Эрязденть арсезь (2010)/Чикуншка ёнов

From Wikisource
Jump to navigation Jump to search
Эрязденть арсезь  (2010)  by Нуянь Видяз, edited by Разгуляева Т. В.
Келей кенкш икеле. Чикуншка ёнов
Нуянь Видяз. Эрязденть арсезь: ёвтнеминестэ пурназь покш ёвтнема. — Саранск, 2010. — с. 166—170

[166]

КЕЛЕЙ КЕНКШ ИКЕЛЕ
Чикуншка ёнов

Нурька ким — школав-кудов — прядовсь. Лспнявлш гьгак аттестатонь макснема чистэнть Веждейс, келей-кувакалантс, чарькодеви, аволинь стя. Зяр-до-як... Инешкипазось эли кияк лията верстнестэ мерсь поладомс сонзэ, кодамо илязо уле — келей, рашков, вандора-аволь... — седе тов.

Ков?

Кода истя ков? Истямо кевкстема — ков? — инжекскак тень эзь пачколе. Тов, ансяк тов, валскень тештекс палыця мелем ёнов, ков аволь ве иень перть тердсь оймем, ков анокстынь эсь прям!

...Васенцеде икелень лсксп-пувсп, кинень-бути пеняци, сувсо усксиця, кувака пуло машина, васов-васов таргавозь чугункань ки, та-ков ардыця, эрязкалиця ламо-ламо ломанть, вайгельть... Минек велеш» клубс, кода тезэнь, вокзалс, зняро зярдояк эзть пурнавкшно. «Мезе тенст эряви? Мезе вешнить? Ков ки кирдить? Ков капшить? Мекс а эрявить ве таркасо?» — эвтить превсэнь кевкстематне.

...Чаронь зэртть, «кшнинь айгоронь» тандавтниця вешкемат, палманть, лейть, сэдть, кудот, кудынеть, велеть, ошт... Панжовсть ды ютыть икельган, прок киносо, келейдеяк келей ёнкст — од масторт. Весемесь васенцеде! Псиденть идемга вагононь панжадо вальмастонть а тукшнан, педязь пединь эйзэнзэ. Ванан, ванан... Анокан ваномс ветькак! Неезденть кеняркстнэ, абунгапематнеды лия ёжотне а кельгить мештезэнь. Ардан поездсэ! Те аволь ожо нерь озязнэкс «Коммунар» комбайнасо элI г «СТЗ» тракторсо, натой аволь «полуторкасояк». Поездсэ! Чарошедычаравтыцясг рангозь ледстнить вейкеде: васов, васов, васов... Шкань эрьва пельксэсь кувалгавты кинть, яви монь чачома пизэстэнь, вечкевикс Орданьбуестэнь.

Пандт, лейть, сэдть, кудот, кудынеть, велеть, ошт... Асодавикс [167] чамат, ломанть, асодавикс кельсэ кортамот, зэртть...

Редия, чувттнэ, сынст покшолмаст ды «чачост» аламонь-аламонь полавтовить. Килеенть таркас састь пирамида ёнов молиця сэрей топольть, акациятне, ванан, минексетнень коряс ламоксть покшт, рацянят, лиятат. Пси. Вальматне-кенкштне панжтнезь келес. Кшнинь ды пси сувонь виесь уски эйсэнек мельга-мельцек понгавтнезь пиже вагонсонзо чикуншка пелев. «Неть ёнкстнэсэ свал истямо пси? Кода вастсамизь? Мезе монь учи? Лиси-арась тевем?» — содавтнить мельга-мельцек кевкстематне, ансяк мелявтомс пек а мелявтан. Гувны, а максы мелявтомс потсон кенярксонь толось, конань кирвазтизе асодавикс эрямос совамось.

Монень кемгавксово. Ансяк топодсть. Весе монь: менеленть сэтьме сэнь вановтозо, мизолдыця чипаесь, вень менельсэ коль-някай тешттне, сельмс эциця мазычисэст чикуншкань балягатне, тейтертне... Весе сынь — монь, мон — сынст.

— Тук-тук-тук, — чави седеем.

— Тук-тук-тук, — кежейстэ чавить-зэрнить кияксонть ало кшнинь чаротне, ловить ютазь вайгельпетнень ды пачкодемазонок кадовозь шканть.

