Эрязденть арсезь (2010)/Тонавтыця
| ←Кулянь явшиця | Эрязденть арсезь (2010) by , edited by Разгуляева Т. В. Тонавтыця |
Чанстень тешкс→ |
| Нуянь Видяз. Эрязденть арсезь: ёвтнеминестэ пурназь покш ёвтнема. — Саранск, 2010. — с. 139—144 |
[139]
| Тонавтыця |
Алтави Пошань Аркайнень ды Эмилия Владимировпанень Московсо, Тимирязев лемсэ академиянь курсатнесэ, патентоведениянь лекторось истя мерекшнесь тенек: «Волгась», маряка, аволь трактор, ансяк аволь машинаяк... Те ульнесь ютазь пингень кавксоньгеменце иетнестэ.
Пингем перть кие ансяк эзь эце удемень сормсевксэзэнь превть: тетядон-авадон башка, школань тонавтыцят, доцентт, профессорт, заслуженнойть, пельсзаслуженнойть... А лововить. Ламотнень эзть ванстово превсэнь аволь ансяк чачост, леместкак. Ков салынзе шкань вармась, а содан.
... Войнань шкасто ды прядомадонзо мейле иетнестэ школатнесэ тонавтыцят эзть сатно. Путнесть войнасто сыцятнень, конат куш аламнеде маштыльть тонавтомо. Истямотнестэ вейкесь — Пошань Аркай. Минек велень сэрей, човине од ломань, Пошань Юрикень лелязо. «Тосто» самодонзо мейле, кода ламот лияткак, талай якась офицерэнь формасо. Лётчикень сэнь каркс картуз, кем ланга нолдазь пиже-ожола кувака понкст, китель. Истямокс кадовсь превзэнь те ломанесь.
[140] Куроксто формань кандтницянть лемдизь лиякс, велекс — Полторань Аркай. Сэрензэ кис. Рунгозо натой видестэ эзь кандовояк. Алкукс. Аламнеде мендявозь якась. Казак Миша, Орданьбуень васень раксевтицясь, згилямонь вечкицясь, вастовомсто кевкстилизе:
— Аркадий Иванович, кода тосо, вере, — зяро градуст, якшамо?
— Иля пеле, Миша, тонь боцька пекесь, псияк ули, а солавтови, — цяхазь мериль каршо «курсясь». Мезе-мезе, Полтораяк маштсь валсо цгшькаеме. Зепс эзь эцне.
Сэрдензэ башка, Аркадий Ивановичень лиятнень эйстэ явовсь, тагояк мерян, кельсэнзэ: урокс пшти ды оекс валаня-чевте. Сон ламо ловнось, ламо содась, секс ёвтнеманзо потмакст а содыльть. Ёвтни — ведь валы.
Содась-эзь школань программатнеде ды минень-сюнонь плантнэде, тейнесь-эзь сынст — а содан. Паряк, содаськак, ды эзь лово сынст эрявиксэкс, Сонзэ эсензэ програ.ммазоль, ды, секень вант, седе видель.
...Совась Аркадий Иванович классозонок. Тарчксонть трокс ютамсто прянзо комавтызе — илязо палаво конясонзо кенкш верьксэсь. Кедьсэнзэ кавто книгат: газетасо вельтязь классонь журнал ды кодамо-бути лия.
Лодор-лодор стинек.
Тонавтыцянок ютавтызе ланганок вановтонзо ды озась стуворонзо экшс. Чи-и-корк мерсь алонзо стул ось. Миньгак озынек. Панжизе классонь журналонть ды таго кепедизе вановтонзо.
— Тэ-э-кс... Весс тесэтядо?
— Весе, весе! — каятотсть вайгельть.
— Пушкинэнь биографиянзо тонавтнинк?
— Тонавтнинек!
— Истя эрявияк! Кие маштыцязоль, содасынк?
— Содасынек!
— Истя эрявияк. Татьяна Ларинань а човорясынк Грохань Олдай марто?
— Арась, арась!
— Тэ-э-кс... Паро, колганонк аволь чавот. Ней кунсолодо!
Пекстызе журналонть ды айгизе ве ёнов. Панжизе икелензэ книганть. Муизе эрявикс ёнкскенть. Ушодсь ловномо. Ловны валтнэнь лаксезь, валакавтнезь, ёжонь марязь. Эрьвась соваволь превс. Вайгелезэ то кепети, сыреми, то кельми, юты тощкамос. Вана Аркадий Иванович, вана Полтора Иванович! Артист! [141] Маштат, маштат икелеть аштиця наразь ды пацянь кандтний прятнень кедькоморсо кирдеме.
Кунсолотано кургонь автезь.
— Пли, пли! — каятотсь Аркадий Ивановичень аламнеде цийниця вайгелезэ, марявсь школань келес.
