Эрязденть арсезь (2010)/Тердтянзат чачома кудот...
| ←Берянесь вадрявтомо а эряви... | Эрязденть арсезь (2010) by , edited by Разгуляева Т. В. Тердтянзат чачома кудот... |
«Аттестат зрелости»→ |
| Нуянь Видяз. Эрязденть арсезь: ёвтнеминестэ пурназь покш ёвтнема. — Саранск, 2010. — с. 173—175 |
[173]
| Тердтянзат чачома кудот... |
Бакув пачкодинь велень цёрынекс: ташто-ташто понкссо, кедьсэ, аволь машинкасо стазь, ашо, раужо кикст-кикст панарнэсэ, пильгсэнь — понань цюлкат ды карькскесэ трокс сюлмазь, аволь ве ие кандтнезь колошат. Истямокс, прок менельстэ валгинь, гай кизна понгинь псисэ лексиця чикуншка ёнксонь ошс.
Монь «гардеробонть» кувалма Витя лелянь ды аванзо ютксо кухнясо лиссь, мария икеле нупальстэ, истямо кортамо.
— Авай, ванды оймсемачи, арсян ялаксонть (те монь!) саемс Сабунчив, ютатано тия-тува, базаров варштатано. Мезть кандтни пилысэнзэ — визькс мартонзо ушов лисемс. Ютадо течи тескень лавкатнева.
— Монгак, Витякай, текеде арсинь, — вемельс прась цёранзо марто сырепатям, сонсь керсесь помидорт-чурькат — анокстась салат.
Кортамось мольсь, чарькодия, колошадон.
Таштт, раужо цивтёркаест умок човсевсь, теде башка, карьксэнь килькшкесь — молемстэ илязт шлакно. Понксон-панаронгак седей эзть кецневте. Кедьсэ-салмукссо стазь... Кие тесэ истямо оршни.
...Ютынек Раманы посёлкань весе лавкатнень. Эйстэст тесэ колмо-ниле. Вейке этажонь. Кевень, содазь. Тесэ аволь Орданьбуе, чувтонь кудо а неят. Васня ламоксть, истяяк-истяяк онкстнемадо мейле раминек кедень аволь питней раужо тюс котат. Кецнемадонть аноколинь кидеяк апак визде киштезь туемс. Онстонгак истят эзинь некшне! Пря ялатеке эзинь невте.
Сырепатям превсэнзэ кирдсь мезе-бути лия. Мезе — чатьмонсь. Ушодсь лавкатнес совсеме омбонькирда. Ветни эйсэнь чатьмонезь. Кортамозояк... Сеске сонзэ, авань патянть, а чарькодьсак: колмо-ниле валт ёвты эрзякс, вал-омбоце — рузокс, прядсы, тагояк мерян, азербайджанокс. Човор. Секс, паряк, ламо а кортнияк?
— Вана-вана сеть котатнень, — мерсь кисэнь мелявтыцям уш аволь од микшниця авантень азербайджанонь кельсэ ды невтсь сурсонзо ашо, теке ашо гулькат, карсемкатнень лангс. — Эти, эти!
[174] Пирявкскенть тона ёно раужо сельме, мельс туиця чама авась чатьмонезь, та-кода мельде-валдо, теке аволь сонензэяк пшкадстькак, венстинзе вешезетнень.
Коминь. Тонгия эйстэст вейкенть вить пильгезэнь. Цюр, прок монь пильгс стазьгак! А покшт-а вишинеть. А лепштитькак. Видемтия рунгом. Теинь мекев-васов зярыя эскелькст. Нежединь пильгесур лангс. Вадрят! Самай-самай монь коряс.
— Сайсынек, — мерсь сырепатям «кельтеме» микшницянтень ды венстинзе коробкас путозь «гулькатнень» монень. — Монь пельде казнекс. Покшчистэ кандтнемакс.
Кеняркстонть оймем мештезэнь эзь кельге...
Сыргинек кудов. Лапужа лато вейке-кавто этажсо кудот, чувар, кевть, чуросто-чуросто вастневиця верблюдонь пупий тикше. И-и, те аволь Орданьбуе, кумбокс ацавозь пиже лугине а неят, а неят килейгак. Коштоськак аволь минек ёнксонь. Нефтань чинесь маряви эрьва косо.
Молемстэ кортазевинек.
— Сырепати, омбонстнэнь мезекс рамить? Мон зярс косояк а важодян. Колхозов ансяк мартот якан. Тень эйсэ лезксэмгак.
— Кунсолок. Мон теть а весть ёвтнинь мелявкстон: куш ве чис, ве кивчкадемас понгомс Орданьбуес! Улевельтькак сёлмон, ливтявлинь кудонок вальмалов, икельганок сравтовозь луганть лангс, ледстявлия эйкакшпингем, кеман, весе орман, чачома масторонь коштсо лексезь, паневлинь. Тесэ мезе? Чувар... пупиця тикше... Косто тестэ неят Орданьбуень кондямо пиже лугань кужо? Улевельтькак сёлмон... — ёвтницясь кувакасто таргизе оймензэ ды нусмакадсь.
— Ды мезе? Адя сы кизэстэ ардтнетяно! — кенярдозь меринь каршо.
— Э-э, Видязкай, шожда меремс, ды стака теемс... — зярыя эскельксэнь ютазь поладынзе сэпейчиде пешксе валонзо. — Ашо котатнень рамамсто сельмень икельга таго сравтовсь перед домом лугинесь. Седеем сювордызе бедась. Содан, чачома масторов а понган, куломс придётся теске. Течи валске Витя марто кортамодонок мейле арсезевинь: кадык куш сазоронь цёразо монь таркас лиси луга лангс рамазь котатнесэ! Тон, кеман, а кадоват тезэнь. Тесэ ят ёнкст. Зярдо а зярдо тердтянзат чачома кудот, тердтянзат ават. Марить сынст тердемаст. Ванозо эйсэть ды лездазо теть Верепазось. Илязо лисе как у меня. Сеедьстэ [175] приходит превзэнь: эрьвась бажазо мурдамо тов, косо васенцеде ёвтызе «авай» валонть.
* * *
Авань патянстэнь кодгемень малаваль. Эрямось човсесь эйсэнзэ аволь аламо. Содась, мезть кортась. Лиссь валонзо коряс: эзь юта иеяк, аню котан пижелгалесть Орданьбуень кудотнень икельга пиже луганть ланга яказь. Рамицяст вана, сырепатям, кавто иень ютазь — пачтясь Витя — кулось. Калмизь, мезде пельськак, лия масторонь чувар модас. Ней уш тоначисэть цёранзояк. Калмазь кие косо. Кияк лемест кундамо калмолангозост а сы, кияк а варшты, валнэ а ёвты. Мекс ламот истя шождынестэ, ризксэнь апак маря тукшныть чачома масторстост? Мекс а арсить таркадонть, козонь мадить удомо а сыргозтевиця удомасо?