Эрзянь ёвкст (М. Е. Евсевьев, 1928)/24
| ←Ёвкс 23 | Эрзянь ёвкст (1928) , edited by Евсевьев, Макар Евсевьевич Ёвкс 24 |
Ёвкс 25→ |
| Эрзянь ёвкст (скаскат). Пурныньзе М. Е. Евсевьев. СССР-энь Наротнэнь Центральной Издательствась. Москов, 1928 |
ДИЛЬ-ДИЛЬ, АТИНЕ.
Эрясть атят бабат кавонест. Сынь вельть беднойтельть, — сынст мезесткак арасель. Весть атясь сайсь узере и тусь вирев пенгень керямо. Мусь коське тумо и кармась керямонзо. Тумо прястонь атястень серьгець нармунь: „Диль-диль, атине, диль-диль бабине! Иляк кола пизынем, иляк кола ашкинем, мезе вешат, сень максан!” Атясь мери: „пенгень арасть, пенк вешан”. Нармуньсь мери: „Азё кудов, кудосо улить пенгеть!”
[ 84 ]Тусь атясь кудов, — кудосо пенгензэ цела кардас.
Кудосо ёвтниньзе атясь бабанстэнь, мезе ульнесь вирьсэ. Бабась мери атястень: „Ярмаканок арасть, азе вешть нармуньсть кецтэ ярмак”.
Атясь саизе узерензэ, тусь вирев.
Мольсь тумость алов и кармась стукамо. Тумоньть прясто нармуньсь серьгець: „Диль-диль, атине! диль, диль, бабине! иляк кола пизынем, иляк кола ашкинем, мезе вешат, сень максан!”
Атясь мери: „Ярмак вешан”.
Нармуньсь мерьсь: „Азё кудов, кудосо улить ярмакот!”
Атясь сась кудов, а кудосо цела сундук ярмаконзо. Бабась атянте мери: „Азё вешть нармуньсть кецтэ цёра ды урьва”.
Атясь саизе узерендэ и таго тусь вирев. Мольсь тумость алов и кармась таго стукамо. Тумоньть прясто серьгець нармуньсь „Диль-диль, атине! диль-диль бабине! иляк кола пизынем, иляк кола ашкинем, мезе вешат, сень максан”.
Атясь мерьсь: „Урьвам ды цёрам арась”.
Нармуньсь мери: „Азё кудов, кудосо ули и урьват и цёрат!”
Сась атясь кудов; эзем брясо озадо аштить урьвазо ды цёразо.
Омбоце чистэ бабась мери атястень: „Азё, атя вешть нармуньсь кецтэ инязорокс чи”.
Атясь саизе узерензэ и тусь вирев. Мольсь тумость алов и кармась стукамо. Тосто нармуньсь серьгець: „Дильдиль, атине! диль-диль, бабине! иляк кола пизынем, иляк кола ашкинем, — мезе вешат, сень максан!”
Атясь мери: „Инязорокс-чи вешан!”
Нармуньсь мери атясте: „Азё кудов, улят инязоро!”
Сась атясь кудов и теевсь инязорокс. Бабась мери атястень: „Азё, атя, вешть нармуньсть кецтэ пазокс чи”.
Атясь саизе узерензэ и тусь. Мольсь тумость алов и кармась стукамо. Тосто нармуньсь мери: „Диль-диль, [ 85 ]атине! диль-диль, бабине! иляк кола пизынем, иляк кола ашкинем, мезе вешат, сень максан!”
Атясь мерьсь: „Пазокс-чи вешан!” Теевсь атясь пинекс, бабась — каткакс.