Ардтано ветенек. Минек велень содамось, Алькань Тамарань мирдезэ Семён, сэрей, виде рунго ломань, сонсь Тамара ды нинзэ марто асодавикс цёра. Сынь Морго велестэ. Семён марто ве велень.

Кись кувака. Поездэсь, пиже пулонзо ускозь, лоткси, кода кортыть, эрьва палманенть ваксс. Паряк, оймсеме? Окойники пачкодинек Ростовс. Ошось покш, кудонзо сравтневезь Дон леенть кавто чирева. Тесэ тенек учома чокшнес, мейле эряви озамс лия поездс ды поладомс кинек седе тов.

Сёма лелям саимим а мезень теемадо ошканть ютамо, тей-тов варштамо.

— Пиненек адя ёмсевтьсынек, — пеедькшнезь мерсь сыргамстонок.

1952-це ие. Сисем иеть, кода окойники пештявсь, кода энгамсь войнась. Ялатеке ламот цёратнестэ, конат ульнесть фронтсо, войнань оршамопелест марто эзть яво. Сёма лелям ашо-ашо кительсэ, прясонзо ашо коцтонь мазый картуз. Сырнекс цивтёрдыть лавтовонзо лангсо капитанонь погонтнэ. Сон важоди Бакунь вейке райвоенкоматсо. Тамара вастанзо марто сакшность велев, малавиксэст, тетяст-аваст варштамо.

Та-кодамо курова апак капша мольтяно Дон леенть ёнов. [168] Кудот, кудот... Вокзалдонть аволь покш ютконь ютазь, вановтонок вастовсть войнанть азарсь тевензэ марто. Пароль а неемскак...

Икеленек якстере кирьпецень вете-кото этажсо кудо. Ансяк лемезэ — кудо. Ульнесь истямокс. Эйстэнзэ кадовсть рудазов, тия-тува содсо артозь стенат. Вальматнень таркас — покш варят. Поркснезь, яжазь кудонть перька тапазь кирьпецть, кшнинь менчевезь балкат, жестьпеть, ашназа тюс пелькст... Война, война, мезе тон теят?!

Лоткинек «маштозь» кудонть каршо, чатьмонезь вантано ютазь апародонть ледстнеманть лангс. Зяро вийть ютавтозельть стявтомстонзо, зяронень якшамо шкасто макснесь лембе, чоподачистэ — валдо, зяро ломанть калмавсть алонзо...

Ошканть ветицям истят томбавозь, поркснезь, кулозь кудотнеде сонськак а соды зяро несь. Мон вана войнанть истят уро-пеензэ марто вастовинь васенцеде. Орданьбуескак сон пачколесь, ансяк аволь истямо тюссо. Секскак ризксэнь марязь, мик пелезь ванан тюшумбар нолдазь, калавтоманзо учиця ломанень пизэнть лангс. Содан, сы шка, ды тарказонзо путыть сэрей-сэрей, мазый-мазый кудо, ней вана...

Дононть тона чирев ютынек сэд ьга. Код амо кувака, сэрей! Те аволь Орданьбуень Кардалеень трокс путозь сэдесь. Ужока, аволь сондензэ ёвтневи «По Дону гуляет» моросонть? «Сон нардев, кувака, сядонь вайгельпеть», — морави эйсэнзэ. Сондензэ-аволь, молинек-молинек — прядовсь. Велявтынек керш ёнов. Эскелятано леенть чирева. Сельменек икелев понгсь кавто чаро лангс аравтозь, ожосто артозь кшнинь покш парь. Эзганзо сёрмадозь: «Пиво». «Вай, те таго мезе истямось? Орданьбуесэ истят парть эзинь неекшне!»

— Пси. Симтяно? — саизе прястонзо картузонзо, пацинесэ чаманзо нардтнезь, пшкадсь тень ветницям ды чатьмонезь стясь паренть вакссо мельцек-мельцек аштиця цёратнень мельга.

— Мезде? Ведень микшниця косояк а неяви, — кепедия вановтом кевкстицянть пелев.

— Каня пиядо симема а явавтнить? — пейдезевсь, налксезевсть чова турванзо.

