Эрзянь Мастор/2009/23/Ёвтнесь тень Норовава

←* Эрзянь Мастор - 2010 *

Эрзянь Мастор, № 23 (319), 16 декабря 2009 edited by Нуянь Видяз, Кшуманцянь Пиргуж Ёвтнесь тень Норовава

Перепись состоится!→

Статья на сайте газеты: № 319, 16.12.2009, Ёвтнесь тень Норовава

 

Ёвтнесь тень Норовава

Нурькинестэ Мордовиянь Дубинькань буень сюронь кастыцятнеде...

Дубинькань буесь–районось ашти Мордовия республикань чилисема-чиёнкс ёно. Сон теезель-пурназель 1928 иестэ. Покшолмазоль 1167 кв.км., эрицянзо — 58690, эйстэст 62,69 % эрзят, 5,4 % татарт ды 32,0% рузт. Эйзэнзэ сестэ совавтозельть Покш Березник ёнксонь ламо эрзянь велеть. Секс покшольгак. Ней эрицянзо 14,8 тёжат (2007 ие), 2003 иестэ ульнесть 16,3.

1969 иестэ пурназель рекордонь урожай — 15,1 центнерт гектарсто. Районось лисекшнэсь изницякс социализмань пелькстамосонть государствантень кшинь миемань кис. Максозель тензэ икелев эскелицянь знамя.

Ютасть седе мейле иетнеде байтяк — 39. Мезес пачкодсть тесэнь сокийтне-видийтне, а саеви превскак. Варштатано 2009 иень топавтовкстнэс.

Моргонь «Моргинское ООО-сь» сайсь эрьва гектарстонть 51,9 центнерт! «Ёвкс», — меревель апак пеедькшне ютась пингень кодгеменце иетнестэ Фрунзе лемсэ колхозонь комбайнерось Четвергов Николай Павлович. «А кеман!» — серьгедевель сон апак кавтолдо аламос аштезь.Текень ёвтавлизь, дух а кавтолдан, ламот. Аволинь кеме, паряк, монгак. Кемть-иля те хозяйствась (прявтозо Нефедов Виктор Николаевич) пивсэсь 10380 тоннат товт/зерна. ООО-ть тевс нолдтневить паксянь неень шкань технологиятне, модамасторонь ёрокчись; паксятнесэ, мода мельга якамонь койтнень коряс, важодсть омбо масторонь неень шкань тракторт, комбайнат ды лия техника.

Ансяк, монь койсэ, течи седе ламо арсема аволь «всё выше и выше»-денть, арсема кода седе питнейстэ, сыця питнень (доходонь) саемга миемс теезенть. Саемс седе ламо, ютавтозтнень коряс, ярмакт. Модамасторсонть аволь аламо невтевкст, факт, зярдо «вышесь», сэрьксэсь пачтни прамос.

Аволь васов Моргодо, пачтясть тень пешксе утомтне, кадовсь Сайняле. Тесэнь ООО-ть прявтозо Борисов Николай Михайлович. Тедеде Сайнялень сюронь кастыцятне пивсэсть эрьва гектарсто 50.6 центнерт, эрьва кодамо зерна ды кснавт. 2008 иень коряс пурнасть 1100 тоннадо ламо. А берянь, мерема, «кансткесь»! Телень товзюронть менстезэ (урожайностезэ) лиссь 43,4 центнерт, шужонть — 64,6 (Моргодо ламо!). Истямо сюпавчинь саемадо, , истямо рекордто районось эзь марсе! Мезе парось, неть результатнэ састь аволь томбалькстнэнь икельга сюконякшнозь яказь, теезь сынь эсенек, эсь масторонь техникасо топавтозь тевтнень вельде. Вана мезес эряви бажамс: топавтомс паксянь тевтнень-койтнень Россиясо нолдавикс техникасо! Ды те пек берянь: масторсонть а нолдавить паро, васняяк, тракторт, нардев комбайнат ды лия эрявикс машинат.

