Эрямос совамо/Стака иетнестэ/13

From Wikisource
Jump to navigation Jump to search
Стака иетнестэ  (1935)  by Раптанов, Тимофей Алексеевич, edited by Лукьянов А.
XIII-це пелькс
Т. А. Раптанов. Эрямос совамо. Ёвтнемат. — Мокшэрзянь государственной издательствась, Саранск, 1936. — с. 59—65
[ 59 ]

XIII

Тусть сексень пиземеть. Чова эйсэ валакадсь масторксось. Паксясонть пужозь тикше лопатнень шли пиземе ведесь. Виресь каясь остатка ожо оршамонзо. Меельсь нармунтне ливтить лембе масторов. Чиде-чис нежедсть кежев телень якшамотне.

Астаканонь сельтне малав лечавсть, больницяв ней якась чуросто. Сон ней седе сеедьстэ кармась якамо ошованть, лиясто ютыль заводонть перька. Раиса кантлесь паро кинишкат ды Астакан паро мельсэ ловнось. Яла теке тевтеме аштемась тошна. Заводонть эйсэ чиде-чис витнесть — стявсть эйсэнзэ пильге лангс. Весть Астакан совась заводонь кардазонтень. Кедень пинжаксо ды кемсэ оршазь ломанесь мелявтозь якась кардазганть, невтнесь робочейтненень, мезе ды кода эряви теемс. Те ульнесь заводонь директорось. Астакан мольсь малазонзо ды пшкадсь:

— Курок нолдасынк заводонть?

Директорось варштась а содавикс ломаненть лангс, отвечась.

— Од иестэ сырги. Тон кие ломанесь?

— Мон велень ломань, Трошкина велестэ. Сельмен лечан тесэ. Эрян вана тынк робочеень кедьсэ.

Директорось совась заводонть потс. Аламос аштемадо мейле мельганзо совась Астакангак.

Робочейтне котьмасть станкатнесэ. Шлясть лангстост чемененть, пуленть.

Туемстэ Астакан мельс паросо варштась перть [ 60 ]пельга. Кардазонть келес ульнесть ертнезь эрьва кодат стройматериалт. Ансяк витнезь сэрей турбась нерькставсь менелентень.

Астакан пачкодсь кустем пес ды эщо весть варштась кирьпецень сэрей турбанть лангс. Арьсезь комавтызе прянзо, те шкастонть марявсь вайгель:

— Кадык наксады велентень! Монь сельмс куломазонзо илязо понго! Истят эйкакштнэнь маштнемс, кода маштызе Тарас Бульба Андреень! Кунсолок ава, покшонть маштызь, те нолго тулось тусь эйстэнек, стувтымизь, мусь однасумт, сайсь эрямо ялга... Улизэ а те шкась, молевлинь, монсь сэпензэ чулговлия! Пингезэн а простяса! — Станислав вачкодизе кенкшенть, лиссь кудостонть. Кустем пестэ вастызе Астаканонь, сон трокс варштась лангозонзо.

— Астакан, — ве ендо пшкадсь Станислав. Мейле арьсезевсь, прянзо нолдызе алов, вановтозо пезнась пильгалонзо. Кувать кашт молемадо мейле поладызе кортамонзо:

— Тон мекс обидамо эзить сакшно? Косо ульнить знярс?

— Заводсонть ульнинь, — отвечась Астакан.

Станислав прянь нолдазь велявтсь кустем пентень. Озась. А ламос аштезь арьсезь, пшкадсь:

— Астакан, тев ули, — Станислав пувордась эчке цигарка, Астакан лангс апак вано кортазевсь.

— Тон ловныть Тарас Бульбадо?.,

— Ловнынь. Мейле мезе?

— Мезеяк арась! — Кежевстэ рынгстась Станислав ды сельгенесь ве енов. — Сон ведь монь верьстэ! — Станислав кежейстэ варштась, мерят прок арьсесь мереме: „тон кадык монь кудонть“. Мезеяк эзь мере, стака эськелькссэ тусь заводонь кардазонтень.

