Эрзянь Мастор/2011/15/Чачома келень симфония

←Эрзянь покш, покштинеть

Эрзянь Мастор, № 15 (359), 11 августа 2011 edited by Нуянь Видяз, Кшуманцянь Пиргуж Чачома келень симфония by Нуянь Видяз

Фонд "Пургаз"→

Статья на сайте газеты: № 359, 11.08.2011, Чачома келень симфония. Нуянь Видяз

 

Чачома келень симфония.

Нуянь Видяз

Ардан валскень чоподава важодеме. Кияксонть ало сиземань апак сода гангиить кшнинь чаротне. Моли-арась спектакля — кавкссо чассто ульть таркасот. Электричкань вагонось пешксе. Озамс а козонь. Понгинь икеле кенкшенть каршо вальманть малас. Арсян ушодовозь чиденть. Мезе чокшнес карматано тееме? Секень вант, спектакля марто районов-буев сыргатано. Кодамо? «Кот в сапогах»? Паряк, «Турп»?

Ардан. Перькан ламот кортыть рузокс, кой-зярдо марсевить азербайджанокскак. Мерема, чуросто. Чатьмонян. Эрзякс тесэ а кортат. А кие марто. Лия мастор, мезе учат.

Вагононть тона пестэ каятотсь мезе-бути содавикс.

Вай! Те мезе? Паряк, марявсь тень? А? Стявтынь пилень. Атят-сэрдят, валтнэ жо марявсть эрзянь! Општ. Кунсолан. Мезеяк а маряви. «Тонськак а содат мезде арсят. Сырнеме прок кармить, цёра-парочи... Косто мусыть эрзятнень истямо покш ошсто? Баку, вармань ош, — те теть аволь Отяжеле, аволь Сарангак», — мурнян эсь прям.

— Тук-тук-тук... тук-тук-тук, — рельсатнень марто калякить кшнинь вайгельсэ чаротне. «Капшадо, капшадо, седе курок пачкодезан!» — совинь кортамост юткс, эзинь кирдеве, монгак.

Зярыя станциятнестэ вейкентень пачкодемстэ «электроайгорось» киртизе виензэ. Чаротне каляказевсть седе стамбаро, апак ранго, чуросто.

— Вадря, вадря, Коля, вастомазонок! — каятотсь те шкастонть вагононь тона пестэ тейтерьавань вайгель.

Кавтолдоман шлязь шлявсть. Эрзят ардыть! Мон ютамо таркаванть стядо аштицятнень юткова метьказокс, тей-тов менчевезь, кува-кува кенерепакарьсэнь лездазь, пачкодинь «вадря» валонть кавксть ёвтыцятнень малас. Кецневтимизь сэрей, аволь уш од цёра ды истямо жо иень, ашо прячерь ава.

Пелинь, валгить.

Кукшкадинь эйстэст авасоло стенанть ёжос. Мелем ульнесь аволь кортамс — кунсоломс, марямс келенек мазычинзэ, тантейстэ, куконь эрьгекс качадьщя чинензэ. Зяроце ков уш эзия марсе. Тошнакадынь. Чатьмонян. Сыньгак чатьмонить. Ваныть вальмава. «Нить-полат, бешоконь, — прынь мельс, — секс ламо а кортытькак».

— Сы таргосто мольтяно Сурханав, — сезизе чатьмонеманть авась.

— Содан, — мельтеме тешкстызе цёрась, — кемсисемге топодить Ленанень, мезеяк рамама.

— Вай, таго казне! Истя а вечкан, истя а вечкан рамсемат. Якат, якат, мезе саемс — а содат, — велявтсь вакссонзонть ёнов авась. Келезэ ванькс, вейке валгак рузонь эзь ёвта.

— Монгак тонекс... Ансяк ков молят...

— Самстот кши рамак, розень ды ашо, — кармавтсь авась, сонсь ушодсь одс ваномо вальмава, — ярмакот улить?

Улить, раман...

Вал, омбоце, колмоце, ды ютксост кортамось чольдерьгадсь чудикерькскекс. Кунсолан оймень апак таргсе. Допрок истя, кода сынь, кортыть Орданьбуесэ. Валпетненьгак усксить минекекс. «Тон ков моля-а-ат? Тон мезе тея-а-ат?» Мезеяк эзинь маря, а чаронь «калякамот», а шалт рузонь кельсэ, а ракамот... Мельсэнь-седейсэнь ульнинь тосо, чачома масторсон, Орданьбуесэ.

Маринь ды кунсолынь вейке — эрзякс кортамо. Натой чувтоминь. Мезде эсь ютковаст кортасть, монь пек эзь мелявтовто. Пилень палсесь сонсь кортамось, эрзянь келенть горниповокс гайгемазо. Конинь сельмень ды кунсолан, ды анок ульнинь пинге кунсоломс те а ёвтавияк кодамо мазый, ламодо-ламодо ёвтниця симфониянть. Вана вети партиянзо, нусмакавты ёжо виолончелесь, сорновтни гайттнесэ, ёвтни та-кодамо кеняркссто фортепианась, урнить скрипкатне, пазонь гайтть рашты арфась... Инешкипаз, каня Чайковскоень симфониянзо путовить тень ваксс? Операнзо ды симфониянзо Чайковский сёрмадсь ськамонзо — келень музыканть лангсо важодсть ламо тёжат, раське, ды сёрмадсть эйсэнзэ ламодояк ламо пингень перть.

Кить ломантне, кинь кунсолан? А содан.

Мезде кортыть? А содан.

Ков ардыть? А содан.

Содан вейкеде: сынь аволь кортасть — морасть. Морасть эрзякс ды казсть тень сюпавдояк сюпав казне — нотань таркас валсо сёрмадозь симфония, келень симфония. Сон вастовтымим авань, малавиксэнь, велень ялган, чачома мастором марто.

Ошонтень ве лотксема таркас апак пачкоде, Ине музыкасо кецневтицян валгсть.

— Вастомазонок! — кидеяк апак визде серьгединь мельгаст вагононть келес кенярксстонть жойниця вайгельсэ.

 

*  *  *

Ардан троллейбусо «удсема кескавстон» — «Светотехстройстэ» — ошонть куншкав. Тосо важодян, тосо «баяганок», конань вельде бажатано сыремтемс эрзятнень раськень ёжост, тосо «чачттано» «Эрзянь Мастор» газетанть, тосо ютавтан те моданть лангсо, косо аволь свал пувить эльканя вармат, меельце иень.

Арсян, ванан перькан, кунсолан кортамотнень.

Рузокс, рузокс, рузокс...

Паро, тов ды мекев ардоманть перть мариндерят вейкешка, седе сеедьстэ сыре ломань, эрзякс кортыця. Рузокс калякицятнененьгак пшкалян эрзякс, яла кеман — эртеван чачома келем содыцяс, кортнян мартонзо, витьса седеем. Чуросто истят понгонить алтымазон. Чуроосто! Чуросто аволь косояк Бакусо эли Африкань кодамояк васоло ёнкссо, тесэ — Сарансо, Эрзянь Масторсо. «Мезе теемс, кода улемс? — а тукшны прястон, кары седейсэнь нусманя кевкстемась. — Содавлиньгак...»

Саезь «Эрязденть арсезь» книгастонть.

Микшневи сон редакциясо, питнезэ 200 цел.