Серьгедемстэ аламнеде стявсь таркастонзо ды бонтядсь мокшнасонзо стуворонть ланга. А матедеват! Аволь кода кой-кинь уроксо. Оймась, вайгелезэ одс тусь чудезь сэтьме чудильмава. Зярыя шкань ютазь таго теке:
— Пли! Пли! — соракавтынзе вальмань суликатнень.
Истя Аркадий Иванович — сельме удалга Полторань Аркай — ловнось тенек Войничень «Оводсто» саевкст. Ловнось — чатьмонинек, лотксемстэнзэ ливтиця карвось маряволь.
Курок «Оводонок» прядовсь. Тонавтыцянок каизь. Паряк, сонсь тусь. А содан. Арасель дипломозо? Эзь вечке плантнэнь-программатнень? Кие, кодамо прявт вечки ды вечксь эсь превсэ эрицятнень? Улезэ кода ушмантнэнь туртов уставтнесэ, кода мерезь: а икелев, а удалов, а витев, а кершев.
...Дубинькань школас кавксоце, «мордовской» класс сисемтнеде мейле пурнавинек Орданьбуестэ, Кочкурвелестэ, Поводелестэ, Моргосто, натой Ломат татаронь велестэ... Кода понгсть «мордовскоентень» татаронь тейтернетне ды цёрынетне, конатне вал эзть сода эрзякс, а чарькодеви. Мекс аволь рузонь класс? Рузыявтомс эрзятнень? Кадомс содамочивтеме? Паряк, нарьгамонь кис? Лиснесь истямо амазый тевгак: кие-бути эйстэнек кандсь кудосто тувонь куянь пал. Мольсь татаронь цёрыне ваксс ды зярыяксть ютавтсь саласонть турванзо ланга. Те татартнэнь туртов покш покордамо. Паро, куш эзть тюрьгадокшно! Сэтьмель цёрынесь. Уроктнеде башка, содави, кортынек эрзякс, секс татаронь эйкакштне минек юткс кодаяк эзть соваво. Марясть пряст апак терде инжекс. Текеде зярыя шкань ютазь вейкеяк юткстост мартонок эзь кадово. Ков тусть? Киненьгак прядовсь средней школась? Кие ульнесь содамочивтеме кадовтыцяст? Кодамо седей?
...Классозонок совась однэ, раужо черь-сельме тейтерь. Сэрейне ды стёжна. Валдо-якстерьстэ артозь турванзо човинеть. Судозо човине, кувака. Вайгелезэ — сиянь баягинень гайть. Келень апак содаяк чарькодьсыть валонзо. Сынсь эцить пилезэть.
— Эмилия Владимировна, — ёвтызе лемензэ стувор лангс [142] журналонзо путомсто ды варштась лангозонок, — будем знакомиться...
Эрьвась эйстэнек мельга-мельцек ёвтызе фамилиянзо. Ёвтамсто стякшнось.
Литературань од тонавтыцянок уроконь перть ёвтнесь Лермонтовдо, сонзэ «Герой нашего времени» книгадонзо. Печориндэ ёвтнесь аволь кода тонавтнема книгасонок сёрмадозь, эсензэ валсо-мельсэ, кодамокс неявсь тензэ те отькересь, те героесь, сонзэ ялганзо ды сынст эрямо шкаст.
— На сегодня хватит, — мерсь мизолдозь, ды сеске гайгезевсь баягинесь. Сёлгизе классонь журналонть, мерсь «до свидания» ды цок-цок лиссь нупальстэнть.
Ниленьгемень вете минутатне марявсть ве минутакс. Кудов мезеяк эзь максо. Вай, те кода истя?
Абунгавтымизь Эмилия Владимировна омбоце урокстонзояк. Тешкстынзе кить арасть, пекстызе журналонть, ёвтась пеедькшнезь зяро-бути мельть-валт Пушкиндэ ды ушодсь аволь книгасто, превстэ, книгас апак вано, ловномо «Евгений Онегинэнь». Теке тонавтниця, аламнеде виздезь, стясь классонть икелев ды ёвтынзе васень валтнэнь. Васня та-кода тошказь, салава ладсо. Аламонь-аламонь вайгелезэ совась вийс, келемтинзе сёлмонзо ды пештизе классонть. Марявсь, ушодызе панжиковонь сэнь моронзо норовжорчось. Гайгсть пилесэнек аволь ансяк валтнэ, валпелькстнэяк, эрьва буквась. Ламодо ёвтнесть тешкстнэ. Кунсолотано — кашторкс а марят.
