Эрзянь Мастор/2005/11/Яла а ни, яла а мирдень кедьсэ... Пусмось алтави Калинкин Иванонь чачома чизэнзэ

←Из гостевой книги ЭМ

Эрзянь Мастор, № 11 (211), 10 июня 2005 edited by Нуянь Видяз, Кшуманцянь Пиргуж Яла а ни, яла а мирдень кедьсэ... Пусмось алтави Калинкин Иванонь чачома чизэнзэ

Од книга, Тимофей Тимин. Русская эрзянка.→

Статья на сайте газеты: № 211, 10.06.2005, Яла а ни, яла а мирдень кедьсэ... Пусмось алтави Калинкин Иванонь чачома чизэнзэ

 

Яла а ни, яла а мирдень кедьсэ... Пусмось алтави Калинкин Иванонь чачома чизэнзэ

Россиянь культурань заслуженной важодицянтень, Мордовиянь Государственной казнень лауреатонтень ды народной поэтэнтень Иван Алексеевич Калинкиннэнь 2005-це иень аштемковонь 23-це чистэ топодить 70 иеть. Сон чачсь Ульяновск енксонь Инзань буень Чей (рузокс Челдаево) велесэ, 1944-це иестэ саезь эри Мордовиясо. Тонавтнесь Покш Игнатовань буень Спасова велень кемень иень школасо, служась армиясо. Прядызе Орданьбуе ошонь культпросветшколанть, Горький ошонь социально-политологической институтонть (журналистикань пельксэнть). Важодсь Покш Игнатовань буень Ташто Чамза велень клубонь прявтокс, теке буень «Восход» газетань редакторокс.

1976-це иестэ И.А.Калинкин сась эрямо Саранов, важодсь «Эрзянь правда» газетань куронь прявтокс, «Сятко» журналонь секретарекс, Писателень вейсэндявксонь литконсультантокс. 1976-це иень даволковсто совавтозель СССР-нь Сермадеень вейсэндявксонтень. 1972-це иестэ аравтозелъ «Сятконть» прявт-редакторокс. 1984 иестэ саезь 2000 иенть прядовомс (кеветее иеть сисем ковт) важодсь республикань сермадеень вейсэндявксонть прявтокс.

Народной поэтэсъ И. А. Калинкин Мордовиянь ды Московонь издательстватнесэ нолдась стихень ды прозанъ 22 книгат. Ютксост стихень ды поэмань пусмотне: «Зорянь мизолкст», «Маней пиземе», «Сырнень сюлмо», «Лемзерксчире», «Витькстамо», «Пиче вирь», «Кизэнь менель», «Васоло ки лангсо» прозань книгась, «Ава ды лей» стихсэ романось ды лият. Стихензэ ды поэманзо рузонь кельсэ нолдазь Мордкизсэ: «Отцовский характер», «Зеленые костры», «Цветы дружбы», «Надежда», Московонь издательстватнесэ: «Черемуховый берег», «Песни с берегов Суры и Мокши», «Костры», «Колесо», «Женщина и река» стихсэ романось, конань ютавтызе Россиянь содавикс поэтэсь В. И. Кочетков.

И.А.Калинкинэнь произведениянзо лиснесть ды лиснить нейгак Россиянь содавикс журналтнэсэ ды газетатнесэ: «Огонек», «Дружба народов», «Наш современник», «Нева», «Литературная газета», «Литературная Россия». Народной поэтэсь произведениясонзо покш мель яви кезэрень ды неень шкатненень, ломантнень уцяскаст невтемантень, пертьпельксэнь ванстомантень, чачома масторонь вечкемантень, тетянь-авань кельвалонь ванстомантень.

Калинкин Иван покш мель яви вейсэнь тевтненень. Сон кочказель минек республикань Верховной Советэнь депутатокс, Россиянь сермадейтнень правленияс ды сермадеень вейсэндявксс совавтомань комиссиянь членэкс. Аволь умок кочказь Мордовиянь Сёрмадейтнень вейксэндявксонь правленияс. Литературасо паро важодеманть кис казезь Мордовиянь кавто Почетной грамотасо да «Знак Почета» орденсэ. Эсензэ сизьгеменъ иетнень поэтэсь васты кочказь произведениянь колмо томсо. Васенцентень совасть стихотвореният, сонетэнь каштазт, «Кискань эрямодо» повестесь ды «Уцяска» очеркесь, омбоцентень — кемголмово поэмат, колмоцентень одс витнезь «Ава да лей» стихсэ романось.

«Эрзянь Мастор» газетанть теицянзо ды ловныцянзо седейлембесэ арсить Иван Алесеевичнень кеме шумбрачи, сермадомань тевсэнть од изнявкст. Неть од изнявкстнэ свал кенярдовтост ломантнень.