Эрязденть арсезь (2010)/Эйсэст эри...
| ←Янксема | Эрязденть арсезь (2010) by , edited by Разгуляева Т. В. Эйсэст эри... |
Эряк ды содак→ |
| Нуянь Видяз. Эрязденть арсезь: ёвтнеминестэ пурназь покш ёвтнема. — Саранск, 2010. — с. 221—223 |
[221]
| Эйсэст эри... |
ТЕЛЕНЬ маней, чамас авториця якшамо чи. Орданьбуень кияванть, кода лиятневаяк, ардтнить ансяк лишмесэ ды якить ялго. Трактортнэ-машинатне сыргозить ансяк моданть соркстамо шкасто. Кавто ёнга сияждыть, а вановат, ловонь келей-кувака кумбот. Керш ёнга, Дубинькасто самстон, палмантнень прява чиить-бийнить, пеняцить теленть лангс телефононь уськтне.
Валгсь чачома велев ветицям Сёвонь пандонть прясто ды ушодсь куземе каршонзо кувака вандора пандонть чамава. Велентень совамсто — учи эйсэнь — вастсамам, кода мерить, Чалдань Валдаень маралякс аштиця ведьгевезэ.
Молян канст марто. Канстось — гармония. Аволь кодамояк пачалго эли чугунка, а гар-мо-ния! Футлярсо. Дубинькань лавкасто рамамстонзо ванныя эрьва ёндо: лазонзо валдо-пижеть, чоподасояк цитнить, мехензэ — якстереть. «На, кирдаж, седяк!» — мерсь эсень кондямо од микшницясь ды венстизе тень гармониянть футлярс путомадо икеле. Мекс-бути кавтолдозевинь. Совась цёра. Сэрей, кувака чама, аволь келей лавтов. Прясонзо нолдазь пиле нумолонь кедень шапка. «Варчика, эрьга, цёра-парочи!» — пшкадинь тензэ. Покшкавтнеме «нумолонь шапкась» эзь карма. Каинзе кшнатнень лавтовонзо ланга ды эрязасто, мехтнень тетькезь, зярыяксть ютась верев-алов повтнень ланга. Кепедизе вановтонзо, лип шкас арсезевсь ды пештизе лавканть «На сопках Маньчжурии» Вальсэнть мелодиясонзо. «Саик, а маняват! — кецневтимим асодавикс ломанесь лавтовонзо лангсто кшнатнень каямсто. — Тонсь тонавтнек, чарькодьсак».
Ней вана мельспаронь кирдезь эскелян питнейдеяк питней чемоданонть марто ашосонзо прянь шныця паксяванть. «Кода а кецнемс?! Клубсонок карми улеме гармония! А карматано [222] донямо Пронянь Нюрань. Сонзэ эсензэ «струментэзэ», секскак весть тензэ пшкадят — марикскак а теи, омбоцеде — таго текесь, сави энялдомс. Саты, прядовсть сюконякшноманок! Ней ули эсенек, клубонь! Кие... седямо карми? Муеви! Деняень Миша парсте налкси-седи. Во! А ёматано. Нюраяк каштанчинь толганзо нолдасынзе», — пильгень чалгавкст путнить, молить, а кадовить эйстэст меленьгак.
Сась чокшнесь. Клубось пешкедсь од ломанде. Таргия кабинетсэнь шкапстонть валдо-пиже гармониянть, велявтынь залс ды венстия Нюранень. Сельмензэ полгарьгадсть! «Ды косто истямонть?» Покшкавтнеме, мейсэ сюпав Нюра, эзь карма. Озась колонна ваксс аравтозь эзементень. Ютась цивтёркай повнетнень ланга весть, омбоцеде, вить ды керш ёндо, окойники сайсь эрявикс аккорд. Залонть пештизе Шатровонь нувара, седейс авториця ды арсевтиця «На сопках Маньчжурии» Вальсэнть мелодиязо. Теке ведь лымбавкст чудсть, кайсевсть вейкест-вейкест лангс ламо вайгельсэ гайгиця аккордтнэ.
Тихо вокруг, сопки покрыты мглой, |
Кемень ямсят (парат) чаратано мелодиянть кунсолозь — тонавттано, маштыцятне, вальсэнь эскельксэнь а содыцятнень. Лиясто, седе эжемс, рестеезь, лиясто раксезь, макстано урокт. Кирькс, омбоце, колмоце. Пси, куш фуфайкаткак каик! Бозань Рая ялгинем тонавтомс а сави. Чаратано мартонзо даволокс, секень вант, лутавтано кияксстонть. Рая монь коряс алкине, стёжна рунго. Секс мартонзо вальссэ нарамось — аёвтавикс мельспаро. Монь лавтовс путозь варьгасо кедезэ, монь коморсо коморонзо анокан марямс чокшнень перть.
Вальсэнть полавтызе «Краковякось». Васня кедте кедьс кундазь теема мекев-васов зярыя эскелькст, мейле — чарама. Кельмемань весемеде кшувавтницясь, капшавтыцясь, эрьгела ёжонь сыремтицясь — «Полькась».
Клубонь ужотнева цитни, прок тандавтни, лекшесь. Уштнемс? Э-э-э, каня истямо ангарось уштови?! Сы тундось — уштсы. Теяк виде: якшамось тонавты эйсэнек чарамо-велямо, танцовамо. «Над волнами», «Краковяк», «Полька», «Гопак», седе мейле «Амурские волны» — истямо вана киштемань репертуаронок. Чарыть «даманок», содазь, аволь од модань туфлясо. Понань [223] кемсэ. Лембестэ оршазь. Варчик самс котасо — пильгеть сеске эй поколекс теевить. Ношкстат кудов прянь-полдань синдезь, стувтсак тей кинтькак. Чийнетяно, вальстэ-мезде башка, шешктяно, эвттяно... Лембенть лиясто а косто саемс.
* * *
Тюнголькс танцовамот, вальссэнек лангсо нарьгамот васенцеде неинь 1982-це иестэ Кавказга тейтернем Лена марто туристэкс азгондямстон. Ульнесь те Азербайджанонь Яламасо. Чокшне ланга варштынь чарамо-велямо таркас.
Ломантнеде площадкинесэнть — коткудавдо ламо. Коткудавтне тей-тов якить сэтьминестэ, эсест киява, аволь ормазкадозь, эрьвась кодамояк тев теи, мезеяк ды канды. Мезе неинь тесэ — эль эзинь укснозеве. Кирнявтнить, шешкить, поксарить пильгсэст, теке ве таркасо кувать аштемадо айгорт, яжить рунгост, стякшныть ниле пильге лангс, аватне тулдаскавтнить пукшост. Сценанть велькссэ экран. Эйсэнзэ полавтневить ламо тюссо эрьва кодат нулгодькс, тандавтниця кадрат...
Нельгизь ульцям, вальсэм, мартост од шкам. Кие? Шкась? Ломантне? А содан. Кие илязо уле, течинь «дыки-дыки-дыки-док» ды «бом-бом»-тненень, седеем ялатеке эзь изняво. Эйзэнзэ эзинь нолда. Нейгак, эрямонь чаром аловпандт ардомстонзо, эрить седейсэнь сеть валдо, паро ёжонь сыремтиця вальстнэ ды полькатне-краковяктне, эри эйсэст сёксень пизёлксокс палыця од шкам. Прогресс? Эскелькс икелев? Арась-арась, а эряви монень а се, а тона!