Придёт ли час моей свободы! |
Прядызе ловноманзо. Мельспародонть мизолдозь, шождынестэ таргизе оймензэ ды апак капша озась тарказонзо. Талномадонь чамаумарензэ якстерьгадсть, сельмензэ кувтолдсть кенярксстонть. Неявсь, сизесь. Каштмолинек а кувать. Эзинек кирдеве: цяпамонь шалтсо путынек пе театрань спектакля ёнов молиця уроконтень. Ютась — эзь марявояк. Кунсолынек — кияк вал эзь правто. Ульнинек мунязь-колдовазь.
[143] Истямо вий, истямо ойме вий кирдевсь те, лангс ванозь аволь виев, ломаньсэнть. Истя ламо сон содась.
Ютасть ламо иеть. Школань прядомадо мейле Эмилия Владимировнань вестькак эзия вастне. Марсинь, важодсь Сарансо, содамочинь министерствасо. Неевлия, меревлинь: «Сюкпря, Эмилия Владимировна, улевельтькак школатнесэ седе ламо Тонь кондятнэде, Пушкинэнь содыцятнеде, уроконь ветямо маштыцятнеде, «Волга» тракторстонть умок теевельть алкуксонь, неень шкань, иномаркатнеде нардев, виев ды мазый машина».
...Тонавтыцям абунгавтокшнымим мельсэ кирдевикс, превстэ, книгас апак вано ламо стихень ловномасонзо. «Те кода истя, каня кирдевить удемсэть зняро валт-мельть? — аволь весть содавтнимим кевкстемась. — Ёвтни, ёвтни, вестькак а пупорди, жойсэ певерить валонзо». Косто-бути, теке марто, ловнокшнынь: кой-кить, книгас вестькак апак варшта, мазыйстэ-валанясто педе-пес ловносызь, маряка, «Евгений Онегин» весе романонть! Истятнэ тень марявсть Пазонь масторсто сыцякс, содавтнимизь, видьстэ мерян, акемемань мельтькак.
* * *
Ютазь пингень кавксоньгеменце иетнестэ токакшнымим «орма»: совавтомс лавтов лангсо кандтневикс «компьютерезэнь» Пушкинэнь, Лермонтовонь, Блоконь, Некрасовонь, Есенинэнь, Артур Моронь, Сульдина Анянь зярыя стихотворенияст. Весемеде покш мель явинь ды яван Сульдина Анянень, эсенек велень морыця ойментень, ды ёнонзо молиця Есенин Сергейнень. Есенинэнь кондямо поэт, койсэнь, зярс эзь чачо. Ды, содан, зярдояк а чачи. Морокс гайгиця, седей потмакссто лисиця, ды ёжодо домкасто ёвтниця сонзэ стихтне киньгак лиянь ваксс а путовить. Поэтэнть санга чудсь эрзянь верь. Паряк, теяк педявтсь монь эйзэнзэ?
Теинь сестэ, ней уш васов-васов кадовозь, зярдояк а мурдыця шкатнестэ, покштояк покш панжовкс. Сон вана кодамо.
Пазось эрьванень максы келей-домка, ловт, потмакстомо превпарго. Малав эрьванень! Ансяк чуросто, вельть чуросто кинень сон а пештяви пелевидьгаяк. Чуросто кинень совавтовить удемень менчевксэзэнзэ «Онегин» ды лиятне. Пек чуросто! Тувталось вейке: ламо-ламо шка ёртнетяно шукшпряс. Мезекскак аэрявикс, чаво тевс. Чистэ чис, иестэ иестонавтнезь-арсезь, кельгевельть сормсевкстнэс Пушкинэнь весе сёрмадовксонзо, мелень [144] путозь нерьгевель, секень вант, Марксонь «Капиталозояк».
... Мон поэзиянь содамочинь таштакшнынь важодеме ды мекев автобуссо-троллейбуссо ардтнемстэнь. Стян козоньгак ужинес, таргаса зепстэнь блокноткем ды ушодан, эйзэнзэ шкань-шкань варштнезь, эсь пачкан эли мотордозь превзэнь стихень совавтомо. Ардан тов, мекев — час, омбоце, колмоце... Зяроксть, зяронь кирда одс ды одс ловнови тонавтнема-пелесь? Каня ловови! Ардтнеман перть карминь превсэ кирдезь ловномо Есенинэнь «Анна Снегинанзо». Часонь перть! «Вачкинь» сестэ удемезэнь поэтэнть ламо стихензэ. Сындест башка карминь содамо Пушкинэнь, Лермонтовонь, Блоконь, Сульдинань стихть... Лисни, кодамояк дюния, Пазонь тешкс а эрявияк — эрьванть вийсэ содамс «Фаустонь», «Божественной комедиянть», текекс, мертяно, «Евгений Онегинэнь». Сульдина Анядо, Артур Мородо а мезть кортамскак.