Эрязденть арсезь (2010)/Каспий чиресэ...
| ←«Аттестат зрелости» | Эрязденть арсезь (2010) by , edited by Разгуляева Т. В. Каспий чиресэ... |
Чумом эзь нолдаво→ |
| Нуянь Видяз. Эрязденть арсезь: ёвтнеминестэ пурназь покш ёвтнема. — Саранск, 2010. — с. 177—180 |
[177]
| Каспий чиресэ... |
Эрьва чистэ кавто спектаклят. Сеедьстэ ардтнетяно васолга сравтневезь районтнэва. Бузавны, Сураханы, Сабунчи, Маштаги... Пачколинек Артём усияскак. Ардтано эзганзо, кавто ёнга — моря. Эзь савкшно тень улемс ансяк «Нефтань кевть» таркасонть. Спектаклят, спектаклят... Чить, чокшне — театрасо, косояк клубсо, ушосо. Сындест, важодемадонть лекстямо шканок вейке — атянь-чи, пондельник. Лия читнестэ эсь тевдеть иля арсеяк. Уск. Кодаткак кортамот илязт уле. Истя эрявияк! Эно кода лиякс? Ускан. Важодема тарказон кись аволь нурькине. Сави зярыя эскелямс ялго, мейле — электричкасо ошонть куншкас. Мейле зяро-бути таго ялго.Тонадынь. Чиян, ардан, теке мезеяк араськак.
Театрасонок кавто труппат: азербайджанонь ды рузонь. Стявтнетяно декорацият, путнетяно стенат-вальмат, аравтнетяно стуворт-мезть кавонест туртов. Мушкирэть свал улезэ пштидезь карксот экшс, свал ульть анок. Картинатнень ютксо декорациятне полавтомат эрязасто. Аптюконь дылыямс шка а каднови. Тевть, тевть, тевть...
[178] Кемень ваныцянь икелев артисттнэ налксеме а лиснить. Превскак истямось а совси. Залось свал пешксе. Умарентень, кода марсеви, а козонь прамс! Теке «мазысь» райононь Культурань кудотнесэяк. Тесэяк лембе вастомат, кувать а оймиця цяпамот. Кодаткак каванямкат спектаклядо мейле арасть. Вачкасынек машинас курмонок-кармонок ды — сеске кудов. Текекс артисттнэяк ды лиятнеяк.
Репертуарсонок «Репка» («Турп» азербайджанокс), «Кот в сапогах», «Тайна двух океанов», «Аттестат зрелосги», Мольерэнь «Проделки Скопена», Островскоень «Не было ни гроша, и вдруг алтын» ды лиятат. Улкоть «грошось» нилесядоцеде мольсь! Рекорд. Лия кодамояк пьеса зняроксть эзь путневе. А ютни сельведтеме «Хижина дяди Тома». Жаль маряви Том негрась. Эйкакштне-ваныцятне сееремас пачколить се эпизодонть ваномсто, косо Том сюлмсеви чувтос ды «ашо» плантатортнэ равтыть эйсэнзэ локшосо.
Эйкакштне сельмть ёзыть, марсевить ильсемат, а рольтнень налксицяст ютко шкасто, антрактсо, зярдо совить кулисатнень удало нупальнезэнек, цяхить.
— Ха-ха-ха, ну кода, марявсь, вечкевсь локшонть танстезэ? — згили ашо плантаторонть налксицязо Михайлов, аволь покш, эряза ломань. Сон локшосонзо ахоли аволь налксезь. «Паравты» Томсо весе вийсэнзэ, алкукс.
— Марявсь, марявсь, — пейди, нулновтни прясонзо партнёрозо Иван Мокроусов, сонсь сювори мокшнанзо, — вандынь пьесасонть тонгак «марясак», кирдть, калгодот, неят, «салдырьксшкат»! Несак?
— Ха-ха-ха! Тандавтымим... Сы спектаклясо мушконь локшонть таркас саян кшнань. Гуйкс кармат менчевеме.
— Вансынек, вансынек кие карми седе пек менчевеме!
Аволь ансяк згилямот, лиснить лия тевтькак.