Астакан арсемадо мейле, нусманясто совась кудов. Сон арьсесь уш туеме велев, но врачось мерсь совамо ковонть меельсь читнесьтэ. Астакан эзь вешть а ярсамс, а сельмезэнзэ надобия. Кайсесь ды мадсь. Сон [ 61 ]мадезь таго арьсесь: „молян эсинек велев, сивидян роботамо, урьвакстан. Седеем мари, што Аганя ризны, стомавсь ломанень кедьсэ эрямодонть. Эряви кучомс тензэ серма, панжомс тензэ потмом“. Сон веньстизе кедензэ столентень, сайсь кинишка. Панжизе кинишканть, потмостонзо прась серма. Астакан капшазь сезизе конвертэнть. Ловнось: „Вечкема, Астакан! меельсь шканть велесэнть ульнесть покш событият. Намо, те событиясь тевенть велявтызе лия енов. Недлячистэ маштызь Мотаень, чавимизь моньгак. Судинек Макинэнь, Лацянь, Игаевень ды лиятнень. Теде иля корта минек семеясо. Ульнесь цела восстания. Сась велентень коммунист Андрей Пятков. Тон сонзэ содасак. Пурнась партиянь ячейка. Мон сермадстынь партияс, аравтымизь советс председателькс. Меельсь пелев витькстан теть: мон урьвакстынь. Козейкакс саия Аганянь“... Астакан седе тов эзь ловнояк. Таймаскадозь ловнынзе эщо весть неть валтнэнь ды ертызе серманть.

Чикоргадсь кенкшесь, комнатантень совась азоравась ды Раиса. Сынь ульнесть а веселат. Астакан кепедизе прянзо. Чамазо ульнесь истямо жо нусманя. Раиса мольсь вальмантень ды кашт молезь вансь ушов.

— Эйднем, Астакан, тон евтак инеськеть, кодамо тейтересь тынк велесэ Аганя? — авась неждясь кенерепакарензэ лангс ды сельмень апак конштне вансь Астакан лангс. Сельместэнзэ бульдерьсэ кеверсь сельведесь. Астакан аламос чатьмонемадо мейле мерсь:

— Валерьян тейсь пек парсте, мейсь саизе козейкакс Аганянь. Аганя истяможо бедной, эрясь ломанень кедьсэ. Ломанесь пек превей, мазый, шумбра, — сон таргизе портманетстэнзэ Аганянь фотокарточканть ды нузяксто венстизе авантень. Авась ды Раиса кармасть ванноманзо. Астакан кашт молезь нолдызе прянзо ды нувсесь. Авась сювордызе мештезэнзэ карточканть ды туемстэ кортась:

[ 62 ]— Монень ведь сонгак жаль, кода сынь тосо пиштякатне... — ды лиссь мартонзо комнатастонть. Астакан арьсесь вешеманзо карточканть, эзь евтаво тензэ валгак. Мейле таго саизе серманть, ловны седе тов: „Сась тонавтнемстэ Лена, комсомолка, пурны комсомолонь ячейка. Сон ламо евтнесь монень тоньдеть. Теде мейле мон седеяк кеман, минек ялгакс чинэк кемексты юткозонок ды куломазонок а явдано. Мон содаса, тетям карми машнетеме, кадык. Бути тон а сават, минь мольдяно Аганя марто кортасынек. Тонь ялгат Валерьян ды Аганя“.

Астакан стакасто таргизе оймензэ. Раиса серманть ловномс вансь Астакан лангс, несь эйстэнзэ мень бути апаро.

— Астакан, тон течи эзить ярса, новолить, прок маштыкссэ середят. Давай ужинатан, — Раиса лиссь ярсамо пелень кисэ. Се шканть марявсь Станиславонь кежев вайгелезэ:

— Пултык каштомсо. Монень а мейсь нерькстнемс...

— Осподи, кодамо кежев минек тетянок, — мерсь Раиса комнатантень совамсто.

Астакан икеле ладсо аштесь нусманясто.

— Тон кежеявтыть тетянь севноманть лангс? Стяко.

— Арась.

— Эно мекс истямат? Мон истямокс тонь эщо эзитинь нее — мон свал арьсинь улемс тонь кондямо весела, эрямонь вечкиця. Тонь сельмсэ свал палсь кенярдомань тол. Ней мезе теевсь мартот? — Раиса озась Астаканонь седеяк малас ды чевте вановтсо вансь сельмезэнзэ.

Сынь кавнест аштесть чатьмонезь. Астакан эзь фатяяк кода штеказонзо токасть Раисань пси турванзо. Кирвайсь Астакан, цимболгадсть сельмензэ, састо путызе кедензэ Раисань лавтов лангс, кутмордызе ды визьдезь ладсо пшкадсь:

— Раиса! Содат мезе, Раиса... Тон мезеяк а содат, [ 63 ]Раиса... Мон тонь вечктян... Марят, Раиса... Мон урьвакстан тонь лангс...

