Эрязденть арсезь (2010)/Иля яжа мазычинть...

From Wikisource
Jump to navigation Jump to search
Эрязденть арсезь  (2010)  by Нуянь Видяз, edited by Разгуляева Т. В.
Иля яжа мазычинть...
Нуянь Видяз. Эрязденть арсезь: ёвтнеминестэ пурназь покш ёвтнема. — Саранск, 2010. — с. 227—231

[227]

Иля яжа мазычинть...

Нусманя чама пешксе ковось валдосонзо пургсинзе латотнень, лопань палясо оршазь чувттнэнь, лугасо ацазь вальмалкстнэнь. Монень маряви, истя, кода ней, вень азорось зярдояк эзь сияждо, эзинзе сравтне мазычинзэ. Сонензэ лездась, мазылгавтсь пертьпельксэнть талай чокшнень салава-салава гайгиця каштмолемась. Ютко шка яволявтсть, эзть мора атякштнеяк. Ковось [228] кецнесь ламо тевень теемадо мейле сэтьмечинтень. «Оймсек, веле!» — теке чатьмонезь кортась Моданть Малавиксэзэ.

Мукшновсть сонзэ а кунсолыцяткак: шкань-шкань каштонть колсесь цёковось. Верде ожо сельме ваныцянтень вечкевсть чокшнестэ валскес морыця нармунненть моронзо, горниповнекс чольдердиця вайгелезэ. Цёкордсь цёковось ковонь валдонть кондямо сэняжа ванькс эрямодо, вейкень-вейкень мелень ваномадо, пси вечкемадо.

Бозань эмежпире песэ, Кирданов лейненть маласо, чады ашосо оршазь ламарькс. Ковонть ёнов ваныця ёнксозо палы сиянь толсо.

Маряви, эрятано, ульдяно те венть элесэ ансяк минь: верде ваныця валдо чама ковось, цёковонть вешкеманзо, ламарь чувтось ды минь — кавто од, вечкемадо пешксе седейть. Лиятат, минденек башка, Модамасторонть лангсо, цитниця тештьсэ сялгонезь менеленть ало арасть. Ансяк минь. Ансяк минек меленек-арсеманок, ёжонок, вечкеманок, минек вандынь маней чинек, минек цёковонок. Аштетяно карадо-каршо. Рая маряви тень менель ёнкстнэнь потсто валгозь, сэрьс аволь сэрей тейтернекс, эйстэнзэ лиси цивтёрдыця валдо, сэнь покш сельмсэнзэ налкси-кувтолды ковось.

Ламарьксэнть комелензэ ёжос, кавто кирпець лангс, путозь лазнэ. Те эземнесь минек. Озась васня Рая, ваксозонзо — мон. Вечкемам лангсо ашо, якстере балягинесэ пупсезь, нурька ожа, кумажадо алга платия. Валдо тусто черензэ судрязь удалов, эчке кавто пулонзо нолдазь мештеванзо.

— Марят, мезде моры цёковось? — лавтовозон эль-эль неждязь тошкстась пилезэм вечкемам, пельсь, монень маряви, тандавтсы валсонзо вень каштонть ды эйсэнзэ эльниця ине морыцянть. — Марят?

— А мезть кевкстнемс — вечкемадо, — Раякс, цяк марямга ёвтыя мелем ды саия кедензэ коморозон. — Кедеть мекс истямо кельмине?

— Экше... Кодамо, Видяз, весь, кодамо ванькс менелесь! Эрьва тештинесь неяви, — Кече Пулонть лангс ванозь, эрьведезь, ёжонь марязь поладынзе валонзо тейтересь, ней уш апак пеле — тандавтсы цёковонть.

Стинь, каия пиджаком ды копачинь Раянь лавтовонзо.

— Сюкпря, — тошкстась каршо оинем.

— А содан, ойминем, кода тонеть, монь превезэнь ды седеезэнь те весь, тешттне, ковось, вень артистэнть моронзо кадовить зярдояк-зярдояк а нардтневиця тешксэкс, — аламнеде верьга ливтнезь, [229] лиссь мазый валсо видькстамом каршонзо стядо аштезь.

— Моньгак. Монень — кемгавксово, тонеть — комсь. Каня олавтовить неть иетнень мазычист, зяро илязтано эря? — вемельс прась мартон, мерсь вакссозонзо озамсто Рая.

— Ютыть иеть, сы сыречись. Мезе илязо лисе, тонь марто вастневематне кадовить а стувтовиця ледстнемакс, — теке лувсонть поладынь тейтеренть валонзо.

— Монгак истя арсян, — мерсь Рая ды лекшкадсь эйзэнь, комавтызе валдо черь прянзо лавтовозон.

— Вечкеви теть истя аштемась? — кевкстия лексеманзо марязь.

— А эряви теде кевкстнемс, Видяз, — маринь каршо.

— Ютыть иеть. Минь уш а ультяно. Эрямось поладови. Кить-бути минек кондят одт, кавто вечкиця седейть, те эли лия ламарьксэнть ало кармить кунсоломо цёковонь морот, тантейстэ палсеме... Ды истя карми свал — та-кода марямга арсезевинь сыця шкатнеде.

