писательхть и политическай работникт.

Тяфтама работниконь кочкамать вельде конференциясь эсь работасонза сатнесь оцю продуктивность и вишкя научнай шире.

Синць научнай работникне-языковеттне витькстасть, што теест эстеест конференциясь макссь пяк лама кой мезе—панчсь синь инголест од кит кялень обласьца тя али тона кизефксть кочксемаса, макссь синдеест од подходт, лама научнай докизательстват кой кона кизефкененди. Сембе тя ашель кода сатомс ученай кустарь-одиночкатнень башка ськамост работамаснон вельде, а сембе тя сатовсь аньцек коллективнай научнай работать вельде. Конференцияса вишкя спорхнень вельде ульсь кода сявомс эрь работникть ширьдя сембонь сянь, мезе сон содась.

Сембе делегаттне работсть пяк оцю мяльса и путнезь тя тевти сембе вийснон.

Пяк цебяреньди лувозе конференциять работанц кялень и мышлениянь [22]институтонь представительсь Чхаидзе ялгась марийскай кялень специалист, конац арьсесь минь опытонеконь йотафтомс Марийскай областти сяс, мес тоса кафта кизот ни кода пуроптф национальнай культурань научно-исследовательскай институт, а тяфтама конференция ниньге вестеньгя апак йотафнек.

Конференциять работанцты пяк оцю мяль шарфнесть вастонь руководящай партийнай и совецкай организациятне. Конференцияса оцю мяльса работасть областной организациятнень руководительсна (партиянь обкомть секретаренза, ОблКК-ань председательсь, Облисполкомонь председательсь, обкомонь культпропть заведывающаец, ОблОНО-ть заведывающаец, газетань и журналонь редакторхне и ст. тов.)

Мезе цебярьсь макссь конференциясь эсь работасонза?

Васендакиге, сон макссь стандартнай орфографият мокшонь и эрьзянь кяльхненди.

Конференцияса тюренцть орфографиянь кафта системать (условна азомс): Рябов профессорть и Петербургскаень системасна и Черапкин ялгать системац. Тяда башка ульсть соньцень предложениянза Мироновть, конац ашезь согласиндакшне аф тя, аф омбоце системать мархта.

Кафцьке систематнень ульсть синьцень ширень кирьдисна делегаттнень йоткста (Черапкин ялгать системанц инкса ащесь сяда кржа). Черапкинць лувондозе эсь прянц кода „последовательнай яфетидолог“ (Марро академикть яфетическай теориянцты — кяльть колга од ученияти последователькс). Но сон аф критическайста шарьхкодезе яфетическай теориять, и пожалуй нльне извратил тя теориять языковай строительствань конкретнай задачатненди путнеманц. Сембонь тянь вельде Черапкин ялгать лиссь, кода корхнесть конференциянь кои-кона делегаттне „системафтома система“ орфографияти, пяк сложнай и тапаряф орфография.

Черапкинтть ширень кирдиенза винендакшнезь Рябовть и Петербургскайть формализмаса, што синь бта формать путнесазь кяльть содержаниянц каршес. Но „формать и содержаниять“ колга спорхнень нят ялгатне мольфтезь узко-языковай явлениянь рамкатнень эзда апак лисентть. Синь ашезь сявонде высшай содержаниять — социалистическай строительсгвань интереснень, конат корхтайхть тейнек сянь колга, штоба минь максолеме массатненди аф китайскай грамота и аф английскай орфография, а простой, сембонди шарьхкодеви орфография и сембонь тянь вельде тьождялгофтомс массатненди мокшонь и эрзянь литературнай кяльхнень мархта пользовандамать, кода ленинскай национальнай политикать йотафтомаса инь оцю мероприятия. Тя высшай содержаниять ланкс ванозь соньць кяльсь арси формакс — аф целькс, а средствакс.

Практикне — методисттне корхнесть Черапкинонь и Мироновонь ширень кирдиснонды (характернай тев ульсь эрзянь секциянь заседанияса отрицаниянь орфографиять) арьсекшнемста „минь — преподавательхне аф шарьхкоцаськ тинь азондоманттень, а кода синь шарьхкоцазь массатне, кода синь шарьхкоцазь тонафни иднятне?!“

Рябовонь и Петербургскаень системасна сяда простой и сембонди ширьхкодеви. Тя системаса кода правила ся, што валхнень юрсна (основаса) аф полафневихть. Лафче ширекс сондиенза арсесь — тя „неумолимай последовательносць“ (соньцень Рябов профессорть кархтаманц коряс), конац ашезь кирьде правиласта исключениятнень.

