Эрязденть арсезь (2010)/Эрьбань чи
| ←Телень ильтема чи | Эрязденть арсезь (2010) by , edited by Разгуляева Т. В. Эрьбань чи |
Инечи→ |
| Нуянь Видяз. Эрязденть арсезь: ёвтнеминестэ пурназь покш ёвтнема. — Саранск, 2010. — с. 112—115 |
[112]
| Эрьбань чи |
Эрьба, корцьк, |
Аштян мадезь каштлангсо. Пувтымим кашторкс. Велькссэнь авань чамазо. Ваны лангозон. Сельмензэ пейдить. Вить кедьсэнзэ сиякс цивтёрдыця пондакш пупорка марто эрьбань тарадке.
— Эрьба, корцьк, корцьк, корцьк! Эрьба, пансить нузяксчист, эрьба, ванстыть шумбрачист! Лездак кастомс превейнекс,.. Течи, эйкакшт. Эрьбань чи. Валгодо, шлинк чаманк! Саты удомс. Инешкипазось кувать удомадо течи а мери.
Налксезь-кольнезь эрьби минек, каштлангсо удомань таргсицятнень, вететнестэ седе вишкинетнень. Шалнозевинек. И-и-и, — цирнезевинек.
Кургонь автнезь, вешнетяно карсемапеленек. Мельга-мельцек, поцор-поцор валгтано лембень максыця «сёвонь пандопрястонть» масторов.
Ужосо пазаванть икеле кувтолдыть эрьбань зярыя тарадкеть.
[113] Стявтыця-пувтыця тарадкетне стувор лангсояк.
А пшкадема валт Пазонтень, а сюкоронь-мезень пидемат-панемат, а кодаткак илат. Весемесь, кода эрьва чистэ. Меритькак уш тензэ ламот, васняяк Иисуснэнь озныцятнень эйстэ, аволь эрзякс — Вербное воскресенье.
Истямокс кадовсь монь превс те Покшчись. Алкуксонь Эрьбань чись эрзятнень православияс панемадо икеле дух лияталь. Вай, кодамо мазычи нельгсть ды яжасть крёстонь кандтницятне!
Алтави те покшчись Вармаванень, Тундонь варматнень азоравантень. Чадыковонь васенце читнестэ, шкадо икеле кортазь кудосо, анокставить ярсамот. Озныть. Тердезь сыре авась лиси икелев ды марямга пшкади Вармаванень: максозо тейтертненень шумбрачи, ванстозо берянь кулядо, чачоволь паро сюро, раштавольть скалтнэ-реветне. Озномась прядовсь, ойсить стувор экшка. Неявить инжетнень ютксо урьвакстозь цёраткак. Сынсткак каванить. Тень кис ярсамодо мейле сынь ютавтовить «пирявксонь» пачка. Од цёратне ды тейтертне стить кавто ёндо «пирявксокс», шабрань кенерепакарень марямга. Эрьва инженть ютавтыть пачканзо ды кольнезь-пеедькшнезь, паронь арсезь, эрьбить эйсэнзэ. Кой-кинень понгони эйпарсте, сэредьксэнь марямга.
Ашолгадома ланга, зярс велесь уды, од ломантне сыргить чокшнентень сакшныцятнень кудоваст якамо — удыцятнень эрьбамо. Те эли тона кудонтень пачкодемстэ тейтертне морыть:
Стяка, урякай, стяка! |
Урьвась тапор-тупор лиси кенкшень панжомо. Тейтертне, жойсэ кортазь-пеедькшнезь, совить кудыкельде кудос ды эрьбить, кие понги, васняяк удомань таргсицятнень. Теить тень пеедькшнезь-моразь.
Вай, удодо, удодо, |
Теде мейле мельга-мельцек лисить кардазов. «Каванить» [114] сиякс цивторкай тарадкесэст скалонть, реветнень. Лишмень эрьбамсто ёвтыть валт:
Раужо пона лишмине, |
Эрьбань тарадкесэнть, кемсть, кирдеви лезэнь кандый, ормадо-тарводо ванстыця вий. Секскак эйсэнзэ «парясть» ломантнень ды ракшатнень. Чувтось ды те шкась, тундонь те покшчись макссть шумбрачи, паро поладыцят, паро-сюпав эрямо.
Кемсть... Паряк, те ульнеськак Паз?
Покшчинь ютавтыцятнень кудост эрьбамодо мейле од ломантне пурнавсть лейчирень содавикс таркас. Састь лия куротнестэяк. Зярыя ютконь тарка сыцятне куронь-куро стясть карадо-каршо. Яви эйсэст шалныця лейнесь. Васня васень курось моры колмо киксэнь морот-ивават, мейле — омбоцесь, васенцесь — омбоцесь ды седе тов. Эйсэст пшкадема Тундонтень, Вармаванень.
Вай, Вармава, Вармава! |
Теде мейле тейтертне ды од цёратне морсесть, истя жо мельга-мельцек, теке лувсонть, морот вий-анамат куростонть, конатне прялевсть то-ли, то-ли-ли мороютксо. Эйсэст шнасть тевень вечкицятнень, сялдсть нузякстнэнь-цёлактнень...
Весемеде мазыекс, лезэнь кандыцякс ды седеень кецневтицякс эрьбатнень эйстэ лововсь якстере тюс нетькс ды тарад эрьбась. Покшчинть каршо ваксозонзо аравтнесть мик ванстыця — илязт синдтре эйстэнзэ апак кевкстне.
* * *
Авам, тетям, койсэнь, Митя покштямгак, эзть сода кодамоль чачозо ды молевксэзэ те оймень кенярдовтыця чинть. Поптнэ-диаконтнэ амзордакшнызь сонзэ ды лемдекшнызь «Всрбань недлякс» ламо иеде сындест икеле. Визьксэнь апак сода саизь Иисусост кедьстэ пальмань лопанть ды венстизь тензэ эрьба тарадонть. «Пазонь цёрась», келя, пансинзе эйсэнзэ храмсо [115] торговицятнень. Кодамо кенгелема! Истя вана манчезь, райсэ-адсо ды локшосо тандавтнезь, нельгекшнизь Тюштянь пингень тундонь самонь покшчинек.
Школа, школа! Косолить тон, превень максыця, тонавтнема шкастон, мекс чатьмонить, мекс эзить ёвтне тень истямо мазый, моротнеде жойниця, тундонь ёжонь раштавтыця чиденть? Мекс валгак эзить ёвта «бачкатнень» нулгодькс, седеень пидиця тевдест? Чатьмонить, ды чатьмонемасот теить ды теят эрзянь раськенть икеле чивтемекс. Школа, школа!
Кезэрень эллинтнэнь ульнесь превейдеяк превей валмеревксэст-кармавтомаст: «Содак эсь прят!» «Познай самого себя!» — гайги рузокс. Зэмезэ сонзэ домка ды келей. Кармавты сон содамо аволь ансяк рунгот, кармавты седе парсте, штельксэнь пес содамс эсь раськеть эрямопингензэ, сонзэ коензэ-кирданзо, паксянзо-вирензэ, ломанензэ.
Марсизь школань-мезень тонавтыцятне те ёвксокс превей валмеревксэнть? Содылизь? Паряк, аволь весе — ламот. Теемс — мезеяк эзть тее. Сорность — сорныть нейгак! — ёвтамс вал, паро мель эседенек, эсенек Мастордо. Прок сон зярдояк арасель ды сынек те Моданть лангс та-косто Тештень Масторсто.
Рузонь школась — урень триця-кастыця. |