— «Минь уш а ультяно...» А эряви теде кортамс, — кардымим седейпельксэм ды саизе коморстон кедензэ. Тень каршо вить кедьсэнь лепштия ёжозон ды лавшинестэ, васькавтнезь, кода-бути пелезь, кутмордыя.

— Марить, Павол Маня ялгам лиси мирденень? Тердимим чиявтома чис, — полавтызе кортамонзо, ёвтась тень куля Рая ды саизе лавтовом лангсто прянзо.

Чатьмонезевинек.

Цёковонть вайгелезэ Кирданов лейненть чирева кальтнень потсто зярс-бути эзь маряво. Сизят, кода а сизят зняро моразь! Мезе, ансяк ломантненень оймсема? Ютко шка яволявтсь. Чатьмони.

— Молят? — колыя каштонть.

— Кевкстнят?.. Эно кода! Маня — васень ялгам... Весе ялган аламонь-аламонь мирденень лиснить... Тихон Лизаяк, марсинь, пурны-сэрни... — Рая, редия, мезе-бути ёвтыксэль, эзизе прядо, прок пупордясь. — Содамс, зярдо минек истямо чинек сы?

Каштмолема.

— А содан, — видькстынь прянь нолдазь.

— Косто тонеть содамс, тонь превсэ тонавтнемат, — пеняцязь ды нусманясто мерсь тейтерь оям.

Таго чатьмонезевинек.

Мезеяк эзинь мере. Стинь. Венстия кедем ды увтинь ламарь чувтонь тарад, карминь синдтреме ковонь сиясо пургсезь [230] ламарень цицькинеть — каземс Раянень пусмине.

— Иля яжа мазычинть, — каятотсь тейтеренть истямо вечкевикс, кинь ёновгак а молиця, эчкела, мештьстэ лисиця вайгелезэ, — сонсь чувтось пусмо. Чинедензэ иредят.

— Мон ансяк кавто-колмо цицькинеть, — чумонь марязь видькстынь кардыцям икеле ды озынь казнем марто ваксозонзо. Венстия судонзо алов, — кеман, истямо тансть эзить марсе.

— Иредстимик, Видяз, допрок иредстимик! — пусминенть ваннозь-никсезь, ютась нусмакадомазо, пейдезевсь Рая. — Мазычинь синдтремась, ялгинем, — покш пежеть. Иредстемась-как... Варштак чилисема ёнксов. Несак? Ушодсь ашолгадомо. Шказо — кудов.

— Иля капша. Аштек аламошкас.

— Арась-арась, Видяз. Шказо — кудов, — омбоксть мерсь шкадонть ледстницясь.

— Пелят шкастонзо а сыргозят?

— Дух арась!

— Ават мурнетянзат?

— А-а! — эрязасто ёвтызе валонть ды пейдезевсь. Марявсь тень гайгезевсь баягине.

Стинек. Карадо-каршо аштезь, зярс-бути ванынек сельмеде сельмс. Ванынек, теке зярдояк уш а вастовтано. Венстинек вейке-вейкенень кеденек. Лепштия Раянь аламнеде, ёжонь марязь, мештезэнь ды виздезь-пелезь токавтынь турван сонзэ турвас. Таго варштавинек сельмеде сельмс...

— Ну мезе, вастовомазонок? — пшкадсь Рая.

— Вастовомазонок, — меринь каршо, ды ламарь чинесэ качадыця ашо платиянть кекшизе вень, кадык кововгак, чоподась.

Валанясто вешкезь, дирнезь-цокнозь, цёковось одс кундась шнамо панжиковонь нурькине, теке лекстявкс, венть. Кунсолось сонзэ, кецнесь рацяня, сиянь валдосо копачазь ламарь чувтось.

...Се ковов, цёковонь моросо морыця вень ёвкстонть мейле ютась эрямонь кувака пинге. Вастневинек, вечкинек аволь ве ие, кортнекшнинек ашосо цитниця ламарьксэнть ало вечкемадо, чиявтомадо, икелень чиденек. Ней савкшны — свал удыцянь масторов туемадо. Тов мартон сайсынь, Рая вечкемам, важовсто ёвтазь ине валот: «Иля яжа мазычинть!» Эзинь, эзинь яжа! Мон тонь, Рая, чивалдынем, ловинь Пазонь пельде кучозекс, ванстынь, васькавтнинь, дёлинь, мелявтынь кисэть. Теевельтькак истя лиятнеяк, мерян прянь апак шна.

[231] велькссэть чипаесь седе сеедьстэ мизолдозь вановоль лангозот.

Куломась саизе Раянь, ашо, якстере балягинесэ пупсезь платиясо тейтерненть, кодамокс кадовсь ледстнеман юткс, ведьгемень иесэ. Арась, эзь сато седей виезэ меремс, кода мерекшнесь се ковов вестэнть монень: «Иля яжа мазычинть». Кемсь, эрьванть псистэ ёвтазь «вечктян» валсонзо — вечкема.