Эрзянь ёвкст (М. Е. Евсевьев, 1928)/41

From Wikisource
Jump to navigation Jump to search
Эрзянь ёвкст  (1928) 
Эрзя ломанть, edited by Евсевьев, Макар Евсевьевич
Ёвкс 41
Эрзянь ёвкст (скаскат). Пурныньзе М. Е. Евсевьев. СССР-энь Наротнэнь Центральной Издательствась. Москов, 1928
[ 124 ]

АТИНЕ ды РИВЕСЬКЕ.

Эрясть-айшть атят бабат кавонест. Атясь тейсь илеень кептере и путызе вец калонь кундамо. Кептересь пешкець калдо. Атясь понгавтызе кептеренть котмерезэнзэ и юты кудов. Неизе сонзэ ривеське, маць ки ланкс и теизе прянзо кулыкс. Атясь кепедизе ривеськенть, и тусь таго киява.

Ривеськесь кайсинзе калтнэнь кептерестэнть ки ланга и соньсь валксь.

Атясь сась кудов, путызе кептерезэ кудыкелев и мери бабанстэнь: „Листь, баба, саи кептерестэнть калтнэнь и ривеськенть!”

Лись бабась — вачизе кептеренть — тосо мезеяк арась. Совась кудос и мери: „Тосо мезеяк арась!”

Атясь кежиявць и маштызе бабанзо.

Ривеськесь пурнынзе калтнэнь, куйсь стога пряс и ярцы.

Юты ваксканзо вергис и мери: „Мезьде ярцат, ривесь”

— Калдо!

— Косто саи?

— Кундынь!

— Тука монень вачамс!

— Ай-ай! Азё тоньсь кундак!

— А маштан. Тонавтумак, кода кундамс!

— Азё салак косто-як кептере, сюлмик пулозот ды нолдык вензэ ланкс анксимас. Кептересь пешкеди калдо!

Вергизеэсь салась кептере, сюлмизе пулозонзо и нолдызе вензэ ланкс анксимас.

Вемберьк кельмесь пулозо анксимастень.

Валське састь ават вец и давай вергизэнь маштомо. Вергис тев ноцк, тов ноцк! Сезизе пулозонзо и оргоць вирев.

[ 125 ]Ривесь се шкане мольсь велес, совась ве бабинень кудос, ваднизе прянзо чапакссо и юты.

Понксь каршозонзо пуловтомо вергизэсь и мери: „Ривесь, мон сэвдян, — мейсь манимек?”

— Ох, верьгис, моньськак цют а кулан! Якинь велес саразонь саламо, — весе прям порксызь! Несак, удемем-гак ушов лись. Адя кандумак стога вакс и тосо сэвимак ино.

Вергис кандызе ривеськень стога вакс. Ривеське кирнавць стоганть пряс, верьгис кадовсь алов.