Эрзянь ёвкст (М. Е. Евсевьев, 1928)/26
| ←Ёвкс 25 | Эрзянь ёвкст (1928) , edited by Евсевьев, Макар Евсевьевич Ёвкс 26 |
Ёвкс 27→ |
| Эрзянь ёвкст (скаскат). Пурныньзе М. Е. Евсевьев. СССР-энь Наротнэнь Центральной Издательствась. Москов, 1928 |
ПУСТАЧЕЙ.
Эрясь-айшь вирьсэ пустачейка. Сась левксэнь ливтима шказо. Вешнесь паро чувто. Тейсь прязонзо пизэ и ливць левкст.
Марясь левкснэде ривеське. Сась чувтонь алов и сеери: „Пустачей-чей-чей! каяк, каяк вейке левкске, а каят — кузян, тонситькак сэвдян!”
Тандаць пустачей, каизе ве левксэнзэ. Ривеське каподизе ды сэвизе.
Омбоце чистэ таго сась ривеське чувтонть алов, сеери: „Пустачей-чей-чей! каяк, каяк ве левкске, а каят — кузян, тонситькак сэвдян!”
Пустачей таго каясь тензэ ве левкске. А сонсь пустачей аварьди, а сонсь аварьди.
Ливтясь сия варака. Неизе пустачеень аварьдемадо и кевстизе: „Тон мейсь истя, пустачей, аварьдят?”
Пустачей мери: „Кода ай-аварьдян, варака патяй! Тонаць левксэзэнь ривеське, чистэ сы, левкс каявты, а то мери — кузян, тонситькак сэвдянь”.
[ 87 ]Варакась мери: „Тон вана мезе тейть, пустачей: кода сы ривеськесь, ды карми кецтэть левксэнь вешме, тон мерьть тензэ: эх, мушко пуло, керь лавтомо! кандонь трокс а эськельдиват, тезэ ли кузиват!”
Аламос аштезь, сась ривеське, таго кармась левксэнь вешме: „Пустачей-чей-чей! каяк, каяк ве левкске, а каят, кузян — тонситькак сэвдян!”
А пустачей чувто прястонть мери тензэ: „Эх, мушко пуло, керь лавтомо! кандонь трокс а эськельдиват, тезэ-ли кузиват!”.
Ривеськесь кевстизе пустачеень: „Ки истя тонть, пустачей, тонавтынзеть?”
Пустачей мери: „Варака патям”. Ривеське кежиявць варака ланкс, вешнизе сонзэ вирьстэ и мери тензэ: „Варака патяй, мейсь тон пустачейкань тонавтык, мон тонть савдян!”
Варакась мери тензэ: „Ривесь патяй, кода тенян-аван кулость, монгак истя кулан”.
Ривеське кевстизе: „Кода?”
Варака мери: „Вана кода: ве авань ули каштотсо каша шакшозо, мацнэ ули ой парьнезэ, лавця ланксо моцька паргозо.
Азё нень весе салы ды пандо пряс лаци, — каша шакшонть ды ой паренть лаци крайга, моцька паргонть путык кунчказост. Тонсь матть пандонть алов, автик кургот и учок. Мон озан паргинестень ды карман ойсть марто кашадонть ярцамо. Кода пекем пешкеди, паргинесэнть вицтэ кургозот кирякстан”.
Ривеське тейсь, кода тонавтызе варака: салась ве авань кашотсто каша шакш, мацсто — ой парь, лавця ланксто — моцька парго. Путыньзе пандо пряс, сонсь маць пандалов, автизе кургонзо и учи варакань эснэ.
Варака озась моцька паргостень и кармась кашадонть ой марто ярцамо. Кода весе сэвевсть, ливтясь ривезень вельксэс и серьгець: „Ривеське патькай, на теть бабань пеште!” Ривеське и тев кирнавты и тов кирнавты, мезе-як а тееви: варака ливтязь тусь вирев.