Юрси
| Юрси (1889) by |
| Гижан кад: 1889, Йӧзӧдан во: 1889. Ӧшмӧс: Зырянский край при епископах пермских и зырянский язык : пособие при изучении зырянами русского языка / сост. Г. С. Лыткин. - Санктпетербург, 1889. |
Югыд шондіӧй
Менам веж, мича юрсиӧй!
Югыд шондіӧй
Менам сьӧд, дона юрсиӧй!
Югыд шондіӧй
Менам гӧрд, волялан юрсиӧй!
Югыд шондіӧй
Менам юрсиӧй, мичӧй!
Югыд шондіӧй
Мышку шӧр пӧв мичӧй!
Югыд шондіӧй
Пельпом выв (нималӧмӧй) ошкӧмӧй!
Кытчӧ нӧ менам, коньӧрлӧн,
Веж, мича юрсиӧй шупкысис?
Кытчӧ нӧ менам, коньӧрлӧн,
Сьӧд, дона юрсиӧй шупкысис?
Кытчӧ нӧ менам, коньӧрлӧн,
Гӧрд, волялан юрсиӧй шупкысис?
Ачым тай ме, коньӧрӧй, ог тӧдлы.
Гашкӧ, уна ветлалігам-мунігам,
Дона юрсиӧй менам шупкысис,
Сиӧн-сиӧн нетшкысьӧма,
Сиӧн-сиӧн гылалӧма!
Гашкӧ менам, коньӧрлӧн,
Паськыд видз вылас шупкысис!
Гашкӧ менам, коньӧрлӧн,
Адаса му вылас шупкысис!
Ветлы тэ, ветлы
Менсьым дона юрсиӧс корсьны
Паськыд ытшкан видз вылад.
Сэтысь кӧ, майбырӧй, оз югды,
Бара тэ меным ветлы
Паськыд адаса му вылад.
Сэтӧн кӧ менам дона юрсиӧй абу,
Бара тэ меным ветлы
Чӧдъя-пувъя ягъясад,
Мырпом вотан нюръясад.
Сэтысь кӧ менам юрсиӧй оз югды,
Бара тэ меным, коньӧрлы,
Вичко дорӧдз лэччывлы;
Сэтӧн кӧ менам юрсиӧй абу,
Бара тэ меным ветлы
Кевманін дорӧдз.
Гашкӧ, менам, коньӧрлӧн,
Уна ветлігам-мунігам,
Сьывлігам-ворсігам,
Разъялігам-сявкъялігам
Дона юрсиӧй шупкысис.
Тӧдан тэ: менам, коньӧрлӧн,
Вичко пельӧсӧ сійӧ шупкысьӧма
Синмӧн аддзывтӧм вылӧ.
This work was published before January 1, 1929, and is in the public domain worldwide because the author died at least 100 years ago.
Public domainPublic domainfalsefalse