Эрзянь ёвкст (М. Е. Евсевьев, 1928)/17
| ←Ёвкс 16 | Эрзянь ёвкст (1928) , edited by Евсевьев, Макар Евсевьевич Ёвкс 17 |
Ёвкс 18→ |
| Эрзянь ёвкст (скаскат). Пурныньзе М. Е. Евсевьев. СССР-энь Наротнэнь Центральной Издательствась. Москов, 1928 |
ДУРАЦЬКЕ АВАНЗО КАПКАНС КУНДЫЗЕ.
Эрясть-айшть атят бабат кавонест. Ульнесть сынст колмо цёраст. Кавтотьне превейть, колмоцесь дурак. Атясь прась — кулось. Кадовсть цёратьне аваст маро.
Сыргасть превейтьне вирев — охотас, дураконь а саить. Дураксь: „Леляй, моньгак саимизь, леляй, моньгак саимизь!”
— Аштек, дурак, кашланксо! Ярсак анок кшеде!
[ 64 ]— Ну, а сайсамизь, а сайсамизь, — мон теск-как ривеське кундан!
Превейтне тусть вирев. А дураксь сайсь капкан и витизе ведь чирес. Мольсь авазо вец, понксь капканстень и кулось. Дурак саизе аванзо кудов и полук ланкс путызе.
Састь братнэ охотасто и кевстнить дураксто:
— Я, дурак, кундыть мезе-як?
— Кундыть ривеське.
— Невтикак, косо?
— Оно полук ланксо.
Лелятьне куйсть полук ланкс — аваст тосо кулозь.
— Те веть, дурак, аванок!
Дурак чатьмени.
— Месть ней тейдянок? Калмамс — эрявить ломать терьдемс, а минек мезьнекак арась. Азё, дурак, базаров, рамак столь, пенчть-вакат, ямкст, салт и ой.
Тусь дураксь. Рамсесь, месть тензэ лелятьне кармавсть и мекев кудов юты.
Ютась, ютась, сизесь и мери: „Столень ниле пильгензэ а юты, а монь кавто ды кандан эснэнзэ”.
Путызе столень ки кунчкас и мери: „А карман эснэть кандомо, — ниле пильгеть, — тоньськак ютат!” И тусь.
Юты кияванть и ваны: ки лангось весе лазновозь. Дурак мери: „Эх, ине пазонь кинть кода турванзо лазновсть”. Таргизе ойензэ ды вадьнизе ки ланганть.
Ютась, ютась дурак, пачкоць сэдь ланкс. Сэцть кавто пельга палмать стявтлезь. Дураксь неиньзе сынст и мери: „Эх, ине пазонь ломатьнень шапкасткак арасть; туи пиземе, начтасыньзе пряст”. Саиньзе вакононзо, — комавтлиньзе палмань прява, соньсь тусь таго ютамо.
[ 65 ]Ливтить ки ланганть озяст, „цилик, цилик” циледить. Мариньзе дурак и мери: „А! пекенк вачсть — моньсь анттадызь”. Саиньзе ды каиньзе тенст ямксонзо.
Ютась, ютась — пачкоць лей чирес. Ваны: лейсэнть симить гулькат. Дураксь серьгець тенст: „Мейсь салтомо симдядо? Аштеде мон салтаса вецть”. Саиньзе, ды каиньзе вецтень салонзо.
Кадовсть ансяк дураконь пеньчензэ. Юты кияванть, пеньчне мешоксонть кулдор-галдор, кулдор-галдор — калдордыть. А дуракстень марявить: „дурак, дурак! дурак, дурак!” Сон мери пенчненень: „А! тынь пееттядо монь ланксон!” Саиньзе ды ёртнинзе пенчнень ки ланга: „Омбоцеде а карматадо ланксон пеедьме!”
Сась дурак кудов. Лелятьне кевстнить эснэнзэ: „Я, дурак, рамить местькак?”
— „Рамакшнынь ды ки ланга явшинь”, и кармась ёвтнеме, кува явшиньзе рамазтьнень.
Ну, теемс а мезе: аванть эряви калмамс.
— Азё, дурак, терьть ломать аванок калмамо.
Тусь дураксь. Кона кудос а сови, мери: „Моледе аванок калмамо! Отнэ, отнэ моледе, сыреть — илядо; эйкакшонк мартонк илинк сайть”.
Промсть аватьне калмамо. Аламос аштезь, вейке мери: „Вай, монь кудос кадовсь эйкакшом, молян потявца”. Омбоцесь: „Вай, монь кудос кадовсь эйкакшом, молян потявца”.
Лелятьне мерить: „Мейсь мартонк эзинк туй?”
— Дураксь эзь мерьть.
Лелятьне мерить: „Азё, дурак, кильть лишме, озавтли эйкакшнэнь ды уски тезэ, — аваст потясызь”.
Дурак кильць изамот и тусь эйкакшонь пурнамо. Кона эйкакшонть а сайсазо — изамо пей пряс пезнавцазо. Эйкакшнэ весе кулцесть. Ускиньзе кудов и баня эземга озавтлиньзе. Курговаст тонгонесь олго сюворкст.
[ 66 ]Сась кудов. Аватьне кевстнить эснэнзэ: „Я, дурак, ускить эйкакшонок?”
— Ускинь.
— Косот?
— Баня эземга озавтнинь и ярсамс тенст максынь.
Аватьне мольсть баняс эйкакшост потявтомо, — эйкакшост весе кулцезь. Кармасть весе лайшеме. Лайшесть, лайшесть, — тусть эйкакштомо кудов. Кадовсь аваст апак калмак.