Колхозонь эряф, 10 № май ков, 1933 к.:

[16]Конференциясь планернай заседаниятнень эса орфографиянь максф проекттнень ванондомста кочксемста путозе: сявомс Рябовть и Петербургскаень проектснон основакс арьсекшневи стандартнай орфографияти. Но сяс, мес нят ялгатнень проектснон эса ульсь лама оцю афсатыкст сяс ашель кода синь целайста прьмамс, сяс конференциясь явовсь кафта секциява (мокшонь и эрзянь), коса и кочксесть-арьсекшнесть орфографиянь основат. Нят секциятнень кафта пяле мархта шинь роботаснон вельдя — орфографиясь арьсефоль-кочкафоль (разработаннаель) и тяда меле кемокстаф конференциянь пленумть мархта эряви азомс, што орфографиясь конференциять васеньце и инь оцю сатфксоц.

Омбоце сатфкссь ся, што конференциясь тийсь итог ся наследствати, институтти катф Евсеевонь, Рябовонь Черапкинонь, Мироновонь и лиятнень литературнай мокшонь и эрзянь кяльса работаснон, мокшонь и эрзянь печатть колга работать.

Колмоце сатфкссь ся, што конференциясь арась пяк оцю опытонь кочкама вастокс, тяса кочкафт сембе мокшонь и эрзянь кяльть ланкса работай работникнень практическай и научнай работамань опыцна. Тя опыць арай пяк оцю материалкс кяльть ланкса институтть инголь пяльдень работанцы. Штоба тя пяк оцю опытть аф аньцек ванфтомс, но тиемс сонь шарьхкодевикс сембе мокшонь и эрзянь работникненди, конференциясь мярьксь институтти нолдамс печаца конференциять сембе стенограмманзон (сембе заседаниятне сьормачнефт стенограммас).

Нилеце сатфкссь ся, што арьсефт языковай строительствань инголь пяльдень задачат, конатнень коряс институць кармай мольфтема кяльть ланкса эсь инголь пяльдень работанц. Арьсефт основной принцыпт кяльть ланкса инголь пяльдень работаманди (кепотьксонди сявомс сянь, што арьсеф международнай терминологиять мокшонь и эрзянь кяльти сувафнемаса тяфтама способ: валть юроц (основац) интернациональнай, но юронц пес оформлениясь путневи национальнай, эрзянь кяльса эсь лацост, мокшоннеса эсь лацост. (Кемоста путфт задачатне языковай строительстваса кафта фронтови тюремать колга, сембодонга пяк терманологическай работаса, максф тя тюремати конкретнай содержание.

Конференциясь путнесь эсь инголенза и кочкась лама мокшэрзянь кялень принципиальнай кизефкст. Кепотьксоньди сявомс сянь, што конференциясь — пуць не корхнематненди мокшонь и эрзянь кяльхнень марс шовардамаснон колга, сяс мес нят кяльхне лама сядонь киза ни тиендевсть башка фкя фкянь эзда и тяни шовордамс синь марс, тя значит пуроптомс искусственнай литературнай кяль, массатненди аф шарьхкодеви и сембонь тянь коряс тиема стама тев, конац арай вреднайкс социалистическай строительствати. Конференциясь лифць лозунг — „массатненди“, лятфтазе сембонди, што тяза уль кодамовок кабинетнай работа кяльть ланкса, няфтезе сянь, што эряви кемоняста, научнайста тонафнемс живой мокшэрзянь кяльть, колхозникнень кяльснон, ся кяльть, конац пуропневи од производственнай отношениятнень вельдя. Конференциясь тяфтажа азозе ванондомс массатнень йоткса кяльть тонафнемаса научнай работать сатфксонзон.

Ветеце сатфкссь ся, што институць кармась содамост мокшонь кяльть ланкса рабатайхнень, конатне срачнефт СССР-нь пункттнень эзда, проверендазе синь [17]коллективнай научнай работаснон, содазень синь специальносцнон, синь качестваснон. Итогса тийфт предпосылкат сянди, штоба инголепяли явошнемс институтонь активть научнай кялень тонафтама работас. Конференциянь делегаттне азозь эсь пряснон институтонь научнай сотрудникокс и макссть вал активна работамс аф аньцек институтонь кялень тонафнема работаса, но и лия проблемань разработкаса (эрь работникть работаманц коряс).

Инголь пяли институць кармай эрь пингоне кучсеме конференциянь делегаттненди вастонь эрь пингонь работазост эсь планцнон и подробнай, заданият сянкса, штоба научнай проработкась кялень тонафнемаса йотафневоль аф аньцек Саранскяйса, но тяфтажа лама лия вастовавок, коса улихть мокшонь работникт (Москуса, Саратавса, Петровскайса, Ленинградса, Самараса, Лукояноваса, Барнаулса и ст. тов).

