Эрязденть арсезь (2010)/Варчамс се меденть танстензэ...
| ←Тень эйсэ «пиже шканть» мазычизэяк | Эрязденть арсезь (2010) by , edited by Разгуляева Т. В. Варчамс се меденть танстензэ... |
«Тетянк сы!..»→ |
| Нуянь Видяз. Эрязденть арсезь: ёвтнеминестэ пурназь покш ёвтнема. — Саранск, 2010. — с. 20—22 |
[20]
| Варчамс се меденть танстензэ... |
ТЕТЯМ сюпав, казённой лишмеде-тарантасто башка ули велосипедэзэ. Велесэнть сонзэ кондятнэде, паряк, кавто-колмо. Чуросто кие ювкаи «лисапедсэ»! Тетям вана — ардтни. Шли-нарды, оршасы ашо, кувалт раужо кикст-кикст панаронзо, «кильдсы» кавто чаросо лишмензэ ды — Дубинькав, машинань-тракторонь станциясо агрономонь тевензэ топавтомо.
Течи тетям кудосо. Оймсема чи.
Теинзе кардазонь-кавонь валскень тевензэ, совась кудос. Нацяс шлясь, каинзе лангстонзо кудоютконь оршамопелензэ, оршась покшчинь ашо панар ды раужо понкст. Зярс арасель, ниле иесэ Коля ялакскем марто «дейман левксэкс» чийнинек мельга-мельцек кудокияксонть куншкасо. Кенерсь панжовомо кенкшесь — општ. Теке мезеяк арасельгак, рожодоминек сэтьме налксемасо налксеме.
Тетям саимим кавалалдо, лепштимим мештезэнзэ ды зярыяксть, пейдезь-кенярдозь, люкштядимим потолок видьс.
— Утю, утю! — сеересь те шкастонть. — Ды тон уш покш цёрат. Адя-ка течи мартом нешкепирев. Утю! Утю! Коля зярс вишкине, тон — адя.
— Ков?! — менсь тандалемань пачка кельпрястон.
— Нешкепирев, цёра. нешкепирев!
Мельган лепштизе-кутмордызе Коляньгак.
Лисинек ушов.
Чись кончтни, терди весень ушов. Валдозо а кельги куринкань кавто ёнга кудотнень-латотнень юткс. Чикуншка ёндо пачколиця анелькай лембе варминесь чевели кудонок икеле каленть лопанзо. Вечкеви тензэ, чувтонтень, яла а истя маряви псись.
Кудосто саезь та-кодамо ташто оршамопеленть тетям сюлмсизе озамкакс икеле рамантень. Теевсь мезе-бути тодовнень кондямо. Эйзэнзэ озавтымимгак. Весе вийсэнь, кода мерезель, кундынь рулентень.
Лисинек куринканть кувалт таргавозь седе келей-валаня кинть чирес.
— Кирдть! — кармавтымим тетям. Сонсь путызе керш [21] пильгензэ педаленть лангс, нежедсь ды каизе вить пильгензэ удало чаронть вельска. Озавсь. Сонсь, «чиицянок», кальдерь-кальдерь тусь ардозь.
Прядовсь Пичепесь. Лисинек веленть томбалев. Кевев модань кись валаня. Ш-ш-ш, — маряви, теке гуй вешки, чаротнень алдо. Кавто ёнга колхозонь келей-келей, пе тенст а неяви, паксят. Кавто ёнга — кенериця, лавшо варминеденть налксезь нуриця розь.
Ардан «лисапедсэ» васенцеде. Аволь ардан — ливтян. Теке пшти сёлмо цянав. Мельспародонть, маряви, седеем а кельги мештезэнь. Кодамо вечкевикс, кодамо седеень витиця те, истя эрязасто, ансяк икелев, та-ков васов-васов ардомась! Марян эсь прям менельсэ эрицякс.
Паксятне прядовсть, ардтано вирьга. Вана нешкепиреськак. Сон аволь сэрей кавто пандо ютксо. Перьканзо пекше вирь. Шабрасонзо келей, коське потмакс Пуварня латко. Нешкетне «озавтнезь» вандора, чипаенть лангс, зярдо маней, ваныця пандочамава. Артозь якстерьстэ, ожосто, сэньстэ. Икельгаст луганть мазылгавтыть истямо жо тюсонь, валске марто ведьбайгинесэ пургсезь певтеме ламо балягат. Кода а кандтнемс медь?!
Нешкепиренть ве чиресэ — пелькашка кудыне. Тесэ эри, удси, тевензэ теи пирень прявтось. Эйсэнзэ, ушонть коряс, экше. Коштсонть мекшень, медень, штань, коськиця тикшень чине. Кудынесэнть таргить медьгак.
Вастымизь азорось, Нуяз атя, — аволь сэрей, келей лавтов, цивторк-цивторк сэнь сельме ломань. Мештензэ келес сакалонзо кавшанят, сэнынть-ашот. Сон тесэ — «мекшень паз». Ловт, а тукшны тундонь васень лембетнестэ саезь талай сёксес. Кудов понгони чуросто. Азярдо. Тевть. А ушодкс тенст, а пе.
Тетят-цёрат озынек ужос «педявтозь» стувор ёнов молицянть экшс, лангсонзо бальцянонь лапужа вакан. Пешксе од, мик лембе медте. Алинесь, чинесь эйстэнзэ! Стуворонть вакссо аштезь, Нуяз атя керсесь калацянь покш печтть, тетям — нилев-нилев, кувалт, — кудосто ускозь куярт.
— Ярсадо, ярсадо! — кавани эйсэнек парго сакало «мекшень пазось».
Тетят-цёрат памшатано, седей виттяно.
Наваса ашо кши печтенть пензэ медьс — кургс, наваса — кургс. Зняро навсинь, вадневсь медьсэ чамам, петнявтынь панар мештезэньгак. Тантей, ярсат — ярсавлить!
... Вирьганть зярс-бути молинек ялго. Стака ардомс веревпандт, киськак аволь валанятнеде. Куроксто тетям озавтымим озамкаезэнь. Сонсь ветясь «самокатонть». Виренть ды мельганзо вандора пандочаманть ютазь, тетям озась самокатонтень, ды туинек аловпанд вармакс. Истя эрязасто ардынек, натой каршо вармась салава-салава вешксь пилесэнь ды палсесь чамам.
* * *
Серьгедемс, мурдавтомс куш ве минутас се шканть! Пароль варчамс-копордамс се меденть, ардоманть, сеть ёжотнень танстест. Арась, сеерек — рангт куш кирьгапареть коськемс, куш прамозот, — эрязь киванть омбоцеде а ютат. Максовольгак, мертяно, Пазось? Аволинь юта. Аволинь сыргаяк. Содан, эрямось тонавтымим: вановлинь весементь лангс ве ёндо сазень кельме седейсэ, икелень ёжотне мештьсэнь а панжовольть. Сынст ламбамост-растест аволинь маря. Весемесь максови ансяк весть.