Эрязденть арсезь (2010)/А.П. Рябовонь 100-це чачома чизэ
| ←Кенярксонь чадыведь ды калавтозь кемемат | Эрязденть арсезь (2010) by , edited by Разгуляева Т. В. А.П. Рябовонь 100-це чачома чизэ |
Тесэяк сезевсь кемеманок→ |
| Нуянь Видяз. Эрязденть арсезь: ёвтнеминестэ пурназь покш ёвтнема. — Саранск, 2010. — с. 278—281 |
[278]
| А.П. Рябовонь 100-це чачома чизэ
эли Эрзянь келень идема Фондонть васень эскельксэнзэ |
Эрзянь келень идема
Фондонть лемд___ек
А.П. Рябов профессоронть лемсэ
1992-це иестэ «Масторава» вейсэндявксось, кона теезель «алдо», калмазель. Сонзэ таркас, тагояк ледстяса, сась «верцетнень» ведьмест вельде кирдевиця «Съезд мордовского народа» (1992-це ие, эйзюрковонь 14—15 чить). Сеске эзь чарькодевкшне ков сон менди. Васень шкасто арсевкшнесь — поладсы «Масторавань» кинзэ. Панжовсть «картанзо» седе мейле: те, «общественнойкс» лемдезь, курось прясто пильгс кирдийтнень (власттнень) кочкаря ало, ямкскень пес сынст коморсо, пестэ-пес топавты сынст мелест. Видьстэ мерезь, бажамонзо сонзэ аволь идемс, а кекшнезь, салава тапамс эрзянь келенть ды, лиси, эрзянь раськенть.
Мезе теемс? Кода улемс? Арсинь-теинь, сынь мельс: панжомс эрзянь келень идема Фонд. Кеминь: лездыцят, ярмаконь каицят фондонтень кармить. Колоньгемень иень перть тонавтынь Мордовиянь университетсэ эрзянь цёрат ды тейтерть, агрономт, ламот-ламот содасамизь, ды тевензэ, эзинь кавтолдо, вейсэндявксонть туить. Ильвединь: эзия сае превс вейкень: тонавтницясь, студентэсь ды се, кона прядызе тонавтнеманзо, малавгак а вейкеть. Полавтовить таркатне. Седеяк пенсионерэкс теевемадот мейле.
1993-це иень даволковонь 8-це чистэ,
конёвтнень марто аволь аламо чийнемадо мейле, эрзянь келень идема Фондось кемекстазель юстициянь министерствасо. Лемдинек сонзэ Анатолий Павлович Рябов профессоронть лемсэ.
Ушодовсть тевть. Васенцесь эйстэст — Рябов профессоронть, кона кода эрзя, кода «буржуазной националист» ды «раськень ят» чумовтомо ледезель 1938-це иень панжиковонь 22-це эли 23-це [279] чистэ, чачома чинзэ тешкстамось. Ульнесь мель — теемс те лементь содавиксэкс аволь ансяк Мордовиясо эриця эрзятнень, сонзэ томбальгаяк. Тень туртов типографиясо печатавтокшнынек учёноенть биографиянзо ды фотопортретэнзэ. Анокстакшнынек Фондонть пельде сёрма-пшкадема — тешкстамс эрзянь келень васенце профессоронть 100-це чачома чинзэ. Неть колмо конёвтне-документтнэ путозельть конвертс ды кучозельть Россиясо эрзянь эрьва велень прявтонть лемс. Превсэнь эзь кирдеве: колмосядт эли нилесядт адресэнь коряс. Теезель ламо виень путозь тев, теезель васень эскелькс — малавгавтомс, теемс седе нардев сюлмавкст Мордовиядо башка эриця эрзятнень марто. Ажиятнень ютксо васень ускицякс ульнинек кавонек — мон ды Кшуманцянь Пиргуж, паспортонь коряс Мусалёв Григорий Дмитриевич
Теке марто мольсь анокстамось чачома чинь промксонтень — чадыковонь 16-це чинтень. Муинек (кода — мельсэнь эзь ванстово) Анатолий Павловичень малавиксэнзэ Московсто, Ижевскойстэ, Владимирстэ, Сарансто. Сёрмадынек сёрмат, тердинек чачома чинтень. Кучинек тердема конёвт — кучомс делегация — Мордовиянь буень прявттнэнень. Салдаев Михаил Художникесь сёрмадызе Рябовонь портретэнзэ. Чадыковонь 16-це чинь каршо чистэнть вастынек А.П. Рябовонь буень малавиксэнзэ: Московсто ды Ижевскойстэ. Вастынек паро мельсэ, баляга пусмо марто, муинек тенст эрямо-удома тарка. Лездась тенек, сюкпря, Татьяна Михайловна Ковалёва.
