Эрязденть арсезь (2010)/Марявсь, ледсть омбоцеде...

From Wikisource
Jump to navigation Jump to search
Эрязденть арсезь  (2010)  by Нуянь Видяз, edited by Разгуляева Т. В.
Марявсь, ледсть омбоцеде...
Нуянь Видяз. Эрязденть арсезь: ёвтнеминестэ пурназь покш ёвтнема. — Саранск, 2010. — с. 60—62

[60]

Марявсь, ледсть омбоцеде...

ТЕТЯДОН ледстнемакс кадовкшность парсеень ашо шарфозо, зепсэ кандтневиця часонзо, портфслезэ, книганзо ды... велосипедэзэ. .Авам ванстсь эйсэнзэ. Кемсь: мурды азорозо. Миненек эзизе максне. Ды ардтницятнсяк кодат ульнинек: вейкесь вейксэтнень трокс эль эскельдясь, омбоцентень кавтодо седе аламо. Кемсь, кемсь аванок. Ушов лисемстэ яла ванкшнось келей киланго нть пелев, яла учось. А сы вановтонзо икелев азорозо?

Ансяк шкась... шкась стямо, куш килькш кирьгазот каяк — [61] стуворонть лангс путомс а мезе, а мезде андомс эйкакш керьксэнть. Коморнэяк эзь кадово почтнэде. Косто саемс? Кинень пшкадемс? А кинень. Эрьва кудосо ней теке кажось. Эрьвань мелявкстнэ некеть.

Тундось яки-паки вальмалганок. Чикуншкава валдозо совси кудоскак. Мадни стуворонть лангс, кияксс. Ялатеке якшамо. Каштлангсотано. Мон, Коля ялаксом, Веруш. «Сёвонень пандостонть» зярс эзинек кадставо.

Глянкадсь циндересь. Чикорк мерсь кудыкелькс кенкшесь. Совась, эскельдясь тарчксонть трокс сэрей, аволь келей лавтов, авань чачо цёраломань. Сыресень Миколь. Эрить Сыресень эйстэнек васоло. Покш куринкасо. Сыцянть эзизь сае фронтов — «броньсэ», важоди комбайнёрокс совхозсо. Апак учонь инжесь ютась икелев. Озамс эзь оза.

— Васют, Олодянь ульнесь лисапедэзэ, — апак шумбракстне ушодсь чувтола кель совицясь. — Каинзе варьганзо. Саинзе ве кедьс. Авам аштесь каршонзо.

— Аволь ульнесь — ули. Оно косот чаронзо, лембе таркасот, — ахолдась кедьсэнзэ авам. — Моргасот, стенас понгавтозь. Сонсь кудыкеле. Олодя туемстэнзэ мерекшнесь истя кирдемс... Мекс ледстик?

— Мон, теня, рамавлия, — варштась ды невтсь вить кедьсэнзэ эекс понгавтозь чаротнень ёнов чокшне ланга якицясь. — Ялго стака пачколемс совхозов. Лисапедсэ седе ён улевель.

— Арась, Миколь, а миса. Олодя сындеряй, мезе мерян? — нолдызе прянзо авам. сускизе, а авардезевемс, алце турванзо.

— Сон жо... — эль эзь мене цёранть кургсто «чавовсь» валось.

— Мезть а эрсить? Оно, Кажань Грига лангскак сакшнось калмамонь конёв. Ковонь ютазь сась пельдензэ сёрма, — мусь валт, оймавтсь эсь прянзо авам.

— Эрсить, эрьва мезть эрсить эрямосонть, — вемельс прась Миколь. — Иля мелявто, Васют, иля ризнэ. Ансяк сазо, одгак рами. Вансак вана.

Авань мельс, улема, ледсь оймень чентиця кевкстемась: «Мезе ванды путан стуворонть лангс? Мезде андсынь чавка левкстнэнь?».

— Зяро максомо арсят? — варштась Миколень сельмс, пшкадсь седе чевтьстэ трицянок-кастыцянок.

— Пондо товзюро, седе ламо а максан, — ёвтызе питнензэ рамсицясь.

— Пондо ансяк?! Кавто-колмо фунтт куш путт ланга, — [62] нусмакадсь тирям. — Яжавтомань кис зяро пандома... Мезе кадови?

— Пондо, Васют, ансяк пондо, седе ламо арась, — эзь пота, содась эсензэ Миколь. Вить кедьсэнзэ нежедсь стувор чирентень.

— Ну мезе теят, истя улезэяк, — потась, мельтеме прядызе пелькстамонть авам ды кепедизе паця пенть сельмезэнзэ.

Ютась каштомикелев ды валгстынзе стенас понгавтозь чаротнень. Надяй патям совавтызе кудыкельде раманть. «Идицянок» саинзе кавто кедьга, пилысэ панжизе кенкшенть ды увол-авол лиссь кудостонть.

Теевсь општ.

Марявсь, Нева леенть чиресэ маштозь, ловсо вельтязь тетязонок ледсть омбоцеде.