Эрязденть арсезь (2010)/Эрьванть шказо эсензэ
[107]
| Эрьванть шказо эсензэ |
«Кинонь» ваномась сеске войнадо мейле ульнесь пакшатненень медте тантеекс. Эцесть невтема таркантень, залсков сёксень укскакс. Ансяк совамс, кодаяк понгомс, ансяк полгарьгавтнемс сельмть экранонть каршо. Монень тень кувалма талномс эзь савкшно. Патям клубонь прявт, мон — лездыцязан. Секскак кенкшесь икелень свал панжозель.
...Керсян кудосо эрявикс келесэ ташто газетат. Педявтнян сынст мельцек-мельцек пидезь модамарьсэ. Паро педямкаесь! Лиссь кувака леха. Саия анок лаксезь-валакавтнезь чев пестэ лапужкам ды ушодынь «рисовамо». Вал, мельганзо омбоце... ды «Смерть немецким оккупантам!» лозунгом анок. «Фу! Окойники прядовсь», — шождасто лекстинь, ве ёндо лангозонзо ванозь. Аламос аштезь, пединь омбоцентень. «Да здравствует ВКП(б)!» — эрявсь тень «чапомс». Шожда ёвтамс! Варчика теемс? Чоп носкинь, мерезенть топавтыя. Уроконгак стувтокшнынь. Кода истямо тевень кис а нолдамс «алянть» стякодо кинос? Те ульнесь, виде, войнань шкасто.
Войнадо мейле «Сый полка» фильмась кортыцятнестэ васенцель. Мельганзо пачкодсть «Белеет парус одинокий», «Гибель [108] «Варяга»... «Врагу не сдаётся наш гордый «Варяг»...» ёжонь кепедиця морось теевкшнесь раськень морокс. Морасть сонзэ клубсо, кудосо, ушосо, школасо.
«Кинонть» велестэ велес пачтнесть лишмесэ. Пешксе крандаз эли нурдо эрьва кодат ящиктнеде! Течи тесэ «чаравтыть», ванды — лиясо. Секскак мерить тензэ азгонькай. Рузокс — передвнжка. Лембе шкасто тевтне седе пеедить. «Лытамскак» седе шождыне, невтемскак. Залгак лиясто а эрявкшны. Ушосо. Колхоз кой-зярдо рамси. Сестэ, содак, сыть веленек, ёколкай, кокша пря атянь пес. А кадовить эйстэст чирькекс мендявозь «одирьвасткак». Ливтнить клубсто-косто эземть, ламот кандыть эсест озамопель, кой-кить сельмень апак кончтне, кургонь автезь ваныть стядо.
«Варястонть» мейле, уш зярыя иень ютазь, тамашакс марявкшнось «Молодая гвардия» фильмась. Васня невтнесть эйсэнзэ буень велесэ, райцентрасо, Дубинькасо. Вансть эйсэнзэ колмо велеть: Дубинькадо башка, Орданьбуе ды Поводеле. Вансть зярыя чить. Минек велестэ, маряви, пачколесть Дубинькав потякай эйдень пес. Вете вайгельпеть телень киява ялго. Веть. Чоподава. Варштынь, мельсэнь, Сарай пандонть прясто кудов ветиця кинть лангс, ды эстень эзь кемеве: эзганзо эскелицятненень пе эзь неяво. Теке сулейть. Молить, молить...
Эцесть «кинос», ледстяса таго, кие-кода маштсь.
«Чэ-чэ-чэ...» — маряви тошки, прок эседензэ ёвтни аппаратось. Залсонть чопода. Валдомгали, кивчкаи аппаратонь объективстэ лисиця сэнела валдось. Эцицятненень эряви чополгалемась. Ванат, экранонть ало киякс лазось лыказеви. «Те мезень дюния?» — арсевлить апак сода. Аламос аштезь кепедеви ды теевезь варястонть невтьсы прянзо, теке кажварч, цёрыне. Варшты тей-тов, ды комсезь-комсезь, илизь нее, прок чомболкс чии киякссо озадо, эсензэ кондятнень юткс. Педявтсы вановтонзо экранонтень. «Кие мери, совинь билеттэме? Кие вал ёвты аволь свал тесэлинь?» А рединдерясы «чаравтыцясь», кадови, редясы — пукшотнень ванстомат, резинань шлангось ледстясы стяко совсеманть питнензэ. Потомксокс, пурцузокс цирнезь ливти истямось клубсто ушов.
Клубонок теезель церьковасто. Юрозо — кирьпецень. Аламонь-аламонь таргсесть сынст. Теевезь варяванть кинонь вечкицятне эцнесть сэдявксонть алов, тосто — залс. Эцнесть [109] каськава, вальмава, кенкшка, кие-кода ды кува маштсь. «Трудочиде» эзть нолдтне, ярмакт арасть. Секс эцесть. Кежтькак ушос кадовицятне пандтнесть. Саить ды каить ушосо урныця моторонть бензинэнь бакозонзо сал эли мезеяк лия. Чи-чих-чих, ды сон лотки, тееви пилес эциця кашт, толось мади. Кирнявты клубстонть шлангонзо марто механикесь! Кияк арась... Вешник азё зыянонь теицянть.
* * *
Оштнесэ пугнекшнесть покш, мазый, гайгиця лем марто кинонь театрат. «Октябрь», «Аврора», «Маяк», «Луч», «Заря»... Неке лемтнень шикаесть, седей ризнэвти, эрзянь велетнесэяк. Мерят, эрзянь келесь — валтомо кель. Малав эрьва чистэ ды аволь весть «мольсть» «октябрятнесэ» фильмат. Залтнэ чавот эзть эрсе. Ваныцятне невтезденть кецнесть, нусмакалесть, кежиявтнесть, янксесть... Кинось ульнесь моронь васень тонавтыцякс. Кавто эрямот: экрансо ды экранонть перька.
Превскак киньгак эзь сакшно: ютыть иеть ды истя вечкевикс «кинось» ды сонзэ мазый-покш театранзо чамить, ламот эйстэст теевить микшнема-рамсема, картасо ды лиясо мейсэ налксема таркакс, яжавить, каладыть. Потомдынзе аппаратнойстэ «чэ-чэ-чэ» марявиця гайтенть ды валовиця сэняжа валдонть, вейс пурнавома тарканть телевидениясь. Кие потомдасы те потомдыцянть кургонзо, кие, мезе сы тарказонзо?