Эрзянь Мастор/2005/08/Чачома чи марто, поэт!
| ←Мелень ёвтамо. Указ | Эрзянь Мастор, 2005 ие чадыковонь 28 чи, № 8 (208) edited by Нуянь Видяз, Кшуманцянь Пиргуж Чачома чи марто, поэт! |
Подписка→ |
| Статья на сайте газеты: № 208, 28.04.2005, Чачома чи марто, поэт! |
| Чачома чи марто, поэт! |
Содавикс эрзянь поэтэнтень Числав Журавлёвнень 2005 иень чадыковонь 27 чистэ топодсть 70.
Числав Григорьевич чачсь 1935 иень чадыковонь 27 чистэ Куйбышев (Самара) ёнксонь Подбельксэнь буень Покш Толкай велесэ. Вишка Толкайсэ прядызе педагогикань училищанть. Важодсь физкультурань тонавтныцякс. 1954-1957 иетнестэ армиясоль. Кемгавтоводо ламо иеть эрясь Сибирьсэ. 1967 иестэ саезь эри Самарасо. 1982 иестэ «Эрзянь правда» газетасонть ды «Сятко» журналсонть печатазель стихень покш пусмозо. Васень книгазо «Сёксень цецят» лиссь 1991 иестэ Сарансо. Мейле кецневтинзе ловныцянзо книгасонзо: «Овтонь латко» (1993), «Каргонь вайгель» (1995), «Валдо ойме» (1996), «Арсемат ды ёжот» (2000), «Вечкемань теште» (2001), «Кемемань валдо» (2002), «Арсемань пакся» (2003), «Седеень вайгель» (2004).
Стихензэ поэтэнть валдот ды манейть, превейть ды арсеме кармавтыцят, эйсэст эрьва кодамо тюсонь ёжомарямот, кайкст, музыка. 1992 иестэ саезь важодсь самарань радиосо эрзянь программань редакторокс.
Вечкевикс оянок-ялганок Числав, арсетяно минь теть, одт-сыреть, ават-церат, весе-весе, шумбрачи, изнявкст поэзиясо, истя жо кемевикстэ кирдемс Пегасонь ведьметнень, теке ладсо виень апак вансто, апак пеле аштемс эрзянь келенть кис. Шумбрачи теть ды кувака-кувака эрямонь ки!
|
RU: Данная работа создана сотрудниками газеты Эрзянь Мастор и распространяется по лицензии Creative Commons Attribution 4.0 International. См. пояснение внизу заглавной страницы газеты.
EN: This work is licensed under the Creative Commons Attribution 4.0 International License as a work by Erzyan Mastor journal employee(s). See the disclaimer on the bottom of the front page of the journal. |