1994-це ие. Чадыковонь 16-це чи. Университетэнь национальной факультетэнь актовой залось — а козонь озамс. Эрзянь малав эрьва буестэ састь делегацият — тонавтыцят, киштицят-морыцят, эрзянь келень вечкицят. Факультетэнь корпусось се чистэнть васенце этажсто колмоцес кортась эрзякс. Истямо эзь марсеве, секень вант, 1990-це иестэ «Масторавань» Инекужосояк. А.П. Рябов содыдеенть наукасо тевдензэ ды эрямодонзо, трагедиядонзо ёвтнесь Цыганкин Дмитрий Васильевич профессорось. Лиснесть сцена лангс, ледстнесть васолдо сыця инжетне, Рябовонь буень ломанензэ, ды лиятне.
Покш мазый эрзянь концерттэнть икеле ютавтозель эсь олясо ярмаконь-лезксэнь каямо ила. Пурныцятне, мазыйстэ, руцясо-палясо оршазь тейтернеть, моразь ютасть кептерне марто мекев-васов залганть. Велявтсть аволь чаво кедть. Теде башка Ляблин Алексей Иванович, сестэ элеваторонь [280] прявт, кучокшнось почта вельде 250 целковойть! Весемезэ таштазельть 900 целковойде ламо. Сестэ ульнесть эйпаро ярмакт. Седе тов пек тенек маштовсть.
1994-це иестэ оштнень-велетнень велькска уйкшнесть-ливтнесть зярс олячинь марямонь варматне. Ульнесь мезе-бути дсмократиядонть, мезе-бути «гражданской обществань» кондямо. Кирдийтне-власттне аламнеде вансть «граждантнэнь» мелест, эзть пансе эйсэст кода ней, ламо иень ютазь. Содамочинь министерствась максокшнось од «ПАЗ» ды вейсэ А.П. Рябовонь буень ломантне марто ардтнинек Рябов профессоронть чачома велезэнзэ, Ицялонь буень Ламбаське велев, якинек чумовтомо маштозь цёранть аванзо калмолангс. Ней истямо ила — ды эрзянь! — мезе мартояк аволь ютавтово.
Омбоце чистэ, чадыковонь 17-це чистэ, теке залсонть — наукань-тевень конференция. Эйсэнзэ Мордовиянь содыдейтне, кандидаттнэ ды доктортнэ, кортасть А.П. Рябовонь келень наукасо теевкстэнзэ, эрямодонзо ды тюрьмасо меельце чидензэ. Р.Н. Бузакова ёвтнесь Рябовонь теевкс эрзянь-рузонь ды рузонь-эрзянь валкстнэде.
Валонь прядома таркас «Весемезэ таиипазелъ 900 целковойде ламо. Седе тов пек маштовсть». 1994-це иень таштамковонь 24-це чистэ лиссь А.П. Рябов лемсэ эрзянь келень идема Фондонть «Эрзянь Мастор» газетанть васенце номерэзэ. Вана мезекс «пек маштовкшность» 100-це чачома чинь тешкстамсто пурназь ярмактне.
* * *
Видестэ редязь: «Что напнсано пером...» — «мезесь сёрмадозь перасо, узерьсэяк а лакстяви». Ютасть сеть кемемасо эрязь иетнеде мейле аволь аламо иеть. Ламо-мезе шлявсь удемень сормсевкстнэстэ ды седе келейстэ, седе домкасто се шкань уликс-читне уш конёвозон а совавтовить.
«... Национальной факультетэнь залось — а козонь озамс». Каня те алкукс ульнесь? А кемевияк. Алкукс, петнявкскень пес истя. Вана кодамо питне, кодамо покш виекс ловсть се шкань прявттнэ-ветийтне эрзянь келень идема Фондонть, минек. Ней а шождыне серьгедемс кеменьшкатненьгак. Ломантне пелить, пелить лекстямскак прявтонь каршо, еоракалить черень кашторкстояк. «Уресь, эсь прянзо урекс ловицясо — аволь ур», — [281] мерекшнэсь кие-бути инетнеде. Эрзятне урекс эсь пряст а ловить, секс уреде уреть. Нерьгить течинсетненень превс аволь «гражданской», а «мордовской общества». Секс весе вийсэст путнить пирявкст эрзятнень икельга. Содыть, ды парсте, мордовскоесь куловты мордовскоенть, эрзятнень, вейсэ мокшотнень марто. Истямо койсэ теить Великий русский народ.