— Мон а содан, — видькстынь тензэ виздезь.

— Содамо кармат... Бокал ды стакан, — ёвтась Сёма лелям микшницянтень ды венстсь ярмакт. Аламос аштезь велявтсь ёнон рамавксонть марто, венстизе тень кедензэ, ды мерсь: — Кирдть, од цёра!

[169] Саия човсо копачазь, тюжа ведь марто стопканть. Каваницям кепедизе эчке, пиядо пешксе суликань стака бокалонть, лекстясь-пувась човонтень ды апак капша копорязь явавтсь симеманзо. Копордынь монгак. Токавтыя кедьгенть турвазон омбоцедеяк. «Те мезень симемапель? А тансть эйсэнзэ, а чине, симемаяк а явавты...» — путынь эськан питне тюжа ведентень ды путыя пешксе стопканть микшниця цёранть икеле стуворнэнть лангс.

— Нартемкстэяк сэпей, у-у! — нардтнинь турван ды меринь марямга: — Кода симить эйстэнзэ?

— Ну-у, од цёра, мезеяк а содат... — муст-муст пейдезевсь каваницям чаво бокалонзо таркас путомсто.

— Паряк, — кавтолдозь ёвтыя мелем.

Сыргинек леенть чирева седе тов, чудеманзо мельга.

«Вай, авакай! — эль эзь кирнявто кельпрястон. — Те мень

визькстэмечи? Те кода истя ломань ютксо, весенень неемга, понкстомо-палявтомо, дюм штапо лужалемс ожо чуваронть лангсо?! Аватне, аватне, вантака, мезе теить! Ансяк визькс таркаст кекшезь... Прок тюленть кеверькшнить леенть чирева. Веенстнэ кунст мадезь аштить, лиятне — пекекиськест лангсо. Истя, маряка, рунгост чентить. Штапот, допрок штапот! Те кода истя? Каня ванькс ойме ломанть тейнить истя? Минек истятнэнь велестэнтькак кшувавтовлизь! Тесэ вант мезе теить».

Лейтурванть чирева эскелязь, пачкодинек пляжонть тона пес. Рунгт, рунгт, рунгт. Цёрань, авань, эйкакшонь... Киськест ламотнень тюжат. Прок чурькалукш ведьсэ артозь. Пси чуваронть ланга мольтяно чатьмонезь. Перькан неезенть эйстэ мельтне чарыть-велить превсэнь. «Мекс тевтеме аштить? Каня теемс а мезе? Кизэнь куншка... Анокстама пенгть, тикше, кочкама-вальсема модамартнень, лия эмежтнень, витнема пирявксонть... Тев а муить! А? Косто андовить зяро телюгайтне-пряболатне?! А виздитькак, шаншилт, киськест, куяв чевте таркаст невтнемс эрьва ютыцянень ды лужалемс чинь-чоп! А содыть, пиштякат, козонь виест путомс, минек велев савольтькак...»

— Саты, шка велявтомс мекев, — Сёма лелянь вайгелезэ лоткавтынзе машнетеман-арсеман. Путсь мельгаст прядомань тешкс.

— Сакшномскак, Сёма леляй, тей аволь эряво, — лиссь кургстон, — мезе, ваномс неть дёго ломантнень лангс?

— Одат, цёра. Те ансяк ушодкс, — редизе кинь ялгам ды мельспаросо пейдезевсь. — Ужо-ужо, те — балягань панжовксто [170] ансяк башка бельгинеть, ламо-мезе сави теть неемс-марямс, ламо мезес эртевемс.

...Пельчасоньютазь ульнинек вокзалсо. Чокшне озынек лия поездс ды поладынек кинек Бакув. Т ато, зярс эзинь матедеве, кунсолынь скимевтезь валдосонть ускицянок калгодо моронзо. «Тук-тук-тук, ... трах-та-рах», — чавсть-зэрнесть кшнинь вийсэст чаротне. «Тук-тук-тук», — ней седе сэтьместэ, марявсь тень, чавсь седеем.

Кунсолозь-арсезь, сельмень конявсть. Матедевинь. Туинь зярыя часос эрямостонть, туинь тов, косто, сы шка, зярдояк уш а мурдат, асат...