Конференциять йотафтомста конкретна мокшонь работникнень содамасна макссь возможность кой-конатнень синь эздост таргамс институть эрь пингонь, штатнай научнай сотрудникокс. Конешна, ульсь конференциять йотафтомста лама и оцю аф сатыкставок. Савсь анокламс сондиенза пяк вишке темпаса, сяс мес Наркомпрозсь эряскофць анокламс сяда курок стандартнай орфография.

Эряволь ба конференцияв сайхненди тезиснень кучсемс инголи сянкса, штоба синь ба ванондолезь лацкас вастова. Тянь минь ашеськ тие. Но конференциять оцю мяльса работамац тя аф сатыксть петезе. Инголепяльдень конференциятненди анокламста сембе тя ули институтть мархта сявф мяльс.

Меле, вишкста научнай споряматне кой-коста йотнесть сялондомакс (сюцьсесть фкя-фкянь Индоевропеизмаса, языкофронтовщинаса и ст. тов.)

Но эряви азомс, конференциясь йотась оцю принципиальнай политическай васц, апак лотксек кялень тонафнемаса сембе буржуазнай теориянь рицидивисттнень мархта тюремаса, индоевропеизмать и языкофронтовщинать мархта тюрезь. Конатне, корхнесть, аф политическай корхнемат, синдерезь партиять китьксонц, конатненди ульсь максф кемя отпор — и аф аньцек маром кялень тонафнемаса теориянь кизефксса, но и кяльть строяма конкретнай кизефкссовок.

Конференциясь зайнясь правильнай позиция яфетическай теорияса (академик Маррать теориянц), кона сяда маласа марксистско-ленинскай кялень тонафнема основатненди, но ниньге ашезень машфта педа-песь эсь лафча ширензон, эсь сире пингонь пережитканзон и ашезь шарфта педа-пес марксистско-ленинскай кялень тонафнемати. Конференцияса институць, корхтась Марровскай институтонь представительть мархта (наукань Академиянь кялень и промышлениянь институтть) конкретнай сотксонь кирьдемать колга.

Штоба пачфтемс конференциять решениянзон вастова практикаса работай массатненди институць арьсесь маластонь шитнень вастова, районга йотафтомс конференцият и совещаният.

Инь маластонь пингонь работанди институтти конференциясь путозе анокламс грамматика и терминология. Станя штоба сьоксенда йотафтомс омбоце конференциять, коса лацкас ванондомс нят работатнень.

Тяконь шовор эряви вятемс работа и общай словарень тиемасовок.

Конференциясь, лихць оцю переспективат институтть кялень тонафнема работасонза. Задачатне пяк стакалгоцть. Но тяконь шовор, конференциясь макссь и предпосылкатка сяда курок нят задачатнень пяшкодемаснонди. Боевой темпаса, келептьф фронца кундамс нят задачатнень пяшкодема — основной вешфкссь лихневи институтти партиять и сембе советскай общественностть мархта.

 

PD-icon.svg This work is in the public domain in Russia according to article 6 of Law No. 231-FZ of the Russian Federation of December 18, 2006; the Implementation Act for Book IV of the Civil Code of the Russian Federation:
  • its creator didn't fight or work for Soviet Union victory during the Great Patriotic War — so the 70-year protection term is applied;
  • and the creator died before January 1, 1950 (more than 70 years ago), and has been not posthumously rehabilitated since that date;
  • and this work was first published before January 1, 1950 (more than 70 years ago).

This work is in the public domain in the United States because it was first published outside the United States (and not published in the U.S. within 30 days), and it was first published before 1989 without complying with U.S. copyright formalities (renewal and/or copyright notice) and it was in the public domain in its home country on the URAA date (January 1, 1996 for most countries).
This work was in the public domain in Russia on the URAA date January 1, 1996, according to the Law 09.07.1993 No 5351-1 which was enacted on that date:

  • its creator didn't fight or work for Soviet Union victory during the Great Patriotic War — so the 50-year protection term was applied;
  • and the creator died before January 1, 1946 (more than 50 years ago from 1/1/1996), and has been not posthumously rehabilitated since that date;
  • and this work was first published before January 1, 1946 (more than 50 years ago from 1/1/1996).

The author died in 1935, so this work is also in the public domain in other countries and areas where the copyright term is the author's life plus 84 years or less (if applicable), or the copyright term is 86 years or less since publication (if applicable).

Flag of Russia.svg