Эрязденть арсезь (2010)/Истямоль велеськак
| ←Бутрав лисьмапря | Эрязденть арсезь (2010) by , edited by Разгуляева Т. В. Истямоль велеськак |
Кулянь явшиця→ |
| Нуянь Видяз. Эрязденть арсезь: ёвтнеминестэ пурназь покш ёвтнема. — Саранск, 2010. — с. 136—138 |
[136]
| Истямоль велеськак |
Покш патям важоди киштема-морамо кудонь, клубонь прявтокс. Минек масторс рузтнэнь самодост икеле ды зярс-бути самодост мейлеяк мерильть вейс пурнавома таркадонть аштем-кудо. Эйсэнзэ, морамодо-урнемадо башка, кода уш ёвтнинь, тейтертне тонавтнесть викшнеме, кодамо, штердеме. Мукшность тесэ одтнэ, цёратне-тейтертне, вейкест-вейкесткак, тейневсть никс-полакс. Те ульнесь умок ды теде уш а ледстнитькак.
Мейсэ маштан, лездан патянень. Кизэнь шкава, валске марто, якан «кинодо» мейле кияксонь тенсемс. Панжса букань пряшка понгавтозь панжоманть, сован сундерькс чопода, ушонть коряс экше, эсензэ чине марто залонтень ды кундан тевезэнь.
[137] Ахолян тенстьсэнь, пансян шукштнэнь стенатнень кувалт, оля таркатнева ды кувака эземтнень юткова-алга. Челькень кардамга начтнян тенстенть, пургсян кияксонть ведрасто ведьсэ. Тевем моли.
Я, те мезе! Сценанть маласо келей-покш эзементь ало эль а корны, уды ютазь чокшнестэнть кинонь ваныця. Уды, паряк, оннэяк неи, кедь коморнензэ прянзо алов путозь, эйкакш. Лангозонзо ванозь, куш тонськак чиремть ваксозонзо.
— Ну, кода? Удомат явась, ялгакай? Онт ламо мендердить? — пувтан, тошказь-кортазь, ламбамо удомасо удыцянть. Цёрынесь ашо пря, лангсонзо коцтонь, сэньс навсезь понкскеть, каргоць ашо панарнэ.
Кепедизе прянзо. Сялгинзе, лип а мерить, сельмензэ лангозон: «Косан, косо печтия венть?» — кевкстни вановтсонзо. Озась. Нардтни мокшнынесэнзэ сельмензэ. Автсь курго ды састыне лиссь «латонзо» алдо.
— Кенкшесь ко-косо? — кевкстимим удомадонть кундсевикс вайгельсэ, перьканзо ваннозь.
— Оно, оно эземтнень тона ёно! — лездынь тензэ, ахолдынь тенстьсэнь, невтия кенкш ёнксонть.
— А-а, — лиссь кургстонзо, ды тусь валдонть ёнов нузяксто чиезь.
Ютась тарго. Сынь, кода свал, ведрам-тенстем марто клубс ваньксчинь кирдеме. Ансяк кундынь тевс, эртевинь ... удомань явавтыцяс. Ней сельмензэ конямс вансь кино минек пень Черькаень Дригань раужо пря, теке тонол, тюжаня тюс чама цёрынезэ. Нолдыя полонсто, теке немилявненть, теньгак. Аволинь саяк?
А Черькайтне, а Укштортнэ, а лиятне, эйкакшост кудосо а удоманть коряс, кодаткак талномат, кодаткак ацирьгалемат, вешнемат эзть кепсе. Мейле мезе, пакшаст ве арасель?
Коськана, кевенза седейть?
Аволь.
* * *
Иля мелявто: ковгак сяткинеть, ковгак вечкевикс покольнеть веледе башка а туи. Кияк а саласы, а токасы, а покордасы. Эрить велень эрицятне вейкест-вейкест лангс кемезь, мелень ванозь, седе ламо ояксчисэ. Вейсэнди эйсэст паронь раштыця вий, [138] малавгавты — аразьчись, асатыкстнэ. Вастневить, содави, тесэяк эрьва кодат апарот. Лиснить. Ансяк чуросто. Седе ламот эрить вемельсэ, кудо раськекс.
Эйкакштнедеяк, видькстамс, эрьва кудосонть ульнесть пизэ. Конась Витя-Видяй, конась Ваньчо... Содыть азе! Каня кенерят мельгаст ваномо? Те аволь кода ней — вейкс. Седе ламо а раштыть. Теньгак пелить нолдтнемензэ ушов. Секень вант, саласызь. Ды истяк касы те вейкинесь кудосо кирдевиця балягинекс.
Икеле ды ней, чись улконь ды неень, кода весе полавтови!