...Невтневи «Репка» ёвкскесь. Таргить-таргить репсэнть модасто — а таргави. Ускить-ускить — а ускови. Чийсь чеернесь, ноцковтызе псаканть пулодо ды а таргавицясь, покш, ожо, уцор-ацор явовсь, лиссь лангс. Мельспародонть атянть ды лиятнень кургост а пекставить. Турваст тетьксевить пиледе пилес. Кенярксстонть кундсесть кедте-кедьс ды адя таргазь репсэнть перька чарамо. Вармакс велить, мик чельке кепететсь. Паро! Мазыйстэ режиссёрось теизе прядоманть. Ансяк... эзть кенере чарыцятне колмонь-нилень кирда киштезь ютамо, атянть понксонзо ки-ишк новольсть кумажадо алов! Кадовсь трусиксэ. Тертявсь. Эль эзь [179] пра. Ялганзо кирдизь, праволь — судонзо порксавлизе.
«Занавес!» — каятотсь вайгель, ды сценась сеске пекставсь.
Ваныцятне, паряк, сеске эзть чарькодтяк. Сень кис шаршавонть айгемадо-вейсэндявомадо мейле пурнавсть, теке тень учость, театрань прявттнэ, сась натой сонсь Мустафаев директорось, сэрей, келей лавтов тусто раужо черь ломань. «Те кода истя? Кие чумось, кие карми те визьксэнть кис вал кирдеме?» — ушодсь кевкстнеме.
... Бакунь та-кодамо васоло район.
Чокшне. Налксеви азербайджанонь кельсэ «Дярвиш нядир» пьесась. Сценанть куншкасо покштояк покш сарго. Атякш марто дярвишесь, рузокс лытыця монахось, апак капша юты ваксозонзо, пшкади эсензэ кельсэ кинень-бути, паряк, Пазонтень, ды ушоды човорямо покш мандосо эйсэнзэ улиця пидемапеленть.
Абунгадынек! Дярвишень таркас сценанть трокс саргонть ваксс эскели, вантано, вейке актёронть вете-кото иень цёрынезэ. Лангсонзо трусиккеть, майка. Черензэ ашот. Стясь саргонть каршо. Ваны. «Мезе тосо? Мезе пидеви?» Талакадынек. Келенек кундатотсть. Мезе теемс?
Паро, эзь талакадо цёрыненть тетязо. Лиссь кулисатнень удалдо, саизе, теке мезеяк эзь лисе, цёрынензэ кедте ды совась сценанть тона ёнов. Тарказонзо лиссь, ней уш алкуксонь, лытыця монахось.
Кавтолдомс а савкшны: тень кувалма «вере» ульнесть казямо-казямо кортамот, кой-кинень «кайсесть».
Театрась залсто, ве ёндо ванозь неяви розань пусмокс. Варштындерят шаршавонть тона ёнов, кулисатнень юткс, арсемат полавтовить. Пьесасонть невтевикс эрямодонть башка эри-чуди эйсэнзэ налксицятнень эсест эрямост. Сон аволь шождынетнеде, розась вастневи аволь истя сеедьстэ: талай чокшнес спектаклят, сеедьстэ, пелеведе мейлес, репетицият, певтеме килангот, нить, полат, эйкакшот марто куватень явомат... Весе-весе «аломанькс». Каня пародонзо усксесь артистэсь вете-кото иесэ «Дярвишень» «налксиця» цёрынензэ?
* * *
Те ульнесь сеть шкатнестэ, зярдо эзь марсеве «телевидения» валось. Сонзэ экранонть таркас ульнесь театрась. Чаво зал? Теде эзь марсевеяк.
Кода ней?
«Телекесь» визьксэнь апак сода рестедизе сонзэ кардаз [180] удалов. Аволь ансяк «телекесь», лездыцякс озась ваксозонзо, теде башка, компьютерэсь. Вант эйзэст чинек-венек. Кодат сценат-театрат! Кудосот сынь, икелеть. Симть, ярсак ды вант. Секскак важодемань лувозо эль лексиця течинь театранть, умонь шкатнень коряс, допрок лия. «Изняви» недлязонзо спектакля — паро, репетициятне ютавтовить чить, — теяк паро. «Монь» шкасто актёрось гримензэ нардтнемадо-саемадо мейле пачкодиль кудов пелеве малава, ней — кото-сисем чассо, чокшне, сон уш кудосо. Эрьва спектаклясь сестэ ульнесь искусствань мазычикс. Савкшность лангсонзо псилгалемс аволь вейке, эли кавто ковт.
Кода течи?
Кодат мазычить! Кинень теемс сонзэ? Чаво, эли малав чаво залонтень?