Раиса саизе кедензэ Астаканонь лавтов лангсто. Арьсезь комавтызе прянзо. Мейле эзь фатяяк кода новолсь Астаканонь элес ды виевстэ чавсь седеезэ. Кепедизе прянзо ды мерсь:

— Монгак вечктян... Мон якинь тонь мельга прок эсь ломань мельга. Ансяк урьвакстоманть кувалт аздан кода, тетян нейке кравтсамизь... — Раиса эзизе прядт кортамонзо. Пси турваст токасть вейс. Те шканть совась авась Сон пекстызе кенкшенть ды чувтомсь тарказонзо. Кедензэ пильгензэ новольсть, чамазо ловташкадсь.

Раиса кирнявтсь Астаканонь беремасто, чийсь аванстэнь. Мельганзо ертовсь Астакангак. Кундызь кавто ендо ды озавтызь юткозост.

— Авай, тонеть а эряви машнетемс. Минь Астакан марто совинек вейс эрямо. Сон урьвакссь, мон лисинь мирьденень. Арьсек тенек парт... — Раиса сорновтнесь аванзо эйсэ кенярдозь палызе аванзо.

— Вере паз корминец! Мезть тейневить мастор лангсонть! Ломантне човорясть. Ошсто туи велев, велестэ сы ошов. А брезговить татардо, а нулгодить сокор чуваждо. Ков тынь мольдяд, пиштякат? Тетят нейке вензэ лангс паньдядызь... — машнетезь ладсо кортась Раисань авазо.

— Иля авардть, авай, — пшкадсь Астакан, — тон васень чистэнть кармить мереме монень „эйднем“. Пек ульнесь мелезэн паро. Авань седей мон а повнян. Иля мелявт. Тынк а кадтадызь, тятянокак ойми. Минь мольдяно роботамо заводов. — Астакан кеместэ палызе штекас.

Авась кашт мольсь, неть кавнест аштесть икелензэ.

— Мезе уш, молян евтан Станиславнэнь, — авась стясь пильге лангс, чиремкшнэзь шашсь кенкшентень. Астакан лавтовдо кирдезь ильтясь эйсэнзэ. Мейле [ 64 ]арасть карадо каршо Раиса марто ды кашт молезь прок учость тетянть азаргадозь вайгелензэ, вансть вейкест-вейкест лангс.

Авась озась столь пентень, кашт молезь нурсесь рунгонзо.

— Месть пря чават, превтеме?! — пек рангстась Станислав.

— Месть, — пшкадсь авась, — Раиса лиси мирьденень Астаканонь экшес.

— Кода?! Астаканнэнь? Карть арьси карсеме... Паньсынь нейке, кадык, иляст уле сельме икелен! — Станислав куроксто, капшезь кармась лисеме. Се шканть Раиса каявсь Астаканонь киргас ды кутмордавсть.

Станислав азаргадозь вановтсо вастыньзе кавто од седейтнень ды рангстась.

— Астакан, тон кадык монь квартиранть, тон козна орготь ежостонзо!

— Арась, тетяй мон а яван эйстэнзэ, — аварьдезь отвечась Раиса.

— Ах, пона куванкс! Тонгак лелять мельга, кшу кудостонть!

Астакан эзь евта валгак, саизе Раянь кедьте ды лиссть кустем пес. Эзть кенерь валгомо, мельгаст ливтясть тодовост, ацамо-пелест, одижаст.

— На, монень сынь а эрявить! — Станислав кустем пес путызе столь лангсо ям марто тарелканть ды кши кочомонть, пекстызе кенкшенть.

— Мон молян заводонь директоронтень, нолдасамизь валскес, — пшкадсь Астакан.

— Иля, — кортась Раиса, — монь ули ялгам, комнатаст чаво. Молян вешан алаша, — ды тусь.

Астакан озась ацамотнень лангс, тейсь таргамс. Мейле тарелкастонть валызе ямонть, пурнызе кши кочомонть.

— Маштовить, — пшкадсь курго потсо. Се шканть алаша марто сась Раиса. Сынь куроксто вачкизь [ 65 ]улист-парост ды сыргасть. Вальмаванть ульцянтень прась тол валдось, неявсь, кода Станислав якась кудованть ды машнитсь.