Эрязденть арсезь (2010)/Эйгакай
| ←Кие калавты эрямонь кирьксэнть? | Эрязденть арсезь (2010) by , edited by Разгуляева Т. В. Эйгакай |
Каштлангонь «ойна»→ |
| Нуянь Видяз. Эрязденть арсезь: ёвтнеминестэ пурназь покш ёвтнема. — Саранск, 2010. — с. 78—80 |
[78]
| Эйгакай |
Састь салава, прянь апак невтне телень якшамотне.
Лато алдо, курмотнень-кармотнень ютксто, муия каладо, илейстэ кодазь потмакстомо кептеренть. Муинь-кочкинь мандонеть-трокскеть ды «пандтния» эйсэст кедьгенть алксонзо. «Оп-па!» — эзинь кирдеве мельспародонть, марямга меринь меельце тарадкенть путомсто.
Ней теема весемеде «покшонть».
Якан-пакан кардазганть, совсян эжнеме кудоскак. Учан. Ванстан скалонок, Орголькаень, потмонь чамдома шканзо. Сон лекси-пувси, пори пореманзо кардсо. Окойники учовсь! Кшнинь коймесэ ливтинь кардсто, зяро эряви, «парочидензэ». Зярс эзь кельме, анокстазь чувтонь лапушкасо кайсинь-шлёпаинь трокскетнень ланга. А стяко лия велетнесэ те кирякстнемкайденть мерить «шлёберькай». Вадяшия, седе валаня улезэ. Видемтия рунгом. «Весе, кадык кельмевтсь!!» — меринь эськан ды [79] выр-выр совинь кудос эжнеме. Кедень тардить, куш гуекс выжнэк!
Ушосонть якшамо. Лиснян эйгакаем, рузокс — ледянкам, кельме ведьсэ валномо. Эно кода! Эесь алганзо теевезэ валаня, теке сулика, эчке. Авам музгорди: «Саты теть, кенкшканть шлыгордомс, кудонть кельмевтят!» Чатьмонян. Мезе мерят? Кедьсэнь кечине. Валнан «налкшкем» вечкезь ды мелень путозь. А стяко. Кептерне алксось, ванан, эенть эйстэ кармась цивтёрдомо суликакс. Истямо нолажтыця киньгак а ули! Весень икельдясынь. Муинь косто-бути човине пикспе, сюлмия кептерненть верькс кирькскезэнзэ ведьмекс, каинь кирякстнемкам потс, улезэ седе лембе ды чевте, олго пакшке. Весе, анок! Ванды пандопрясто ливтнезь ливтнеме карман! Киненьгак а сасаван.
...Чиезь-чиян Пупоркань вальмалов. Школадо мейле паро ладсо эзинь ярсаяк. Курок, седе курок тов, пандопряв! Ванан: икелень коткудавонь пизэ! Прок пурнавсть аволь ансяк Пичепень — велень весе эйкакштне. Веенстнэ вармакс ардыть пандалов, лиятне эйгакаест, салазкест марто кузить верев, сеерить, ракить, авардить... Шалт пенть келес.
Кой-кить юхадить алов озадо, кой-кить кирякстнемкаст лангс мадезь, кой-кить стядо! Кие кода машты, кинь кодамо мелезэ!
Празь прынь эйгакаезэнь, тохмадинь пильгсэнь ды «нармунекс», кедень кавто ёнов келемтезь, ливтян, лиятнень марто вейсэ тов, пандонь кочкарянтень. Лангсон нулат-валат. Варьгатнеяк варя потсот. Якшамо? Кодат якшамот, кодат ловт-кельмемат! Пси. Чамам палозь палы!
* * *
Верде алов ютан истямо содавикс, оймесэнь ванстовикс Пиче-пем куншкава. Ваннан асодавикс, прянь шныця, икельцетнень лангсо эсь пачкаст пейдиця од кудотнень лангс. Вана тесэль Пупоронь. Кадовсь ансяк юртось. Кукоря, модас ваныця кудыненть таркасо прянь кепедезь аштиця, келей вальма, ашо кирьпецьстэ путозь «церькова».
Лов. Сэтьме якшамо. Шказо талай чикуншкадо мейлень, кирякстнемань. Лоткинь. Ванан эйкакшпингем неиця Пупоронь икеле пандыненть лангс. Теке вишкалгадсь, матрась, теевсь вандоракс. Ловонь эчке велькссэнть а неяви сормавкскеяк, пильгень чалгавкскеяк. Чатьмони сэрей, покш [80] сельме кудось, чатьмони икелензэ марнэсь-пандынесь. Ашо каштмолема. Лангозост ваномсто, цийнезевсть пилесэнь кенярксто пешксе эйкакшонь вайгельть: ванькст, човинеть, гайгицят. Ансяк пилесэнь... Косот якшамодонть якстере чамаст? Мекс телень истямо маней чистэ а шалны умонь-умонь кецнемань явшиця пандынесь?
Эскельдинь ды поладыя ким. Мекс, а содан, сельме кочкарястон лиссь сельведень лембе эрьге ды аламонь-аламонь, апак эрязкале нолажтсь чамаумарьган.