Сюронь эрьва центнерэнть эсь питнечизэ лиссь Сайнялесэ ансяк 237 целковойть. Лиятнень — 348-389. Те макссь хозяйствантень вийть пандомс велень касомань Фондсто ды лия кредитортнэнь кедьстэ саезь ярмактнень. Сюкпря Николай Михалыч, ванык ды ванынк Норовавань мелензэ!

Колмоце «Тештесь» районсонть-буесэнть «Лаша» ООО-сь, директорось Маскаев Михаил Андреевич, агрономось Балясников Александр Васильевич. «Лашас» совить Орданьбуе, Дубинька, Ломаты, Турдак велетне. Тесэ гектарось макссь 41,0 центнерт товзюро, шуж, кснав ды лия культурат. Весемезэ пурназь 18604 тоннат. Идезь сонзэ миемадонзо 23 млн 567 тёжат целковойть.

Весемезэ ООО-ть вете велень модат. Юткотне покшт. Савкшнось пансемс машинатнень 60 вайгельпень ютко. Лиясто ве паксясонть нусть-пивсэсть 30 комбайнат. Марявсь, моли алкуксонь недявомо сюронть кис! Техникась седе ламо импортонь.

Дубинькасо аволь умок путозель паро корпус велень хозяйствань профессиянь училищантень. Ней сонзэ статусозо лия — тонавтомань техникум. Сонзэ мехнизатортнэ 2009 иестэ тейсть келей эскелькс икелев — эрьва гектарсто пивсэсть 26,7 ц. зерна. Весемезэ техникумось пурансь 2505 тоннат.

Кода советэнь шкатнестэяк, паро результат марто прядызе «паксянь иензэ» «Красинское» ООО-сь. Прявтозо Расшивалин Алексей Владимирович, агрономось Лямкаев Иван Викторович. Тесэ гектарось чачтась 27,5 центнерт сюро (весемезэ 9000 тоннат). Красинадо эль-эль кадовсь вакссонзо Петровка рузонь велесь. Кадовсь шабрадонзо ансяк 0,9 центнерэнь туро (сайсть 26,6 ц/га). Кеман, сы иестэ прявтось Чаткин Виталий Викторович красинансетнень икельдясынзе.

Парсте важодсь райононь лия паксянь сокицятне-видицятнеяк, сынст прявтосткак. Те «Рассвет» ООО-сь, Николай Павлович Ионов, агрономось Сергей Степанович Сапожников, «Поваделе» ООО-сь (Алескей Семенович Куликов, агрономось Семен Ильич Юткин), фермертнэ Александр Николаевич Саушкин, Иван Ефимович Еремкин ды лиятне.

Эзть кемевкшнэ ёвтазь цифратнес-числатнес 30-40 иеде икеле. Превскак эзь совсе теяк: районось эрьва скалсто карми потятвомо 3387 кг., «Лаша» ООО-сь мик 4256 кг. «Фантастика! Ёвкс» — меревельть 1960-1970-це иетнестэ теде марязь.

А мезть кевкстнемс, чарькодеви: важодицятненень «ломанькс» апак пандо ве цифраськак аволь куялгадо. Ней ковозонзо районсонть эрьванень пандыть, куншкалгавтозь, 7539 целковойть, а вана Моргсо, косо теезь тувонь покш комплекс 24 тёжань пряс Германянь проектэнь коряс, — 10162.

Парсте панды важодицянстэнь, тагояк ледстяса, «Сайняле» ООО-как — 10162 целковойть.

Те весе пек паро. Истя улезэяк. Ансяк илязо тееве целковоесь фетишекс, озномакс, илинзе ангорда ломаненть седейстэ эрямонть мазычинзэ, илязо стувтово чачома Масторозо, чачома келезэ, покштянь покштянзо, иньаванзо. Кадовозо ломанесь Ломанькс.

Аламнеде ёжо колы те улечиськак: импорт, импорт, импорт. Томбальде рамавить тракторт, комбайнат, крандазт, тувонь комплекст, раштыця скалт... Нусмакадат. Мекс Россиясо сынь а нолдавить? Те кода истя? Мекс моданок, ламо-ламо келей-келей паксянок сокить «Джон Дирт» ды нуить «Хатер-Тенерт»? Тынь, ломанть, каня а марясынк Норовавань ниреждезь лайшеманзо?